LUKA 24 - Disambi Dipyadipya

¹ MO ku dituku dia buxi dia lumingu, ku butwatuku pexe, kwakalwabo ku lukita, badi mu kucwala manonu akalungikabo.

² Yi bakasañana dibwe diamabunguluxibwa ku lukita.

³ Yi bakabwela munda yi kabasañana mumbidi ă Fumu Yisu.

⁴ Yi pakantunka ntunkabo ku bwalo bobu, mona, babalumi babidi bakakwemana padibo, badi yi bilamba bia obo kaikai.

⁵ Yi pakacinabo bowa yi bamakwenama mpala ku loboko bakabambila ene, Kukai nwapalala you udi yi môyo pakacikăci pa bafu ?

⁶ Kiena kunu, kate amabixibwa ; nweli nkanyi mwakanutôyelayi pakadi utani mu Ngălili

⁷ ene, Mwana a Muntu uxelongolebwa ku makaci a bantu babi, uxekopekyebwa ku nkulusu, yi uxekwombuluka kabidi ku dituku diamusatu.

⁸ Yi bakakwela meyi anci nkanyi ;

⁹ yi bakapinana ku lukita, yi bakakwambila bintu bebi bioso kudi batumibwi disangi yi umoumwe, yi kudi banga beyi boso.

¹⁰ Bakadi lolo Mali a Mangadala, yi Yoana, yi Mali Yakobo mamanci ; yi banga babakaxi yinabo, bakakwambila batumibwi bintu bebi.

¹¹ Yi meyi aa akadi ku meso abo bea luna tufumu twa kanana, yi bakadi kabasobetabuxila.

¹² Mo Pita akakwemana yi akaya lubilu ku lukita ; yi akakwenama yi akamona mbuxa ya susu mitupu ; yi akaya kunci, udi mu kukamina malo akapona.

¹³ Yi mona, babidi babo bakadi mu kwenda dituku dedi ku bula bwabikidibwa ene, Emausu, budi Iwedi lwa “ stadia ” masangi asatu ku Yelusaleme.

¹⁴ Yi bakakwambilañana dia malo aa moso akapona.

¹⁵ Yi pakadibo mu kutôyañana yi mu kwapangusañana, pakakokyela Yisu mikyenci pepe yi akakwenda yinabo.

¹⁶ Mo meso abo akaximbibwa bitaxemulubukwabo.

¹⁷ Yi akabatôyela ene, Malo aa adi beci anwatôyelañana binwendenda ? Yi bakakwemana yi buxitu ku mpala.

¹⁸ Yi umoumwe, dina dienci ene, Kyeleopasa, akamupingasa ene, Owe wamasala mu Yelusaleme mikyebe mutupu kutena kulubukwa bintu biamapona koku matuku aa ?

¹⁹ Yei akabapangusa ene, Malo kai ? Yi bakamwambila ene, Malo a Yisu a Nasalete, akadi mudimuxi yi ngulu ku makisa yi ku meyi ku mpala a Ncembi yi ku mpala a bungi bwa bantu ;

²⁰ yi mwakamulongola makanda manene yi bantu becu banene ndo kubelebwa lopelo lwa kufwa ; yi mwakamuxipabo.

²¹ Kaninga coco twakadingila ene, Yei ndo you uxepikula bena Isalele. Kate lolo lelo ndo dituku diamusatu kunyuma kwamapona malo aa.

²² Yi kabidi banga babakaxi ba kibumbu kiecu baputukamisa, bapuya ku lukita ku butwatuku pexe ;

²³ yi pakadi kabasosañana mumbidi ănci bapulwa ene, bamamona kabidi kimonenu kia bangele baputôya ene, Udi yi môyo.

²⁴ Yi banga bena kwecu bakadi yinecu bapuya ku lukita, yi bapulusafiana mo nako bea biaputôya babakaxi ; mo bakadi kabasomumona yei.

²⁵ Yi akabatôyela ene, Bena bwilwa, badi yi bompoci pa kwetabuxila bintu bioso biamatôya badimuxi.

²⁶ Ka Kalistu uxetata bintu bebi yi uxebwela mu dikai dienci ?

