LOMA 10 - Disambi Dipyadipya

¹ BAKUNYI, muxekyelelu ă mucima ămene ku bwalo bwabo yi lulombu lumbalombela ku mpala a Ncembi bidi bwalo bwa kupandixibwa kwabo.

² Bwalo bumbatobôlela ntôbô ene, badi yi mwokulu ă Ncembi, kate kumoni ă bwinu.

³ Bwalo bwamasakabo yi kilubukilu kia nkwami ya Ncembi, yi bwalo bwamapalalabo kusubisa nkwami yabo, ndo butakwedeyabo nkwami ya Ncembi.

⁴ Bwalo budi Kalistu kisudeyelu kia bwadi ku bwalo bwa nkwamiku mucwe ă muntu mwoso amakwetabusa.

⁵ Bwalo bwamafunda Mosese dia nkwami idi ya bwadi ene, Muntu you amakwenca malo aa unakala yi môyo kudio.

⁶ Mo nkwami ya kwetabusa yamatôya noku ene, Kutôyi mu mucima ěbe ene, Ñani unabanda mu diulu ? (ndo kufikisa Kalistu paxi) ;

⁷ ndo ene, Ñani unapweka munda mwa dina kibiyi ? (ndo kubisa Kalistu kudi bafu).

⁸ Kate yamatôya beci ? Ene, Diyi didi pepe yinebe, ku musuku ěbe, yi ku mucima ěbe ; ka dedi ndo diyi dia kwetabusa ditwamasakola ;

⁹ ene, aka owe unasakola Yisu ku musuku ěbe ene, Fumu ; yi ndo unakwetabusa ku mucima ěbe ene, Ncembi akamubisa kudi bafu, unapandixibwa.

¹⁰ Bwalo bwamakwetabusa muntu yi mucima ku nkwami, yi ku musuku kwamasakola muntu ku kupandixibwa kwa môyo.

¹¹ Bwalo bwamatôya mukanda ă Ncembi ene, Muntu mwoso umwetabuxila kanaxipibwa bundu.

¹² Bwalo butasoxiyañana muna Yuda yi muna Ngiliki ; bwalo budi Fumu you kulu kwa bantu boso, yi amalekola yi madidi apapayi bantu boso bamwabila.

¹³ Bwalo bunapandixibwa muntu you, isanga muntu mwoso unakwabila dina dia Fumu.

¹⁴ Kaninga banakwabila muntu beci utasokwetabuxilabo ? Yi banakwetabuxila muntu beci utasokwombwabo diembi dienci ? Yi banakwombwa beci kutena mwambidi a diembi ?

¹⁵ Yi banakwambila diembi beci kutena bamatumibwa ? Bea biakafundibwa ene, Kai lwoxixi ludi yi makasa abo a bantu bacwala losangu lunengela lwa malo anengela !

¹⁶ Kate kabakwedeya losangu lunengela bungi bwabo kumoni. Bwalo bwamatôya Esaya ene, Fumu, nani amakwetabusa mwoximo ěcu ?

¹⁷ Mbwôso kwetabusa kulolwa ku mwoximo, yi mwoximo ulolwa ku diyi dia Ncembi.

¹⁸ Kate ngwapangusa ene, Ki bamakwombwa bobo ? Ya, sôsôlwo. Ku bungi bwa loboko ndo kwamabatuka mutôyelu ăbo, yi meyi abo pôi ku sula kwa loboko.

¹⁹ Kate ngwapangusa ene, Bena Isalele bakadi kabasolubukwa ? Ku buxi Mosese amatôya ene, Nakunwombwesa mwokunyo ku bubila butena bubila ; ku bubila butena yi lukanyi ndo kunanuteka yi bituku.

²⁰ Mo Esaya udi yi mucima mungi ; yei amatôya ene, Namasokololebwa kudi bantu batangupaladili ; namalwa kwebexebwa kudi bantu batangwapanguxili.

²¹ Mo ku bwalo bwa Isalele kwatôyayi ene, Dituku dincimancima namaxombola bianca biamene kudi bantu batasokwetabuxixibwa, bamapetola mpeto.