MAKISA 2 - Disambi Dipyadipya

¹ PAKAFIKA dituku dia Pentekosto dyendeli, bungi bwabo bakakokama kidi kimokimwe.

² Yi munda mwa diulu mwakalwa mulaku mangwoso bea luna ngiembi a lupepele, akakwolubisa bungi bwa ncibo akaxikamabo munda.

³ Yi ndimi mipanda yakabamonekyela bea ya mudilu, akaxikama pelu pa muntu mwoso yinabo.

⁴ Yi bakakwolubixibwa bo-a-bwoso yi Mwoxixi a babala, yi bakabanga kutôya yi ndimi minga yakabapa Mwoxixi kusakola.

⁵ Ku Yelusaleme lolo kwakakala bena Yuda, bena nkwami, ba kwa bubila bwoso muxi mwa diulu.

⁶ Mo pakalwa mwoximo ou, kimbukuma kia bantu kiakasangilañana, yi bakakama kama, bwalo bwakabombwa muntu mwoso badi mu kutôya lwanci lubendo.

⁷ Yi bakakama bungi bwabo, yi bakakwelafiana nkanyi ene, Mona, ki bantu boso baba badi mu kutôya badi bena Ngalili ?

⁸ Ape coco twombombwa nako beci, muntu lwanci lubendo, muntu lwanci lubendo, lutwamalelebwa yinalu ?

⁹ Bena Patia, yi bena Mede, yi bena Elama, yi bobo bakala mu Mesopotamia, mu Yudiya, mu Kapadokia, mu Ponto yi Asia,

¹⁰ mu Filingia yi Pamafilla, mu Ecipito, yi mu mbata ya Libya idi pepe yi Kulene, yi bena Loma bakala kunu, yi bena Yuda yi betabusafiani yinabo,

¹¹ bena Kyelete yi bena Alabia,— tubombombwa badi mu kutôya ku ndimi yecu, dia makisa manene a Ncembi !

¹² Yi bakakama boabwoso, bakantunka ntunka, bakakwambilafiana ene, Kifiani kieki ?

¹³ Kaninga banga bakakyeca ene, Bamakwolubixibwa malufu a mwosolo.

¹⁴ Mo Pita, akakwemana yi disangi yi umoumwe, akabandisa diyi dienci yi akabasakolela ene, Bantu ba Yudiya yi bungi bwa bena Yelusaleme, nulubukwi bwalo bobu, yi nwombwi meyi amene ;

¹⁵ bantu baba kabasokwolubilañana malufu, anwakanyakanya nonu, bwalo butani nkyekyu ola amusatu a munyinya ;

¹⁶ kate nako ndo diyi diakatôyebwa kudi mudimuxi Yoele, ene,

¹⁷ Ncembi ene, Ku matuku a nyuma nakupangulula Mwoxixi amene kulu kwa munyu mwoso ; yi bana benu ba babalumi yi ba babakaxi banadimusa, yi mapulwa enu anamona bintu mu tulu, yi babakulu benu banalota melu ;

¹⁸ ya, nakupangulula Mwoxixi amene pa basadi bamene isanga ba babalumi yi ba babakaxi ku matuku yia, yi banadimusa.

¹⁹ Nakuteka lolo bikamakama mu diulu kulu, yi bilayixilu pa loboko muxi ; yi maxi, yi mudilu, yi munyinga ă mudilu ;

²⁰ diba dinakulumunibwa ku mwedima, yi ngondo ku maxi, buxi bulolwa diba dia Fumu, dedi dinene dia dikai bongonco.

²¹ Kunakala lolo, muntu mwoso abila dina dia Fumu, unapandixibwa.

²² Bena Isalele, nwombwi meyi aa : Yisu a ku Nasalete, muntu akakwalakanibwa ku mpala yenu kudi Ncembi ku makisa a ngulu, yi ku bikamakama, yi ku bilayixilu, biakakwenca Ncembi kudiyi pakacikaci penu, binwalubukwa mikyenu—

²³ You, akalongolebwa yi lukanyi lutasopeteyebwa yi kilubukilu kialubukibwa buxi kia Ncembi, nonu pako nwakakopeka ku nkulusu ku bianca bia boni, yi nwakamuxipa.

²⁴ Mo Ncembi akamubisa, akalebesa bipekye bia lufu, bwalo butalubukwayi kubambibwa kudilu.

