LUKA 9 - Disambi Dipyadipya

¹ YI akabikila disangi yi babidi kidi kimokimwe yi akabapa ngulu yi bumanya kulu kwa bidimu bibi bioso, yi bwa kupandisa bantu masama.

² Yi akabatuma bayi ambila bantu dia bufumu bwa Ncembi, yi bapandisi batati ba masama.

³ Yi akabatôyela ene, Kanucwadi kintu bwalo bwa lwendo, ndo mulangala, ndo mwosokye, ndo bidya, ndo mpalata ; yi kanwakadi yi binkutu bibidi.

⁴ Yi mu ncibo mwoso munwabwela, nusali momu, yi nubatuki momu.

⁵ Yi bantu boso batasonwangata, binwancuka mu bula bobu nudikupululi yimbwi ya ku makasa enu ndo kubatôbôlela ntôbô.

⁶ Yi bakancuka yi bakatanga mala moso, badi mu kwambila losangu lunengela, yi kubancincidisa ku bidi bioso.

⁷ Yi Elodo Tetelaka akakwombwa dia bintu bioso biakakwencebwa, yi akantunka ntunka bwalo bwakatôyebwa kudi banga bantu ene, Yoano amabixibwa kudi bafu ;

⁸ yi kudi banga ene, Eliya amamoneka ; yi kudi banga ene, Munga mudimuxi a kalikali amakwombuluka kudi bafu.

⁹ Yi Elodo akatôya ene, Bwalo bwa Yoano, meme nakamuxaka mucwe ănci, kaninga you udi nani, ungwombombwa bintu bia noku ku bwalo bwanci ? Yi akapalala kumumona.

¹⁰ Yi batumibwi pakapiñanabo bakakwambila dia makisa moso akakisabo. Yi akabangata yi akancuka ku busoko ku bula bwabikidibwa ene, Betesaida.

¹¹ Kaninga bimbukuma bia bantu bakalubukwa, yi bakamulanda ; yi akabaxekyelela, yi akabatôyela dia bufumu bwa Ncembi, yi bobo baxepandixibwa, akabapandisa.

¹² Mo diba diakabanga kuxekaxeka ; yi disangi yi babidi bakalwa yi bakamutôyela ene, Ncula bantu bayi ku tula tubende yi ku mbata udi pepe, balali, bangati bidya, bwalo butudi kunu ku kidi kitani kanana.

¹³ Mo akabatôyela ene, Nonu nubapi, badi. Yi bobo ene, Katuna yi binga bidya bioso bitena mampa atano, yi yixi ibidi, kutena coco twamaya odila bantu baba boso bidya.

¹⁴ Bwalo bwakadibo babalumi bea nkone itano. Yi akatôyela beyi banci ene, Nubaxikiki bibumbu bibumbu, masangi atano masangi atano.

¹⁵ Yi bakakwenca nako, yi bakabaxikika bungi bwabo.

¹⁶ Yi akangata mampa atano yi yixi ibidi, yi akasangola meso anci kulu, yi akabilwangwasana yi akabinyowa. Akapa lolo beyi ndo kuteka ku mpala ya bantu.

¹⁷ Yi bakadya bungi bwabo yi bakakwokuta, yi bicini biakabasadila biakakwongudibwa bibata disangi yi bibidi tô.

¹⁸ Yi pakadiyi mu kulomba mikyenci mutupu, beyi bakadi yinanci, yi akabapangusa ene, Bantu batôya beci ku bwalo bwamene, ndi ñani ?

¹⁹ Yi bakapingasa ene, Yoano munumeyi ; mo banga ene, Eliya ; yi banga ene, Mudimuxi a kalikali amakwombuluka kudi bafu.

²⁰ Yi akabatôyela ene, Ape nonu, nonu nwatôya beci ku bwalo bwamene, ndi ñani ? Yi Pita akapingasa ene, Kalistu a Ncembi.

²¹ Kaninga akabatôyela yi akabalanga kabambidi muntu mwoso bwalo bobu,

²² ene, Mwana a Muntu udi yi bwalo bwa kutata bintu bingi, yi bwa kunyananibwa kudi babakulu yi kudi makanda manene yi kudi bafundi ba mikanda, yi bwa kuxipibwa, yi bwa kubixibwa ku dituku diamusatu.

²³ Yi akabatôyela bungi bwabo ene, Ndo muntu mwoso akyeba kungulandudila, adinyanani mikyenci, acwali nkulusu anci ku dituku ku dituku, angulandudili.

²⁴ Bwalo bwa muntu mwoso akyeba kupandisa môyo ănci unauncimisa ; mo muntu mwoso unancimisa môyo ănci ku mucwe ămene unaupandisa.

²⁵ Muntu amatetowa kiñani ndo amangata loboko luncimancima yi amadincimisa, ndo amadibwa mikyenci ku bwalo ?

²⁶ Bwalo bwa muntu mwoso unangwombwela meme bundu, yi meyi amene bundu, Mwana a Muntu unamwombwela yei bundu palolwayi yi dikai dienci mikyenci yi dia Tete yi dia bangele ba babala.

²⁷ Mo nwatôyela sôsôlwo ene, Banga badiko bamakwemana kunu batasokikisa lufu pô buxi bwamamonabo bufumu bwa Ncembi.

²⁸ Yi Iwedi lwa matuku yenana kunyuma kwa meyi aa kwakacwalayi yinanci Pita yi Yoano yi Yakobo, yi akabanda mu lupongo kuya lomba.

²⁹ Yi pakalombayi, mumbidi ă mpala anci ăkatulowa yi bilamba bienci biakapiluka susu yi obo kaikai.

