MAKISA 3 - Disambi Dipyadipya

¹ YI Pita yi Yoano bakaya ku tempelo ku ola alombabo, a dibwa.

² Muntu lolo akadi kitumbi pôi difu dia mamanci akacwadibwa, akatekabo dituku dioso ku kibwelelu kia tempelo kiabikidibwa ene, Lwoxixi, ndo kubalomba malongi a mwengo badi mu kubwela munda mwa tempelo ;

³ yei, biakamonayi Pita yi Yoano baxebwela mu tempelo, akalomba dilongi dia mwengp kwangata.

⁴ Pita lolo, akamuxingulula yi Yoano, akatôya ene, Ututebeli.

⁵ Yi akabadingila, amakwenca ndo kwangata kintu kudibo.

⁶ Mo Pita akatôya ene, Mpalata yi ôlo—meme kiena yinayo ; kaninga kintu kidi yinami, kakieki kinkupapa ; ku dina dia Yisu Kalistu a Nasalete, ombuluka, enda.

⁷ Yi akamukwata ku kianca kia kidyo yi akamwombulula, yi makasa anci akasuba mangwoso yi mifwa ya manyungu a mikolo.

⁸ Yei lolo akatamba kulu, akakwemana, akakwenda ; yi akabwela munda mwa tempelo, udi mu kwenda, yi kutamba tamba, yi kutumbisa Ncembi.

⁹ Yi bungi bwa bantu bakamumona udi mu kwenda yi kutumbisa Ncembi ;

¹⁰ yi bakamulembetela udi you akaxikamina malongi a mwengo ku kibwelelu kia Lwoxixi kia tempelo ; yi bakakwolubixibwa makamu yi bowa bwalo bwa kipoma kiakamuponena.

¹¹ Biakabambayi lolo Pita yi Yoano, bungi bwa bantu bakaya mbilu kudibo ku mbalanda abikidibwa ene, a Solomono, badi mu kukama kama bongonco.

¹² Pakamona Pita noku, akakwambila bantu ene, Bena Isalele, kukai nwakamina kintu kieki ? Kukai nutwaxixima kulexi ndo twamamwendesa ku ngulu yecu ndo ku nkwami yecu ?

¹³ Ncembi a Abalami yi a Isaka, yi a Yakobo, Ncembi a batetecu amatumbisa Musadi anci Yisu, unwakalongola nonu, yi nwakamunyañana ku mpala a Pilata, pakadi yei amasambola ene, Apaudibwi.

¹⁴ Kaninga nonu nwakanyañana Muntu a babala yi a nkwami, nwakalomba muntu anupebwi, muxipanani ;

¹⁵ mo nwakaxipa Mupangi a môyo, akabisa Ncembi kudi bafu ; yi coco tudi bena ntôbô.

¹⁶ Yi ku kwetabusa kwa dina dienci, dina dienci diamateka muntu you yi ngulu unwamona, unwalubukwa ; yi kwetabusa kwaku kwapwakala kudiyi, kwamamupa mpinyu yei bô ku mpala yenu ya bungi bwenu.

¹⁷ Nkyekyu lolo, bena kwami, ngwalubukwa ene, nwakakwenca noku yi bwilwa, yi bafumu benu kabidi ;

¹⁸ kaninga Ncembi amafikisa bintu nako biakatôyayi ku buxi ku musuku ă badimuxi boso ene, Kalistu anci uxetata.

¹⁹ Mbwôso nudibeli, nukulumuki, bixencimibwa mabi enu, bixelwa bikondo bia kusubanană ku mpala a Fumu.

²⁰ bixetumayi Yisu Kalistu akanulungikidibwa ku buxi ;

²¹ uxeangata diulu pôi matuku a kipingaxilu kia bintu bioso, kiakatôya Ncembi ku musuku ă badimuxi banci ba babala, pôi kibangilu kia loboko.

²² Mosese akatôya sôsôlwo ene, Fumu Ncembi enu unanubandixila mudimuxi kudi bena kwenu bea mikyemi ; yi nunamwombwela yei ku kintu kioso kinanwambilayi.

²³ Kunakala lolo, muntu mwoso utasokwombwela mudimuxi you unancimibwa dyendeli kudi bantu.

²⁴ Badimuxi boso lolo pôi Samwele, yi bobo bakamulandudila, isanga bantu boso bamatôya, bamasakola kabidi dia matuku aa noku.

²⁵ Nonu nudi bana ba badimuxi yi ba disambi diakasambika Ncembi yi batetecu, bea biakatôyelayi Abalami ene, Kudi mwanebe kunalwangwasanibwa bungi bwa malungu a loboko.

²⁶ Ncembi, pakadi amabisa Musadi anci, amamutuma kunudi buxi, kulwa nulwangwasana pa kunukulumuna muntu mwoso ku bwalo bwenu bubi.