KIEBEXELU 5 - Disambi Dipyadipya

¹ YI nakamona mukanda mu kianca kia kidyo kia you akaxikama ku lukwasa, mufunda yi munda yi kunci, muncibika yi bifembetelu sambwali.

² Yi nakamona mwangele a ngulu udi mu kutôya yi diyi dikola ene, Ñani ani amalelekyela yi kudipula mukanda, yi kuxipa bilembetelu ?

³ Yi kakwakadi muntu ndo mu diulu ndo pa loboko ndo muxi mwa loboko, amaponyañana yi kudipula mukanda, ndo kutebela kumoni.

⁴ Yi nakadila kungi bwalo butasananibwa muntu amalelekyela yi kudipula mukanda ndo kutebela.

⁵ Yi munga muntu a babakulu akangutôyela ene, Kudidi. Mona, Ntambwi you udi a bubila bwa Yuda, dicina dia Dafidi, amapila ndo kudipula mukanda yi bilembetelu biau sambwali.

⁶ Yi nakamona, pakacikaci pa lukwasa yi pa bipangu binai bia môyo, yi pakacikaci pa babakulu, pakadi Mwana a mukwakwa udi mu kwemana ; ulexi yi ndo amaxipibwa, yi akadi yi xiba sambwali yi meso sambwali, adi Miexixi sambwali ya Ncembi yamatumibwa ku loboko luncimancima.

⁷ Yei lolo akalwa yi akawangata ku kianca kia kidyo kia you amaxikama ku lukwasa.

⁸ Yi pakadi amangata mukanda, bipangu binai bia môyo yi babakulu masangi abidi yi banai bakapona ku mpala a Mwana a mukwakwa, bakadi muntu mwoso abo yi lusese yi mpamba ya ôlo yamakwolubila yi bukula bwa manonu, budi ndombu ya bena babala.

⁹ Yi badi mu kwembikisa musambu mupyamupya ene, Owe wamalelekyela yi kwangata mukanda, yi kuxipa bilembetelu biau ; bwalo bwakaxipibwa owe, yi wamapikudila Ncembi bantu yi maxi ebe ba bulungu bwoso, yi ba ludimi lwoso, yi ba bantu boso, yi ba bubila bwoso ;

¹⁰ yi wamabateka bufumu, yi makanda ku bwalo bwa Ncembi ecu, yi banakala yi bufumu kulu kwa loboko.

¹¹ Yi nakatebela, yi nakakwombwa meyi a bangele bangi bangi bamadinga lukwasa yi bipangu bia môyo yi babakulu ; lubadi lwabo ndo binunu bia binunu yi nkone ya nkone,

¹² badi mu kutôya yi diyi dikola ene, Mwana a mukwakwa akaxipibwa amalelekyela yi kwangata ngulu yi madidi yi bwinu yi mpinyu, yi kinemu yi dikai yi lotumbu.

¹³ Yi kipangu kioso kidi mu diulu yi ku loboko yi muxi mwa loboko yi ku mai manene, yi bintu bioso bitani mnmu, ndo binakakwombwa bidi mu kutôya ene, Kudi You amaxikama ku lukwasa yi kudi Mwana a mukwakwa, kwakali lotumbu, yi kinemu, yi dikai yi mpinyu, ku mieciya ya mieciya.

¹⁴ Yi bipangu bia môyo binai biakatôya ene, Amen. Yi babakulu bakapona paxi yi bakaxingila.