MAKU 14 - Disambi Dipyadipya

¹ KUNYUMA kwa matuku abidi lolo kwakadi kitula kia Kidikixilu, yi kia mampa atena kiolubixilu. Yi makanda manene yi bafundi ba mikanda bakapalala muxemukwatabo yi buluba ndo kumuxipa.

² Bwalo bwakatôyabo ene, Kumoni ku kitula ximbi ambeci baxeteka muyengi kudi bantu.

³ Yi pakadi utani ku Betani, mu ncibo a Ximono, muna sudi, pakaxikamayi ku mesa, pakalwa mwamukaxi udi yi mulondo ă alabasta, ă manyi a ncobo a diso dikola ; yi akaxipa mulondo ă alabasta, akapangulula manyi kulu kwa mucwe ănci.

⁴ Mo banga bakasamwañana bituku ene, Manyi amakwecikixibwa nako ku bwalo kai ?

⁵ Manyi aa axekwodixibwa ku diso dia denalio nkama isatu yi botolo, mpalata kupebwa bakombi. Yi bakamupangila mapangu.

⁶ Mo Yisu akatôya ene, Numulekyeli ; numwanyingisa kukai ? Amangukixila bwalo bunengela.

⁷ Bwalo bunwakala yi bakombi yinenu matuku moso, yi ku kikondo kioso kinwananga nubili kubalwangwasana ; mo kanusoakala yinami matuku moso.

⁸ Amakwenca biamaponyañanayi. Amaxinga mumbidi ămene manyi buxi ku bwalo bwa kincikilu kiamene.

⁹ Nwatôyela sôsôlwo ene, Kwoso kunakwambidibwa losangu lunengela ku bungi bwa loboko, kunakwambidibwa kabidi mwapwenca mwamukaxi you, kimonenu kia kumwela lukanyi.

¹⁰ Yi Yudaxi a Ixikalioto, muna disangi yi babidi, akaya kudi makanda manene bixemulongolayi kudibo.

¹¹ Bobo lolo, pakakwombwabo, bakaxekyelela, yi bakamuxiyila kilaka dia mpalata kumupa. Yi akapalala kipoma kinengela kia kumulongola.

¹² Ku dituku dia buxi dia mampa atena kiolubixilu, pakaxipabo nyama ya Kidikixilu, beyi bakamwambila ene, Kwananga kudi kupai kutuxeya lungika kidi, bixedya owe Kidikixilu ?

¹³ Yi akatuma beyi banci babidi ene, Nubweli mu bula ; momu munapomana yinenu muntu udi mu kucwala dibungu dia mai ; numulandudili.

¹⁴ Kwoso kunabwelayi lolo, nutôyeli fumu a ncibo ene, Mweyexi ene, Kidi kiamene kia benyi kidi kupai ? kinadya Kidikixilu momu yi beyi bamene.

¹⁵ Yei lolo mikyenci unanwebesa ngumbu munene a kulu mulungika loko ; nutulungikili momu noku.

¹⁶ Yi beyi banci bakancuka, yi bakabwela mu bula, yi bakasañana bea biakabatôyelayi ; yi bakalungika Kidikixilu.

¹⁷ Pakalwa bwelu, yei akalwa yi beyi disangi yi babidi.

¹⁸ Yi pakaxikamabo ku mesa yi bakadi mu kudya, Yisu ene, Nwatôyela sôsôlwo ene, Munga udi yinenu unangwenga ; isanga muntu utanadya yinami.

¹⁹ Yi bakabanga kwakala yi buxitu ku micima, yi kumutôyela ku muntu ku muntu, ene, Meme ?

²⁰ Yi akabapingasa ene, Munga a disangi yi babidi, you asopa yinami mu dilonga.

²¹ Mwana a Muntu uyeya sôsôlwo bea biakafundibwa ku bwalo bwanci, kaninga mpeya kudi muntu you unakwengebwa Mwana a Muntu kudiyi ; ku bwalo bwa muntu you kuxeakala kunengela yei kumoni kulelebwa pô.

²² Yi pakadi batanadya, Yisu akangata dimpa ; yi pakadi amaxingila, akadinyowa yi akabapa, yi akatôya ene, Nwangati ; dedi ndo mumbidi ămene.

