MAKISA 19 - Disambi Dipyadipya

¹ PAKADI Apolo utani ku Kolinti, Paulu akadika mu mbata ya ku mukunci, akalwa ku Efeso, yi akasañana banga beyi.

² Akabambila lolo ene, Nonu nwakangata Mwoxixi a babala panwakakwetabusa ? Yi bakamwambila ene, Katwombweli isanga ndo Mwoxixi a babala udiko.

³ Yei ene, Ku kiñani lolo ndo kunwakanumeyebwa ? Bobo ene, Ku kunumeya kwa Yoano.

⁴ Paulu akatôya ene, Yoano akanumeya yi kunumeya kwa kudibela, akakwambila bantu ene, betabuxili you ulolwa kunyuma kwanci, isanga Yisu.

⁵ Yi pakakwombwabo nako, bakanumeyebwa ku dina dia Fumu Yisu.

⁶ Pakadi Paulu amabaka bianca bienci kulu kwabo, Mwoxixi a babala akabalula, yi bakatôya yi ndimi, yi bakadimusa.

⁷ Yi bakadi ku bungi, bea bantu disangi yi babidi.

⁸ Yi akabwela munda mwa kixingidilu yi akatôya yi mucima pa lwedi lwa ngondo isatu, udi mu kwambila yi kubondabonda dia bintu bia bufumu bwa Ncembi.

⁹ Kaninga pakasuba banga yi bakanyañana, badi mu kutôya bubi dia Ncila ku mpala ya kimbukuma, yei akancuka kudibo, yi akanamuna beyi, udi mu kwambila ku dituku ku dituku mu sikulu a Tilano.

¹⁰ Kwakasala noku pa lwedi lwa mbula ibidi, biakakwombwa diyi dia Fumu bungi bwa bantu bakakala mu Asia, yi bena Yuda yi bena Ngiliki.

¹¹ Yi Ncembi akakwenca makisa a ngulu manene manene ku bianca bia Paulu,

¹² biakacwadibwa ku mumbidi ănci bitambala yi bilamba kudi batati ba masama, yi masama akancuka kudibo, yi bidimu bibi biakapauka.

¹³ Kaninga banga bena Yuda ba ngendo, babuki, bakadibandisa mikyeabo, bakatamba dina dia Fumu Yisu kulu kwabo kwa bantu bakadi yi bidimu bibi, ene, Nwatôyela kudi Yisu amasakolela Paulu.

¹⁴ Kwakadi lolo bana sambwali ba Sekyefa, muna Yuda, bokanda bunene, bakakwenca noku.

¹⁵ Yi kidimu kibi kiakapingasa, kiakabatôyela ene, Ngwalembetela Yisu, yi ngwalubukwa Paulu ; kaninga nonu nudi bañani ?

¹⁶ Yi mwamulumi you akadi yi kidimu kibi munda akatamba kulu kwabo, yi akabapidila bubidi bwabo, yi akabadika bumanya, biakacinabo kunci kwa ncibo you, mataka, bamatapibwa mbuta.

¹⁷ Yi diembi dedi diakalubukibwa kudi bantu boso, yi bena Yuda yi bena Ngiliki, bakakala ku Efeso ; yi bowa bwakabaponena bo-a-bwoso, yi dina dia Fumu Yisu diakatumbixibwa.

¹⁸ Bantu bangi bakalwa kabidi, bakadi bamakwetabusa, badi mu kusakola yi kwebesa makisa abo.

¹⁹ Yi bantu bangi bakalwa bakakwekyela yi makisa a Iwomonyi, bakasangisa mikanda yabo kidi kimokimwe, yi bakayosa ku meso a bantu boso ; bakabala lolo diso diayo, bakadisañana masangi atano a nkone ya mpalata.

²⁰ Ku ngulu ya noku kwakalunda diyi dia Fumu yi ngulu, diakadika bumanya.

²¹ Pakapwa lolo bintu bebi, Paulu akadi yi lukanyi mu mucima ănci lwa kuya ku Yelusaieme, bixeakalayi amatanga Makyedonia yi Akaya, ene, Binakala namaya koku, nxemona Loma kabidi.

