KIEBEXELU 3 - Disambi Dipyadipya

¹ YI kudi mwangele a kikokye kia mu Sadisi funda ene, Bintu bebi ndo biatôya you udi yi Miexixi sambwali ya Ncembi, yi mitoto sambwali ; ene, Ngwalubukwa makisa ebe, udi yi dina ene, muna môyo, kaninga udi mufu.

² Ikala yi mpaso, subisa bintu biamasala, bidi pepe yi kufwa ; bwalo buntasananini makisa ebe moso makuki ku mpala a Ncembi amene.

³ Mbwôso ela bwalo lukanyi bwamangata owe yi bwamakweya owe ; ubunami lolo, udibeli. Mbwôso ndo kusodingila, nakukulula bea mwefi, yi kunalubukwa ola pô unakulula.

⁴ Kate udi yi mena mabende a bantu mu Sadisi batapindixili bilamba biabo ; bobo lolo banakwenda yinami mu bilamba bia susu, bwalo bwamalelekyelabo.

⁵ You amapila, yei unalatixibwa bilamba bia susu, yi meme kinancima dina dienci mu mukanda ă môyo, yi nakusakola dina dienci ku mpala a Tetemi yi ku mpala a bangele banci.

⁶ You udi yi dicu, a-ombwi mwatôyela Mwoxixi bikokye.

⁷ Yi kudi mwangele a kikokye kia mu Filadelefia funda ene, Bintu bebi ndo biatôya you a babala ; you udi sôsôlwo ; you udi yi lufungula lwa Dafidi, you adipula yi muntu kanancibika, you ancibika yi muntu kanadipula.

⁸ Ngwalubukwa makisa ebe ; mona, namateka mbelo mudipula ku mpala ebe, utasolubukwa muntu kuncibika ; bwalo budi owe yi ngulu mibende, yi wamanama diyi diamene, yi kunyañanini dina diamene.

⁹ Mona, nakubamba bantu ba kikokye kia Satana bamatôya ene, badi bena Yuda, yi kabena noku kate bamadimba ; mona, nakubafikisa balwi xingila ku makasa ebe, kulwa lubukwa sôsôlwo ene, meme namakunanga.

¹⁰ Bwalo bwamanama owe diyi dia bwika bwamene, meme kabidi nakukupandisa ola you a kielekyexelu kinalula bantu boso mo nkyekyu, ndo kwelekyesa bantu bamaxikama ku loboko.

¹¹ Ndolwa mangwoso ; namata ku bintu bidi yinebe bitaxencula muntu mwoso kilongo kiebe.

¹² You amapila, nakumuteka mutondo mu tempelo a Ncembi amene, yi kanabatuka kabidi nyô ; yi nakufunda dina dia Ncembi amene kulu kwanci, yi dina dia bula bwa Ncembi amene, Yelusaleme mupyamupya, bwamapweka mu diulu kudi Ncembi amene ; yi dina diamene dipyadipya.

¹³ You udi yi dicu, a-ombwi mwatôyela Mwoxixi bikokye.

¹⁴ Yi kudi mwangele a kikokye kia mu Laodikia, funda ene, Bintu bebi ndo biatôya you udi Amen, mutôbôdi a kibaku yi a sôsôlwo, bubangabanga bwa kipangu kia Ncembi ;

¹⁵ ene, ngwalubukwa makisa ebe ; kuna ndo maxika, ndo mudilu kumoni ; ngwakyeba uxekala ndo maxika ndo mudilu.

¹⁶ Mo bwalo budi owe lubabadi, yi kumoni maxika, yi kumoni mudilu, ndo bunakulondola mu musuku ămene mo nkyekyu.

¹⁷ Bwalo bwamatôya owe ene, Ndi yi bodidi, namalwa yi bima, yi kisokwayila yi kintu kioso ; yi kusolubukwa ene, udi yi mpeya, yi buxitu, yi bokombi, yi bufofo, yi butaka ;

¹⁸ nkupapa diyi ene, Ola ôlo kundi amasusudibwa mu mudilu, bixeakala owe yi bodidi ; yi bilamba bia susu bixebukidibwa, bitaxekwebexebwa bundu bwa butaka bwebe ; yi manyi a meso a kuxinga meso ebe, bixemona.

¹⁹ Bantu boso banamananga, meme namabakamina makamu yi namabatatisa ; mbwôso baka mucima, udibeli.

²⁰ Mona namakwemana ku mbelo, yi ngwakwakwala ; ndo muntu mwoso ombombwa diyi diamene, yi unadipula mbelo, meme nakubwela kudiyi, yi nakudya yinanci, yi yei unadya yinami.

²¹ You amapila, nakumupa ndo kuxikama yinami ku lukwasa lwamene ; bea binakapila, yi nakaxikama yi Tetemi mu lukwasa lwanci.

²² You udi yi dicu, a-ombwi mwatôyela Mwoxixi bikokye.