²³ Yi akangata mpamba, yi pakadi amaxinga akabapa, yi bakanwa munda bungi bwabo.

²⁴ Yi akabatôyela ene, Aa ndo maxi amene a disambi dipyadipya, amancudibwa ku micwe ya bantu bangi.

²⁵ Nwatôyela sôsolwo ene, Kinanwa malufu a finyo kabidi nyô, pôi dituku dinanwa mapyamapya mu bufumu bwa Ncembi.

²⁶ Yi pakadi bamakwembikisa musambu pakabatukabo kuya ku lupongo lwa Olife.

²⁷ Yi Yisu akabatôyela ene, Nonu nu-a-bwoso nunaponexebwa ; bwalo bwakafundibwa ene, Nakukuma Kalama yi mikwakwa yinacakanixibwa.

²⁸ Kate panakala namabixibwa, nakuya ku buxi bwenu ku Ngalili.

²⁹ Mo Pita ăkamutôyela ene, Isanga bantu boso banaponexebwa, kate meme kumoni.

³⁰ Yisu akamwambila ene, Nkwatôyela sôsôlwo ene, Owe lelo, ku butuku bobu, buxi butakwela ntala meyi abidi, unangunyañana manyañana asatu.

³¹ Mo yei akadika kutôya yi ngulu ene, Isanga nxefwa yinebe, kinakunyañana pô. Yi mo nako kwakatôyabo bungi bwabo kabidi.

³² Bakalwa lolo ku kidi kiabikidibwa ene, Ngetesemane, yl akatôyela beyi banci ene, Nuxikami kunu bingwalomba.

³³ Yi akangata yinanci Pita yi Yakobo yi Yoano, yi akabanga kukama kama kungi, yi kwakala yi buxitu bungi.

³⁴ Akabatôyela ene, Mucima ămene udi yi kusama kungi, isanga kwa lufu ; nusali kunu, nudingili.

³⁵ Yi akaya ku buxi kubende, yi akapona paxi pa loboko ; yi akalomba, ene, ndo Ncembi amaponyañana, ola you uxemudikila.

³⁶ Yi akatôya ene, Aba Tete, bintu bioso biamalubukibwa kwencebwa kudi ; nculapo mpamba you kundi. Kate kumoni mwamene mungwananga, kate mwananga Owe.

³⁷ Akalwa lolo, yi akabasañana mu tulu. Akatôyela Pita ene, Ximono, wamalala tulu ? kusolelekyela yi kudingila ola umoumwe ?

³⁸ Nudingili, nulombi, binutaxebwela mu kielekyexelu. Mucima ămakwetabusa sosôlwo, mo munyu udi kulebela.

³⁹ Akancuka kabidi lolo yi akalomba bwalo bobu noku diamubidi.

⁴⁰ Yi akapinana, akabasañana mu tulu, bwalo bwakadi meso abo maxitu ; yi bakadi kabasolubukwa mwa kumupingasa diyi,

⁴¹ Yi akalwa diamusatu yi akabatôyela ene, Nkyekyu nulali tulu, nwomowi bienu. Kwamalelekyela ; ola amafika ; numoni, Mwana a Muntu amakwengebwa ku makaci a boni.

⁴² Nubiki, cuyi ; numoni, you ungwengenga amakokyela pepe.

⁴³ Yi pakadi ukiatôya, Yudaxi a disangi yi babidi akalwa mangwoso, yi kibumbu kinene kia bantu yinanci yi miele yi mici, bamalwa kudi makanda manene yi kudi bafundi ba mikanda yi kudi babakulu.

⁴⁴ Yei lolo akamwenga akabalayisa kilayixilu ene, You unamunyita, kayou ; numukwati, numunculi loko.

⁴⁵ Yi pakafikayi, akalwa kudiyi mangwoso ene, Labi ; yi akamunyita nyita.

⁴⁶ Yi bakamubaka makaci abo yi bakamukwata.

⁴⁷ Kaninga munga abo a bantu bakakwemana pepe akasomona mwele ănci, akakuma lolo musadi a bokanda bunene, yi akaxaka dicu dienci.

⁴⁸ Yi Yisu akabakulumuna ene, Nonu nwamabatuka bea kutanda yi mwefi, yi miele yi mici ndo kungukwata ?

