MAKISA 15 - Disambi Dipyadipya

¹ YI kanga bantu bakalwa mu Yudiya, yi bakakweyesa bakunyi, ene, Kutena nwamakwelebwa bwadi luna bidi mwosambu ă Mosese, kanunalubukwa kupandixibwa.

² Pakalwa lolo mpeto yi mbata mungi yinabo kudi Paulu yi Banabasa, bakalungika ene, Paulu yi Banabasa yi banga bena kwabo, bayi ku Yelusaleme kudi batumibwi yi babakulu, dia bwalo bobu.

³ Mbwôso bobo bakaxindikixibwa mu ncila abo kudi kikokye bakatanga Finiki yi Samalia, badi mu kwambila dia kukulumuka kwa mabila. Yi bakafikisa kiango kingi kudi bungi bwa bakunyi.

⁴ Pakafikabo ku Yelusaleme, bakaxekyelelebwa kudi kikokye, yi batumibwi, yi babakulu, yi bakakwambila bintu bioso biakakwenca Ncembi yinabo.

⁵ Kaninga banga ba butonga bwa baFalixi bakakwetabusa, bakakwemana, ene, Baxebela bwadi, baxebatôyela ene, banami bwadi bwa Mosese.

⁶ Yi batumibwi yi babakulu bakasangila ndo kwela bwalo bobu nkanyi.

⁷ Pakadi lolo mbata yamakwelexebwa bongonco, Pita akakwemana, akabambila ene, Bena kwami, nwalubukwa ene, Pôi matuku a buxi pakasungula Ncembi kunudi, ene, ku musuku ămene kuxekwombwa mabila diyi dia losangu lunengela, bixekwetabusabo.

⁸ Yi Ncembi alubukwa micima, akabatôbôlela ntôbô, akabapa Mwoxixi a babala bea mikyecu kabidi,

⁹ yi akadi kasotuxiyañanisa yinabo pô, akakusula micima yabo ku kwetabusa.

¹⁰ Mbwôso kukai nwamakwelekyesa Ncembi nkyekyu, yi kuteka mwosangi pa xingu a beyi, utabiyi ndo batetecu ndo mikyecu kucwala ?

¹¹ Kate twamakwetabusa ene, tunapandixibwa môyo ku lwoxixi lwa Fumu Yisu, mupandixilu yinabo umoumwe.

¹² Yi bungi bwa kibumbu bakapudikila ; yi bakakwombwa Banabasa yi Paulu bakatôya dia bilayixilu yi bikamakama biakakwenca Ncembi kudibo kudi mabila.

¹³ Yi pakadi bamalekyela, Yakobo akakulumuna ene, Bena kwami, nungwombwi ;

¹⁴ Ximono aputôya mwakadingila Ncembi mabila ku buxi buxi, ndo kusokola bantu kudibo bwalo bwa dina dienci.

¹⁵ Ku bwalo bobu kwamafwanañana meyi a badimuxi, bea biakafundibwa ene,

¹⁶ Kunyuma kwa bintu bebi nakupiñana, yi nakwabaka kabidi ncibo a Dafidi amabunduka, yi nakwabaka kabidi bisasa bienci, yi nakumwemanika,

¹⁷ bixepalalabo Fumu bamasala, yi bungi bwa mabila badi yi dina diamene diamatambibwa kulu kwabo. Fumu ndo atôya noku, encenca bintu bebi,

¹⁸ biamalubukibwa pôi bubangabanga bwa loboko.

¹⁹ Mbwôso meme ngwasambola ene, Katutepexi bantu ba mabila bamakulumuka kudi Ncembi ;

²⁰ kate tubafundili ene, bancili mbindu ya ngixi, yi diendela, yi nyama yamafinibwa xingu, yi maxi.

²¹ Bwalo budi Mosese yi bantu ku bula bwoso bamwambidila, pôi mieciya ya kalikali, amabadibwa ku bixingidilu ku diba dioso dia sabado.

²² Ku kikondo kieki kwakamonebwa loko kudi batumibwi, yi babakulu, yi bungi bwa kikokye, kusungula bantu ba mu kibumbu kiabo, ndo kubatuma ku Antioko yi Paulu yi Banabasa : Yudaxi abikidibwa ene, Basaba, yi Silasa, bantu banene ba bakunyi ;

²³ yi bakatuma mukanda ku makaci abo, ene, Batumibwi yi babakulu kudi bakunyi ba mabila ba mu Antioko yi mu Silia yi mu Kilikia, môyo.

²⁴ Bwalo butwamakwombwa ene, banga bamabatuka kutudi bamanutepesa yi meyi, bamapeteya micima yenu, batutatôyeli nako pô ;

²⁵ kwamamonebwa loko kutudi, bitwamakwetabusañana cu-a-bwoso, kusungula bantu, kunutuminabo yi banangibwi becu, Banabasa yi Paulu,

²⁶ bantu bamalongola mieyo yabo ku mucwe ă dina dia Fumwecu Yisu Kalistu.

²⁷ Mbwôso twaputuma Yudaxi yi Silasa, bananwambila bintu bebi kabidi mikyeabo ku diyi dia musuku.

²⁸ Bwalo bwamamonebwa loko kudi Mwoxixi a babala yi kutudi, kumoni kunwombuludisa bunga buxitu, butena bintu bebi bia buxitu ;

²⁹ ene, nuncili bintu biamalongolebwa kudi ngixi, yi maxi, yi nyama amafinibwa xingu, yi diendela ; aka nudianamuna mikyenu kudibio, nunakwenca loko. Nusali polo.

³⁰ Mbwôso bobo, pakalekyelebwabo, bakapweka ku Antioko ; yi pakadi bamakokyeya kibumbu, bakalongola mukanda.

³¹ Yi pakadi bamaubala bakaxekyelela kibondelu.

³² Yudaxi lolo yi Silasa, bakadi badimuxi mikyeabo kabidi, bakabondabonda bakunyi yi meyi mangi, yi bakabakolesa.

^33-34 Yi pakadi bamadikisa kikondo koku, bakalekyelebwa yi polo kudi bakunyi bayi kudibo bakabatuma.

³⁵ Kaninga Paulu yi Banabasa bakasala mu Antioko, badi mu kweyesa yi kwambila diyi dia Fumu, yi bamo bantu kabidi bangi.

³⁶ Kaninga kunyuma kwa matuku mabende, Paulu akatôyela Banabasa ene, Tupiñani nkyekyu kuya dingila bakunyi ku bula bwoso kutwamakwambila diyi dia Fumu, mwakalabo.

³⁷ Yi Banabasa akakisa ene, bacwali yinabo Yoano kabidi abikidibwa ene, Maku ;

³⁸ kaninga Paulu akakwenca ene, kumoni loko kumucwala yinabo, you akabakadeya mu Pamafilia, yi kayili yinabo ku mudimo.

³⁹ Mbwôso mbata yakakwelexebwa mungi mungi, biakanamukananabo ; Banabasa lolo akacwala Maku yi akaya lwa kibusu ku Kupuloso ;

⁴⁰ mo Paulu akasungula Silasa, yi akaya, amalongolebwa kudi bakunyi ku lwoxixi lwa Fumu.

⁴¹ Yi akatanga Silia yi Kilikia, udi mu kukolesa bikokye.