³⁰ Yi mona, babalumi babidi bakatôya yinanci bakadi Mosese yi Eliya ;

³¹ bakamoneka mu dikai, yi bakatôya dia kibatukilu kienci kixebatukayi ku Yelusaleme.

³² Mo Pita yi bobo bakadi yinanci bakapungila yi tulu ; mo pakadi bamabika loko, bakamona dikai dienci, yi babalumi babidi bamakwemana yinanci.

³³ Yi pakadi batanancuka kudiyi, pakatôyela Pita Yisu ene, Fumu, kudi kunengela coco kwakala kunu ; tukisi bitanda bisatu, kimo kiebe, kimo kia Mosese, yi kimo kia Eliya ; kutena kulubukwa mwakatôyayi.

³⁴ Mo pakadi utanatôya meyi aa, pakalwa dibaxi diakabancibika ; yi bakacina pakabwelabo mu dibaxi ;

³⁵ yi munda mwa dibaxi mwakalwa diyi ene, You ndo Mwanami musungudibwi ; numwombwi yei.

³⁶ Yi pakadi diyi diamalwa, Yisu akasananibwa mikyenci mutupu. Yi bakapudikila, yi bakadi kabasokwambila muntu mwoso dia bintu biakamonabo.

³⁷ Yi ku dituku dia mankyelo, pakapwekabo ku lupongo, kimbukuma kinene kiakapomana yinanci.

³⁸ Yi mona, mwamulumi a mu kimbukuma akakwamena diyi ene, Mweyexi nkwalomba, tebelapo mwanami ; bwalo budiyi mwanami umoumwe a ditôi ;

³⁹ yi mona, kidimu kibi kimwakwata, yi yei amena mangwoso, kimwanyenga lolo bianculayi mpulolu ku musuku, yi kimwaxiya mo bikyebikye panakala kiamamuntuntula ntuntu.

⁴⁰ Yi nakalomba kudi beyi bebe bakipauli, yi bakadi kababiyi.

⁴¹ Yi Yisu akapingasa ene, Mwociya utena kwetabusa, ămaungaunga, nakwakala yinenu yi nakwekyela yinenu kikondo kia beci ? Cwala mwanebe kunu.

⁴² Mo pakadi udi mu kulwa, kidimu kiakamuntuntula paxi, yi kiakamunyenga kunyenga kwa bubi. Yi Yisu akakama kidimu kia mbindu dikamu, yi akapandisa mwana, yi akamupingasa kudi tetenci.

⁴³ Yi bungi bwabo bakakamina dikai dia bunene bwa Ncembi. Yi pakadi bantu boso badi mu kukamina bintu bioso biakakwenca Yisu, akatôyela beyi banci ene,

⁴⁴ Meyi aa noku akiteli mu macu enu. Bwalo bunalongolebwa Mwana a Muntu ku makaci a bantu.

⁴⁵ Mo bobo bakadi kabasolubukwa diyi dedi, yi diakabasokokyebwa bitaxedilembeteiabo ; yi bakacina kumwapangusa bwalo bwa diyi dedi.

⁴⁶ Yi mbata akakwelexebwa kudibo dia nani yinabo uxedika bunene.

⁴⁷ Mo Yisu, pakamonayi mbata a micima yabo, akangata mwana mubende, yi akamuteka padiyi ;

⁴⁸ yi akabatôyela ene, Muntu mwoso unangata mwana you mubende mu dina diamene ungwangata meme ; yi muntu mwoso unangwangata meme amangata you akangutuma. Bwalo you udi yinenu bungi bwenu adika bubende, kayou udi munene.

⁴⁹ Yi Yoano akakulumuna ene, Fumu, twakamona muntu udi mu kupaula bidimu bibi mu dina diebe, yi twakamukanda bwalo butasosangilayi yinecu.

⁵⁰ Mo Yisu akamutôyela ene, Kanumukandi, bwalo you utasotanda yinenu udi muna kwenu.

⁵¹ Yi pakadi matuku adi mu kudika axeangacibwayi kulu, akasubisa mpala anci bô ndo kuya ku Yelusaleme.

⁵² Yi akatuma mikyenci ku buxi bwanci. Yi bakaya yi bakabwela mu bula bwa bena Samalia bixemulungikilabo kidi.

⁵³ Yi bakadi kabasomwangata, bwalo bwakadi mpala anci bea ndo kuya ku Yelusaleme.

⁵⁴ Yi pakamona Yakobo yi Yoano, beyi banci, noku, bakatôya ene, Fumu, Owe wananga tuxebikila mudilu ăpweki ku diulu, ăbosi nya ?

⁵⁵ Kaninga akakulumuka yi akabakama dikamu.

⁵⁶ Yi bakaya ku bunga bula.

⁵⁷ Yi pakakwendabo mu ncila, muntu akamutôyela ene, Nakukulanda kwoso kuyeya.

⁵⁸ Yi Yisu akamutôyela ene, Mibwabwa idi yi mena, yi nyonyi ya kulu idi yi maswa ; kaninga Mwana a Muntu kiena yi kidi kia kaladika mucwe ănci.

⁵⁹ Yi akatôyela munga muntu ene, Ungulandudili. Mo yei ene, Fumu, ungulekyeli, nceya buxi kuya ncika tetemi.

⁶⁰ Kaninga akamutôyela ene, Xiya bafu banciki bafu babo mikyeabo ; mo yaka owe yaambili bantu dia bufumu bwa Ncembi.

⁶¹ Yi munga kabidi akatôya ene, Nakukulandudila Fumu, kaninga ungulekyeli buxi, nceya bela môyo badi ku ncibo amene.

⁶² Mo Yisu akamutôyela ene, Kakuna muntu ndo amabaka kianca kienci ku lukasu yi amatebela kunyuma, amalelekyela yi bufumu bwa Ncembi.