²² Yi pakadi amatuma babidi mu Makyedonia ba bantu bamamusadila, Timoteo yi Elasto, mikyenci akabesala mu Asia kakondo.

²³ Yi pa kikondo kieki pakalwa muyengi mungi bwalo bwa Ncila.

²⁴ Bwalo bwa muntu umoumwe, dina dienci ene, Demetilio, mutudi a mpalata, akapanga bifwanisa bia kipiko kia mpalata bia ncibo a Atemisi, akafikixila bena bwanya midimo mingi ;

²⁵ yei akabasangisa, yi basadi bakasala ku midimo ya noku, yi akatôya ene, Babalumi, nwalubukwa ene, ku mudimo ă noku ndo kulolwa bima biecu.

²⁶ Nwamona lolo yi nwombombwa, kumoni kunu ku Efeso kutupu, kate ku bungi bwa Asia, kwamakwetabuxisa Paulu you bantu bangi, yi amabakulumuna, udi mu kutôya ene, bobo kabena bancembi bamapangibwa ku makaci.

²⁷ Mbwôso bwalo kabuna bwa mudimo cu butupu, ambeci unalwa tamunibwa, kate ambeci tempelo a Atemisi kabidi, Ncembi munene a babakaxi, unalwa kixibwa, yei unabyekolebwa isanga ku bunene bwanci, axingila bungi bwa Asia yi bwa loboko.

²⁸ Yi pakakwombwabo noku, bakawolubila bisusu, yi bakakwamena ene, Udi yi bunene ndo Atemisi a bena Efeso.

²⁹ Yi bula bwakakwolubixibwa muyengi, yi bakaya mbilu bo-a-bwoso kuya mu ncibo a Teata, pakadi bamakwata Ngayo yi Alistako, bena Makyedonia bamasangila yi Paulu ku lwendo.

³⁰ Yi pakakyeba Paulu kuya bwela i munda mwakadi bantu, beyi kabamubwexeli ;

³¹ banga lolo, milopwe minene ya Asia, bakadi bimbila bienci, bakatuma kudiyi, bakamubondabonda kadiedi mikyenci munda mwa ncibo a Teata.

³² Mbwôso banga bantu bakakwamena diyi dimodimwe, yi banga bakakwamena dinga, bwalo bwakadi kimbukuma muyengi mutupu : yi bantu bakadika bungi bakadi kabasolubukwa ku bwalo kai ndo kwamasangilabo.

³³ Kaninga banga bakadikisa Alesanda ku buxi bwa kimbukuma, yi bena Yuda bakamuxindika noku. Alesanda lolo akasonga kianca, uxekwamina bantu dikwami.

³⁴ Kaninga pakamulembetelabo udi muna Yuda, bakakwamena bungi bwabo yi diyi dimodimwe pa Iwedi lwa ola ibidi ene, Udi yi bunene ndo Atemisi a bena Efeso.

³⁵ Yi pakadi muna mikanda ya bula amapolesa bantu, akatôya ene, Bena Efeso, muntu kai udiko utasolubukwa mwapwakala bula bwa bena Efeso munami a tempelo a Atemisi munene, yi a kifwanisa kiakapona kudi Seusu.

³⁶ Mbwôso bwalo butasokwelexebwa bintu bebi mbata, nuxeakala polo, kumoni kukisa bintu bukisakisa.

³⁷ Bwalo bunwamacwala bantu baba, batasoakala ndo basanci ba tempelo ndo batangodi ba Ncembi ecu a babakaxi.

³⁸ Mbwôso ndo Demetilio yi bena bwanya batani yinanci bapwangata yi muntu mwoso bwalo, matuku adiko a bimu, yi milopwe idiko ; banasanyañana.

³⁹ Kaninga ndo nwamakwapangusa dia manga malo, asambolebwi mu kikokye kia loko.

⁴⁰ Bwalo ambeci tunakwombwa bwalo ku mucwe ă muyengi ă dituku dedi utena yi dicina ; yi katunakala yi diyi dioso kusakola bwalo bwa kimbukuma kieki.

⁴¹ Pakadi amatôya noku, akakatola kikokye.