MAKU 12 - Disambi Dipyadipya

¹ YI akabanga kubatôyela ku miele. Muntu akakuna kibidi kia finyo, akakidinga kimana, akakwemba lolo kifininu kia finyo, akakwabaka ncibo mule pyô a kitebelelu, yi akakixiya yi bantu ba midimo ya finyo, yi akancuka ku mbata.

² Yi akatuma musadi kudi bena midimo ku kikondo, bixeangatayi manga mamoma kudi bena midimo a kibidi kia finyo.

³ Mo bakamwangata yi bakamukuma, yi bakamupingasa makaci matupu.

⁴ Yi akatuma kabidi munga musadi kudibo ; yi bakamutapa ku mucwe, yi bakamucumbula ncumbu.

⁵ Yi akatuma munga kabidi, yi bakaxipa you ; yi bamo bangi ; bakakuma banga yi bakaxipa banga.

⁶ Akadi ukidi yi mwana umoumwe munangibwi ; yi akamutuma kudibo ku sula ene, Bananemeka mwanami.

⁷ Mo bena midimo baba bakaditôyelafiana ene, You ndo muna mwokito ; cuyi, tumuxipi, yi mwokito unakala ěcu.

⁸ Yi bakamwangata yi bakamuxipa, yi bakamwela kunci kwa kibidi kia finyo.

⁹ Kifiani lolo kinakwenca fumu a kibidi ? Unalwa bumisa bena midimo, yi unapa banga bantu kibidi.

¹⁰ Nonu kanwabala isanga diyi dedi mu mukanda ă Ncembi ? Ene, Dibwe diakanyañana babaki ba ncibo, kadedi diamalwa dibwe dia ku ilunga basodi ;

¹¹ dedi ndo dia Fumu, yi ditani kikamakama ku meso ecu ?

¹² Yi bakapalala kumukwata, yi bakacina kimbukuma ; bwalo bwakalembetelabo ene, amatôya mwele ku bwalo bwabo. Bakamuxiya lolo yi bakancuka.

¹³ Yi bakatuma banga baFalixi kudiyi yi baElodo, bixemukwatabo ku kutôya.

¹⁴ Bakalwa lolo kudiyi yi bakatôya ene, Mweyexi, twalubukwa ene, Owe udi sôsôlwo, yi kusocina muntu umoumwe ; bwalo butasoxixima mumbidi ă muntu, kate weyesa eyesa mwosambu ă Ncembi sôsôlwo. Kwalelekyela yi bwadi ndo kulambula Kyesa milambu ndo kumoni ?

¹⁵ Tulambuli ? sungu katulambudi ? Mo yei akalubukwa mancanga abo, akabatôyela ene, Kukai nungwelekyesa ? Nungucwadili denalio, mumoni.

¹⁶ Yi bakamucwala. Yi akabambila ene, Kieki kifwanisa ndo kia ñani, yi mukanda kulu ? Bakamwambila ene, Kia Kyesa.

¹⁷ Yi Yisu akabapingasa ene, Nulongoli bintu bia Kyesa kudi Kyesa, yi bintu bia Ncembi kudi Ncembi. Yi bakamukamina kamina makamu.

¹⁸ Yi baSaduki bakalwa kudiyi batôya, ene, Kubixibwa kwa bafu kakunako ; yi bakamwapangusa ene,

¹⁹ Mweyexi, Mosese akatufundila ene, Ndo muntu mukulwanci unafwa, amaxiya mukasanci yi kasoxiya mwana, mwakunyenci unangata mukasanci dibakwa yi unalundixila mukulwanci bana.

²⁰ Kwakadi lolo bana ba mama sambwali ; mwamukulu akangata mwamukaxi dibakwa, yi akafwa kutena kuxiya bana.

²¹ Yi you amubidi akamwangata yi akafwa kutena kuxiya bana ; yi mo nako kabidi you amusatu.

²² Yi sambwali bungi bwabo bakadi kabasoxiya bana. Ku sula kwabo kwa bungi bwabo kwakafwa mwamukaxi kabidi.

²³ Ku kwombuludibwa kwa bafu, ku kikondo kinabikabo kabidi, yei unakala mukaxi a ñani yinabo ? Bwalo bwakamwangata mabakwa bungi bwa sambwali.