⁴⁹ Nakadi yinenu mu tempelo ku dituku ku dituku, ndi mu kweyesa eyesa, yi nwakadi kanusongukwata. Kate kudi nako bixefikixibwa mukanda ă Ncembi.

⁵⁰ Yi bakamuxiya bungi bwabo ; yi bakacina.

⁵¹ Kaninga dinga dipulwa diakamulanda, ulete mbuxa a susu ndo kuncibika butaka bwanci ; yi bakamukwata ;

⁵² mo yei akaxiya mbuxa a susu, yi akacina yi butaka.

⁵³ Yi bakacwala Yisu kudi bokanda bunene. Yi bungi bwa makanda manene yi babakulu yi bafundi ba mikanda bakakokama kudiyi.

⁵⁴ Pita lolo akamulanda kulekule pôi munda mwa lumbu lwa ncibo a bokanda bunene ; yi akaxikama yi tupalai, udi mu kwota mudilu.

⁵⁵ Yi makanda manene yi kikokye kincimancima bakapalala ntôbô ya kubaxipisa Yisu ; mo bakadi kabasoyisañana.

⁵⁶ Bwalo bwakamudimbidila bantu bangi, yi ntôbô yabo yakadi kayisolelekyelañana.

⁵⁷ Banga lolo bakakwemana yi bakamudimbidila ene,

⁵⁸ Twakamwombwa udi mu kutôya ene, Nakuxipa tempelo you amapangibwa ku makaci, yi ku lwedi lwa matuku asatu ndo kunakwabaka munga utasopangibwa ku makaci.

⁵⁹ Yi isanga noku ntôbô yakadi kayisolelekyelañana.

⁶⁰ Yi bokanda bunene bwakakwemana pakacikaci pabo yi bwakakwapangusa Yisu ene, Kusopingasa diyi ? Ntôbô idi beci yatôbola bantu baba ku bwalo bwebe ?

⁶¹ Mo yei akapudikila, akadi kasopingasa diyi dioso. Bokanda bunene lolo bwakamwapangusa kabidi ene, Owe ndo Kalistu, Mwana a You utwatumbisa ?

⁶² Yisu akatôya ene, Meme kayou ; yi nunamona Mwana a Muntu uxikamini ku kidyo kia bumanya, utanalwa yi mabaxi a diulu.

⁶³ Yi bokanda bunene bwakasambula bilamba bienci, yi bwakatôya ene, Twakyeba bamo batôbôdi kukai ?

⁶⁴ Nonu nwamakwombwa mwotangu ou ; nwencenca beci ? Yi bakamubela bungi bwabo ene, Amalelekyela yi kufwa.

⁶⁵ Banga lolo bakabanga kumwela mati, yi kuncibika mpala anci, yi kumukuma bimbondu ene, Dimusa ; yi tupalai twakamwangata yi mapi.

⁶⁶ Yi pakadi Pita udi muxi mu lumbu lwa ncibo, munga musadi a bokanda bunene a babakaxi akalwa ;

⁶⁷ biakamonayi Pita udi mu kwota mudilu, akamuxixima yi akatôya ene, Owe kabidi wakadi yi muna Nasalete, Yisu.

⁶⁸ Mo yei akanyañana ene, Kisolubukwa, kisolembetela mwatôya. Yi akabatuka ku kibwelelu kia buxi ; yi ntala akakwela diyi.

⁶⁹ Musadi lolo a babakaxi akamumona yi akabanga kabidi kutôyela bantu bakakwemăna pepe ene, You ndo muna kwabo.

⁷⁰ Mo yei akanyafiana kabidi. Kabidi lolo, pakadika kakondo kabende, bobo bakakwemana pepe bakatôyela Pita ene, Owe ndo muna kwabo sôsôlwo, bwalo budi owe muna Ngalili.

⁷¹ Mo yei akabanga kufinga yi kutangola ene, Kibiyi mwamulumi you unwatôya ku bwalo bwanci.

⁷² Yi ntala akakwela diyi diamubidi mangwoso. Pita lolo akakwela diyi lukanyi diakamwambila Yisu, ene, Buxi butakwela ntala mela abidi, owe unangunyafiana manyafiana asatu. Yi pakakwelayi diyi lukanyi pakabangayi kudila masonci.