²⁷ Yi akabangola pa Mosese yi pa badimuxi boso yi akabasakolela malo moso mu mukanda ă Ncembi ku bwalo bwanci mikyenci.

²⁸ Yi bakakokyela pepe yi bula buxeyabo ; yi yei akakwenca bea ndo kuya lunga lutambu ku buxi.

²⁹ Yi bakamubamba ene, Sala yinecu bwalo budi pepe yi bwelu, yi diba ditanalanda kubwela. Yi akabwela ndo kusala yinabo.

³⁰ Yi pakadi udi mu kuxikama ku bidya yinabo akangata dimpa, akadilwangwasana, yi pakadi amadinyowa, akabapadio.

³¹ Yi meso abo akadipudibwa yi bakamulembetela ; yi akancimina ku meso abo.

³² Yi bakatôyelañana ene, Ki mucima ěcu ăkadi mu kunyungula munda mwecu, biaputôyayi yinecu mu ncila, yi biaputudipudilayi mukanda ă Ncembi ?

³³ Yi bakakwemana ku ola you, yi bakapinana ku Yelusaleme. Yi bakasafiana batumibwi disangi yi umoumwe bamakokama yi bobo bakadi yinabo, badi mu kutôya

³⁴ ene, Fumu amabika sôsôlwo kudi bafu, yi amamoneka kudi Ximono.

³⁵ Yi bobo bakabambila mwakabaponena mu ncila, yi mwakalubukibwayi kudibo ku kunyowa kwa dimpa.

³⁶ Yi pakadi badi mu kutôya bintu bebi, mikyenci akakwemana paka cikaci pabo, akabatôyela ene, Polo akali yinenu,

³⁷ Mo bobo bakamona bixesa yi bowa, yi bakakwenca ene, bamamona muncengi.

³⁸ Yi akabatôyela ene, Kukai nwamatepexebwa noku ? Yi kukai nkanyi idi mu kubikanana mu micima yenu ?

³⁹ Numoni bianca biamene yi makasa amene, bitani meme mikyemi. Nungubabati yi numoni, bwalo butena muncengi yi munyu yi mifwa bea binwamona bidi yinami.

⁴⁰ Yi pakadi amatôya noku akabebesa bianca bienci yi makasa anci.

⁴¹ Yi pakadi bakidi kabasokwetabusa bwalo bwa kiango, yi badi mu kukama kama, akabambifa ene, Kintu kioso kidiko yinenu kia kudya ?

⁴² Yi bakamulongola kicini kia yixi mukanga ;

⁴³ yi akakiangata yi akadya ku mpala yabo.

⁴⁴ Yi akabatôyela ene, Aa ndo meyi anakanutôyela pakadi nkidi yinenu, bixefikixibwa malo moso amafundibwa mu bwadi bwa Mosese yi mu badimuxi, yi mu Misambu, ku bwalo bwamene.

⁴⁵ Ku kikondo kieki kwakadipulayi nkanyi yabo bixelubukwabo mukanda ă Ncembi ;

⁴⁶ yi akabatôyela ene, Kwamafundibwa nako, ene, Kalistu uxetata, yi uxekwombuluka kudi bafu ku dituku diamusatu ;

⁴⁷ kudibela lolo yi kulekyelebwa kwa mabi kuxekwambidibwa mu dina dienci kudi mabila moso ; yi baxebangola ku Yelusaleme.

⁴⁸ Yi nonu nudi batôbôdi ba bintu bebi.

⁴⁹ Yi mona, meme ngwatuma kilaka kia Tetemi kulu kwenu ; mo nonu nusali mu bula binunalatixibwa ngulu pôi kulu.

⁵⁰ Yi akabaxiya kunci pôi ku Betani, yi akasangola makaci anci kulu, yi akabalwangwasana.

⁵¹ Yi pakadi udi mu kubalwangwasana, akanamunibwa kudibo yi akacwadibwa kulu mu diulu.

⁵² Yi bakamuxingila, yi bakapinana ku Yelusaleme yi kiango kingi ;

⁵³ yi bakadi mu tempelo matuku moso badi mu kutumbisa Ncembi.