KIEBEXELU 7 - Disambi Dipyadipya

¹ KUNYUMA kwaku noku, nakamona bangele banai bamakwemana ku macu anai a loboko, badi mu kuximba mpepele inai ya loboko, bitaxepupuya lupepele lwoso ku loboko, ndo ku mai manene, ndo ku muci mwoso kumoni.

² Yi nakamona mwangele udi mu kuximuna kulolwa munyinya, udi yi kilembetelu kia Ncembi a môyo ; yi akakwamena diyi dikola kudi bangele banai bakapebwa ndo kutatisa loboko yi mai manene,

³ ene, Kanutacixi loboko, ndo mai manene, ndo mici kumoni, buxi bunakala twamabaka basadi ba Ncembi ecu bilembetelu ku mpala yabo.

⁴ Yi nakakwombwa lubadi lwa bantu bakabakibwa bilembetelu, bakadi nkama a nkone tô, yi nkone masangi anai, yi nkone inai, ba ku malungu moso a bana ba Isalele.

⁵ Ku bulungu bwa Yuda kwakabakibwa bantu nkone disangi yi nkone ibidi ; ku bulungu bwa Leubene, nkone disangi yi nkone ibidi ; ku bulungu bwa Ngada, nkone disangi yi nkone ibidi ;

⁶ ku bulungu bwa Axele, nkone disangi yi nkone ibidi ; ku bulungu bwa Nafatali, nkone disangi yi nkone ibidi ; ku bulungu bwa Manase, nkone disangi yi nkone ibidi ;

⁷ ku bulungu bwa Ximeono, nkone disangi yi nkone ibidi ; ku bulungu bwa Lebi, nkone disangi yi nkone ibidi ; ku bulungu bwa Isakala, nkone disangi yi nkone ibidi ;

⁸ ku bulungu bwa Sebulono, nkone disangi yi nkone ibidi ; ku bulungu bwa Yosefe, nkone disangi yi nkone ibidi ; ku bulungu bwa Bencamini, kwakabakibwa nkone disangi yi nkone ibidi.

⁹ Kunyuma kwa bintu bebi nakatebela, yi mona, kimbukuma kinene kitabiyi muntu kubala, kia mu bubila bwoso yi mu malungu moso yi mu bantu boso yi mu ndimi mioso, bamakwemana ku buxi bwa lukwasa yi ku mpala a Mwana a mukwakwa, bamalata miembonda ya susu, yi badi yi manga a mabwe mu bianca biabo.

¹⁰ Yi badi mu kwamena diyi dikola ene, Kipandilu kia môyo kudi Ncembi ecu amaxikama ku lukwasa yi kudi Mwana a mukwakwa.

¹¹ Yi bungi bwa bangele bakadinga lukwasa, yi babakulu, yi bipangu binai bia môyo ; yi bakapona mpala muxi ku buxi bwa lukwasa, yi bakaxingila Ncembi ;

¹² ene, Amen, lotumbu yi dikai yi bwinu yi biloba yi kinemu yi ngufu yi mpinyu biakali kudi Ncembi ecu, ku mieciya ya mieciya. Amen.

¹³ Yi mwamukulu umoumwe akapingasa yi akangwambila ene, Bobo bamalatixibwa miembonda ya susu badi banani ? yi bapulwa kupai ?

¹⁴ Yi nakamwambila ene, Fumwami, owe wapulubukwa. Yi akangwambila ene, Baba badi bantu bamabatuka mu mpeya munene, yi bamakusula miembonda yabo, bamayisusula susu obo mu maxi a Mwana a mukwakwa.

¹⁵ Ndo biamakalabo ku buxi bwa lukwasa lwa Ncembi ; yi bamamusadila ku munyinya yi ku butuku mu tempelo anci ; yi You amaxikama ku lukwasa unapika ncibo anci a bixeba kulu kwabo.

¹⁶ Kabanakwombwa ncala kabidi nyô, kabanakwombwa nyota kabidi ; diba lolo kadinabosa kabidi, ndo mudilu mwoso kumoni ;

¹⁷ bwalo bunakala Mwana a mukwakwa Kalama kabo utani ku lukwasa, yi unabaxiyaxiya ku mpokolo ya mai a môyo ; yi Ncembi unakupulula masonci moso ku meso abo.