²⁴ Yi Yisu akabapingasa ene, Ka ku bwalo bobu kunwabunca ? bwalo bunutasolubukwa mukanda ă Ncembi ndo ngulu yenci.

²⁵ Pabikabo kudi bafu, kabasoangata mabakwa yi kabasopebwa mabakwa, kate badi bea bangele munda mwa diulu.

²⁶ Mo bwalo bwa bafu, ene, banabixibwa, kanwabala mu mukanda ă Mosese, ku kikoma kia dibunca, mwakamutôyela Ncembi ene, Meme ndo Ncembi a Abalami, yi Ncembi a Isaka, yi Ncembi a Yakobo ?

²⁷ Yei kiena Ncembi a bafu, kate a bena môyo. Mbwôso nwamabunca kungi.

²⁸ Yi mufundi a mikanda akadi amalwa, amabombwa badi mu kwapangusafiana, akalubukwa ene, Yisu amabapingasa loko, akamwapangusa ene, Mulangu kai udi ku buxi kwa milangu mioso ?

²⁹ Yi Yisu akapingasa ene, Mulangu ă buxi udi ene, Nwombwi, Isalele ; Fumu Ncembi ecu udi Fumu umoumwe ;

³⁰ yi unananga Fumu Ncembi ebe yi mucima ěbe muncimancima, yi kidimu kiebe kincimancima, yi lukanyi lwebe luncimancima, yi ngulu yebe mincimancima.

³¹ Amubidi udi ene, Unananga muna kwebe bea mikyebe. Kakuna munga mulangu ădika yei noku.

³² Yi mufundi a mikanda akamutôyela ene, Kunengela, Mweyexi ; wamatôya diyi dia sôsôlwo. Bwalo budiyi umoumwe ; yi kakuna munga utena yei ;

³³ yi ndo kumunanga yei yi mucima muncimancima, yi lukanyi i luncimancima, yi ngulu mincimancima, yi kunanga muna kwebe bea mikyebe, kwadika bungi bwa malongi moso mosa, yi bixipilu bioso.

³⁴ Yi Yisu, pakamumonayi amapingasa yi bwinu, akamutôyela ene, Owe kuna kulekule yi bufumu bwa Ncembi. Yi kunyuma kwa kikondo kieki, kakwakadi muntu udi yi mucima ă kumwapangusa kabidi.

³⁵ Yi Yisu akakulumuna pakakweyesayi mu tempelo, ene, Bafundi ba mikanda batôya beci ene, Kalistu udi Mwana a Dafidi ?

³⁶ Dafidi mikyenci akatôya mu Mwoxixi a babala, ene, Fumu akatôyela Fumwami ene, Xikama pa kidyo kiamene binakuteka bantu bamatanda yinebe katanda ka makasa ebe.

³⁷ Dafidi mikyenci umwabikila ene, Fumu ; udi lolo mwananci beci ; Yi kimbukuma kinene kiakamwombwa yi kiango.

³⁸ Yi akabatôyela ku kweyesa kwanci ene, Nudimuki bwalo bwa bafundi ba mikanda, bananga kwenda yi mayanga male, yi kunemekyebwa ku mabanca a bisalu,

³⁹ yi nkwasa ya buxi mu bixingidilu, yi bidi bia buxi ku bidyaki ;

⁴⁰ badedya ncibo ya bakaxi ba bafu, yi balomba ndombu milemile bwalo bwa ncimi yabo. Baba banabelebwa lopelo lukola.

⁴¹ Yi Yisu akaxikama ku mpala a kibumbilu kia tempelo, yi akamona mwakakwela bantu mpalata mu kibumbilu ; yi bangi bakadi bena bintu bakakwela mpalata mingi.

⁴² Yi mukasa a mufu akalwa, mwokombi, akakwela momu tumpalata tubidi tudi lwedi lwa kampalata kamokamwe nci.

⁴³ Yi akabikila beyi banci kudiyi, yi akabambila ene, Nwatôyela sôsôlwo ene, Mukasa a mufu you, mwokombi, apwela lwedi lwamadika lwabo bungi, lwa bungi bwabo bamakwela mu kibumbilu ;

⁴⁴ bwalo bwamakwelabo bintu bungi bwabo biakadibo yinabio bingi ; mo yei, ku bokombi bwanci, apwela bintu bioso biakadiyi yinabio ; buncima bwa bintu bienci.