MAKU 2 - Disambi Dipyadipya

¹ PAKABWELAYI mu Kapenaumu kabidi kunyuma kwa matuku mabende, mwoximo ăkacakana ene, utani mu ncibo.

² Yi bantu bangi bakasangixibwa mangwoso bitakadi kidi kinga kabidi, kumoni isanga pa mbelo ; yi akabambila diyi.

³ Yi bantu bakalwa, badi mu kucwala muna mbôyaponde kudiyi amakwombuludibwa kudi bantu banai.

⁴ Pakadi kababiyi kukokyela kudiyi bwalo bwa bantu bungi, bakadipula samba kwakakalayi ; yi pakadi bamatubula ditundu bakapwesa bolelo bwakalala muna mbôyaponde kulu kwabu.

⁵ Yisu lolo, biakamonayi kwetabusa kwabo, akatôyela muna mbôyaponde ene, Mwana, mabi ebe amakulekyelebwa.

⁶ Mo banga bafundi ba mikanda bakadiko bamaxikama koku, bakakwelesañana mbata mu micima yabo ene,

⁷ Kukai muntu you atôya nako ? Udi mu kutangola Ncembi. Ñani ubili kulekyela mabi utena Ncembi mutupu ?

⁸ Yi Yisu akalembetela mangwoso mu kidimu kienci ene, batanakwelesa mbata nako munda mwabo, akabatôyela ene, Nwelesa malo aa mbata mu micima yenu kukai ?

⁹ Kifiani kiamadika lungwoso ? Ndo kutôyela muna mbôyaponde ene, Mabi ebe amalekyelebwa ; sungu kutôya ene, Bika, ombulula bolelo bwebe, enda.

¹⁰ Kaninga binuxelubukwa ene, Mwana a muntu udi yi bumanya paxi bwa kulekyela mabi, akatôyela muna mbôyaponde ene,

¹¹ Nkwatôyela ene, Bika, ombulula bolelo bwebe ; yaka ku ncibo ebe.

¹² Yi akabika, yi akakwombulula bolelo bwanci mangwoso, yi akabatuka ku mpala ya bantu boso, biakakamabo bo-a-bwoso, yi bakatumbisa Ncembi ene, Katwamona noku kalikali pô.

¹³ Yi akabatuka kabidi pepe yi mai, yi kimbukuma kincimancima kiakalwa kudiyi, yi akabeyesa.

¹⁴ Pakadikayi, akamona Lebi, mwana a Alifayo, uxikamini mu ncibo a milambu ; yi akamutôyela ene, Ungulandudili. Yei lolo akakwemana yi akamulandudila.

¹⁵ Yi kunyuma akadi utanaxikama ku bidya mu ncibo anci, yi basangi ba milambu bangi yi boni bangi bakaxikama ku bidya yi Yisu yi beyi banci ; bwalc bwakadibo bangi, yi bakamulanda.

¹⁶ Yi bafundi ba mikanda yi baFalixi, pakamumonabo udi mu kudya yi boni yi basangi ba milambu, bakatôyela beyi banci ene, Yei udedya yi unonwa yi basangi ba milambu yi boni ?

¹⁷ Pakakwombwa Yisu, akabatôyela ene, Bobo badi yi mpinyu kabasokwabila fianga, kate bobo badi yi masama. Meme kisolwa kulwa bikila bena nkwami, kate boni.

¹⁸ Yi beyi ba Yoano yi baFalixi bakadi mu kuncila bidya luncilu ; yi bakalwa mwambila ene, Kukai beyi ba Yoano yi beyi ba baFalixi bancila bidya, mo beyi bebe kabasoncila ?

¹⁹ Yisu akabatôyela ene, Bana ba ncibo a dibakwa babili kuncila bidya pakala mwangaci a dibakwa udi yinabo ? Pakala badi yi mwangaci a dibakwa yinabo, kababiyi kuncila.

²⁰ Mo matuku analwa anabancudibwa mwangaci a dibakwa, yi ku kikondo kieki kunancilabo ku dituku dedi.

²¹ Kakuna muntu amatela kicini kia mbuxa mupyamupya ku kilamba kinyanyuki ; ximbi kibakilu kixebakowa ku kicini kinyanyuki, yi ditundu dixedika dinene.

²² Kakuna muntu lolo amateka malufu a finyo a mwosolo mu bixeba bia kalikali ; ximbi malufu axetondosa bixeba, yi malufu axencimina yi bixeba ; kate malufu a finyo a mwosolo axetekyebwa mu bixeba bipyabipya.

²³ Yi akadi mu kwenda mu bibidi bia miebele ku dituku dia sabado ; yi beyi banci biakakwendabo bakabanga kukombola mitongu ya miebele.

²⁴ Yi baFalixi bakamwambila ene, Mona, kuka bencenca mutasolelekyela yi bwadi, ku dituku dia Sabado ?

²⁵ Yei akabambila ene, Nonu kanwabala mwakakwenca Dafidi pakadi amakwayila yi amakwombwa ncala, mikyenci yi bobo bakadi yinanci ;

²⁶ mwakabwelayi mu ncibo a Ncembi ku kikondo kia Abiata bokanda bunene, yi akadya mampa madisa atasolelekyela yi bwadi muntu mwoso kudya utena makanda ; yi akapa kabidi bobo bakadi yinanci ?

²⁷ Yi akabambila ene, Sabado akapangibwa ku bwalo bwa muntu, kumoni muntu ku bwalo bwa Sabado.

²⁸ Mbwôso Mwana a Muntu udi Fumu a Sabado kabidi.