²⁵ Bwalo bwakatôya Dafidi ku bwalo bwanci ene, Nakadingila Fumu matuku moso ku mpala amene ; bwalo budiyi ku kidyo kiamene bintaxenyingixibwa.

²⁶ Mbwôso mucima ămene ămaxekyelela, yi ludimi lwamene lwamakwembikisa ; yi munyu ămene kabidi unakala yi mudingidilu,

²⁷ bwalo kunaxiya kidimu kiamene munda mwa Adese, kunabolesa Muntu ebe a babala pwanci.

²⁸ Wakangulubukisa ncila ya môyo, unangwolubisa kiango bwalo bwa mpala ebe.

²⁹ Bena kwecu, mbenusakolela bimpe dia mwamukulu Dafidi, ene, akafwa yi akancikibwa, yi lukita lwanci ludi yinecu pôi dituku dedi.

³⁰ Bwalo bwakakalayi lolo mudimuxi, akalubukwa Ncembi amateya yinanci kiteyi pa kuteka mwana a makondu anci kulu kwa lukwasa Iwanci,—

³¹ yei, bwalo bwakalubukwayi buxi, akatôya dia kwombuluka kwa Kalistu, ene, akadi kasokadeyebwa mu Adese, yi munyu ănci ăkadi kasobola pwanci pwanci.

³² You Yisu—Ncembi akamubisa, utwamamutôbôlela ntôbô, bungi bwecu.

³³ Mbwôsô biamabandixibwayi kulu ku kianca kia kidyo kia Ncembi, biamangatayi lolo kudi Tete kilaka kia Mwoxixi a babala, ndo biamapangululayi noku bea binwamona yi binwombombwa.

³⁴ Bwalo butaximunini Dafidi munda mwa melu kulu, mo mikyenci amatôya ene, Fumu akatôyela Fumwami ene, Xikama ku kidyo kiamene,

³⁵ binakuteka bantu batanda yinebe katanda ka makasa ebe.

³⁶ Mbwôso bungi bwa nkumbu ya Isalele balubukwi sôsôlwo ene, Ncembi amateka Yisu you unwakakopeka ku nkulusu yi Fumu yi Kalistu.

³⁷ Pakakwombwabo lolo, bakatubudibwa ku mucima, yi bakatôyela Pita yi banga batumibwi ene, Tunakwenca kai, bena kwecu ?

³⁸ Yi Pita akabambila ene, Nudibeli, nunumeyebwi, muntu mwoso enu mu dina dia Yisu Kalistu, ku kulekyelebwa kwa mabi, yi nunangata dilongi dia Mwoxixi a babala.

³⁹ Bwalo budi kilaka ku bwalo bwenu, yi bwa bana benu, yi bwa bantu boso badi kulekule, bantu boso bakyeba Fumu Ncembi ecu kubabikila.

⁴⁰ Yi akatôbôla amo meyi mangi, yi akababondabonda ene, Nupandixibwi mwociya ou ă kwona.

⁴¹ Mbwôso bobo bakangata diyi dienci dyendeli bakanumeyebwa, yi ku dituku dedi kwakabodeyebwa bantu bea nkone isatu.

⁴² Yi bakaxina mwoxinu bô yi kweyesa kwa batumibwi, yi busangilañani bwabo ; yi kunyowa kwa mampa, yi ndombu.

⁴³ Yi bowa bwakakwata muntu mwoso, yi bikamakama bingi yi bilayixilu biakakwencebwa kudi batumibwi.

⁴⁴ Yi bungi bwabo bakakwetabusa bakadi kidi kimokimwe yi bakakwabanyañana yi bintu,

⁴⁵ yi bakakwodisa madidi abo, yi bima biabo, yi bakabilongola kudi bantu boso oka akadi muntu mwoso yi bokombi.

⁴⁶ Ku diba dioso lolo kwakakalabo mu tempelo yi lukanyi lumolumwe, yi bakanyowa mampa mu ncibo, yi bakangata bidya biabo yi kiango yi mucima utena buluba,

⁴⁷ badi mu kutumbisa Ncembi, yi bakadi yi makasa anengela ku mpala ya bungi bwa bantu ; yi Fumu akasangisa bantu ku dituku ku dituku badi mu kupandixibwa.