KIEBEXELU 9 - Disambi Dipyadipya

¹ YI mwangele amutano akakuma mpungi ; yi nakamona mutoto ămapona mu diulu pôi loboko ; yi lufungula lwa dina twakô lwakamupebwa,

² yi akadipula dina twakô ; yi mu dina mwakaximuna munyinga, luna munyinga ă dilungu dinene dia mudilu ; yi diba diakapindixibwa, yi mwoxixi kulu, bwalo bwa munyinga ă dina.

³ Yi munda mwa munyinga mwakabatuka minkumbi ku loboko ; yi bumanya bwakayipebwa luna bidi tuminyi twa loboko yi bumanya.

⁴ Yi bakakwambidibwa ene, kabatatixi bilo bia loboko ndo kidibwa kioso kidi mai, ndo muci mwoso kumoni ; mo bantu baba batupu batena yi kilembetelu kia Ncembi ku mpala yabo.

⁵ Kwakabapebwa lolo ene, Kababaxipi ; kate batatixibwi ngondo itano ; yi kusama kwabo kwakadi bea kusama kwa kaminyi papusumako muntu.

⁶ Ku matuku yia kunapalala bantu lufu, kate kabanalusañana pô, yi banakyeba kufwa mo lufu Iwamabacina lubilu.

⁷ Yi bifwanisa bia minkumbi biakadi luna tubala twamalungikibwa ku bwalo bwa mbita ; yi ku micwe yabo luna bilongo bia olo, yi mpala yabo yakadi luna mpala ya bantu.

⁸ Yi bakadi yi nyonyi luna nyonyi ya babakaxi, yi meno abo luna meno a ntambwi.

⁹ Bakadi yi bibukilu bia biedi luna bibukilu bia kidimadima ; yi mulaku ă bipambwi biabo ăkadi luna mulaku ă bicwadilu bia tubala tungi tungi tudi mu kuya mbilu mbilu ku mbita.

¹⁰ Bakadi yi miexi luna miexi ya tuminyi, yi bisuminu ; yi mu miexi yabo mudi bumanya bwabo bwa kutatisa bantu ngondo itano.

¹¹ Bakadi yi fumu kulu kwabo, mwangele a dina twakô ; udi yi dina dienci dia luna Ebeleo ene, Abadono ; yi udi yi dina dia luna Ngiliki ene, Apoliono.

¹² Mpeya a buxi amadika ; mona, minga mpeya ibidi yikilolwa kabidi.

¹³ Yi mwangele amusambomo akakuma mpungi ; yi nakakwombwa diyi ku xiba inai ya kilongolelu kia ôlo kidi ku mpala a Ncembi ;

¹⁴ diakatôyela mwangele amusambomo akadi yi mpungi ene, Sula bangele banai bamasukibwa ku ncedi munene a Ufulatese.

¹⁵ Yi bangele banai bakasudibwa, bakadi bamalungikibwa bwalo bwa kikondo kia ola umoumwe yi dituku yi ngondo yi mbula muncima, bixexipabo kicini kimokimwe kia bicini bisatu bia bantu.

¹⁶ Yi lubadi lwa miebanga ya bena tubala lwakadi binunu bia binunu bibidi. Meme nakakwombwa lubadi lwabo.

¹⁷ Yi nakamona tubala mo nako mu kiebexelu, yi bobo bakaxikama kulu kwatu. Bakadi yi bibukilu bia biedi bia mumbidi ă mudilu, yi bia yasinti yi bia sulufa ; yi micwe ya tubala yakadi luna micwe ya ntambwi, yi ku misuku yabo kwakabatuka mudilu yi munyinga yi sulufa.

¹⁸ Ku masama aa asatu ndo kwakaxipibwa kicini kimokimwe kia bicini bisatu bia bantu ; ku mudilu, yi ku munyinga, yi ku sulufa, biakabatuka ku misuku yabo.

¹⁹ Bwalo butani bumanya bwa tubala mu misuku yatu yi mu miexi yatu ; bwalo budi miexi yatu luna miexi ya nyoka, idi yi micwe ; yi kudiyo ndo kwatatisatu.

²⁰ Yi bantu bakasala, bakadi kabasoxipibwa ku masama aa, bakadi kabasodibela bwalo bwa makisa a makaci abo, bitaxexingilabo bidimu bibi yi ngixi ya ôlo, yi ya mpalata, yi ya kiengele, yi ya mabwe, yi ya mici ; yitabiyi ndo kumona, ndo kwombwa, ndo kwenda kumoni.

²¹ Yi bakadi kabasodibela bwalo bwa monda akakwondabo, ndo bwa maloxi abo, ndo bwa mendela akakwendelabo, ndo bwa misaka yabo kumoni.