KIEBEXELU 21 - Disambi Dipyadipya

¹ YI nakamona diulu dipyadipya yi loboko lupyalupya ; bwalo bwakamancuka diulu dia buxi yi loboko lwa buxi, yi mai manene kayenako.

² Yi nakamona bula bwa babala, Yelusaleme mupyamupya, budi mu kupweka pôi diulu kudi Ncembi, bwamalungikibwa luna muna dibakwa amabongexebwa bwalo bwa bayenci.

³ Yi nakakwombwa diyi dikola diamalwa mu lukwasa ene, Mona, ncibo a bixeba a Ncembi udi yi bantu, yi unaxikama yinabo, yi banakala bantu banci, yi Ncembi mikyenci unakala yinabo, Ncembi abo.

⁴ Yi unakupulula disonci dioso ku meso abo ; yi lufu kalunakala kabidi nyô, ; yi kakunakala ndo bidilu, ndo masonci, ndo kusama, kabidi nyô ; bwalo bwamadika bintu bia buxi.

⁵ Yi You akaxikama ku lukwasa akatôya ene, Mona, ngwapanga bintu bioso bipyabipya. Yi akatôya ene, Funda ; bwalo budi meyi aa a kibaku yi a sôsôlwo.

⁶ Yi akangwambila ene, Amafikixibwa. Meme ndi Alafa yi Omenga, bubangabanga yi ku sula. You udi yi nyota, meme nakumupa mai a mpokolo a mai a môyo, kutena diso.

⁷ You apila unakita bintu bebi mwokito ; yi nakwakala yinanci Ncembi yi yei unakala yinami mwana.

⁸ Kate bena bowa, yi bobo batasokwetabusa, yi bena nyete, yi bondi, yi bendedi ba bakaxi babene, yi baloxi, yi bena ngixi, yi bena ncimi boso, dikapa diabo dinakala mu kiteleñena kiamalumuka yi mudilu yi sulufa ; nako kudi lufu lwamubidi.

⁹ Yi munga mwangele akalwa a bangele sambwali bakadi yi mpamba sambwali, bakacwala masama sambwali a ku sula ; yi akangutôyela ene, Lwaka kunu, yi nakukwebesa muna dibakwa, Mwana a mukwakwa mukasanci.

¹⁰ Yi akangucwala mu mwoxixi kulu kwa lupongo lunene lwa bule pyô, yi akangwebesa bula bwa babala, Yelusaleme, budi mu kupweka pôi diulu kudi Ncembi,

¹¹ butani yi dikai dia Ncembi. Obo abu akadi luna dibwe dia diso dikola, luna dibwe dia yasipisi, obo bea mai makwata.

¹² Butani lolo yi kididi kinene, yi kilekile pyô ; budi yi bibwelelu disangi yi bibidi, yi ku bibwelelu kutani bangele disangi yi babidi ; yi mena mafunda kulu kwabio, adi mena a mabila disangi yi abidi a Bena Isalele.

¹³ Ku mwanca ulolwa munyinya kwakadi bibwelelu bisatu ; ku Nôdo bibwelelu bisatu ; ku Sudu bibwelelu bisatu ; yi kuyeya munyinya bibwelelu bisatu.

¹⁴ Yi kididi kia bula kiakadi yi bibangolelu disangi yi bibidi, yi kulu kwabio kwakadi mena disangi yi abidi a batumibwi disangi yi babidi ba Mwana a mukwakwa.

¹⁵ Yi you akatôya yinami akadi yi kaci ka ôlo ka kielekyexelu, bixekwelekyesayi lwedi lwa bula, yi bibwelelu biabu, yi kididi kiabu.

¹⁶ Yi bula butani yi miengo inai bileli, yi bule bwabu bulexi yi bunene bwabu. Yi akakwelekyesa bula yi kaci, “ stadia ” nkone disangi yi nkone ibidi ; bule bwabu yi bunene bwabu yi bule bwabu bwa kulu bulexi.

¹⁷ Yi akakwelekyesa kididi kiabu, kubiti nkama yi masangi anai yi kubiti inai, lwedi lwa muntu, ndo lwa mwangele.

¹⁸ Yi mabwe a kididi kiabu akadi yasipisi ; yi bula bwakadi ôlo mutupu, luna mulondo obo.

¹⁹ Bibangolelu bia kididi kia bula biakabongexebwa yi butonga bwoso bwa mabwe a mapiko. Kibangolelu kia buxi kiakadi yasipisi ; kiamubidi kia safili ; kiamusatu kia kalasedoni ; kiamunai kia emelada ;

²⁰ kiamutano kia sadonisi ; kiamusambomo kia sadio ; kia sambwali kia kilisoliti ; kia yenana kia belili ; kia dibwa kia topasa ; kia disangi kia kilisopasi ; kia disangi yi umoumwe kia yasinti ; kia disangi yi ibidi kia ametisiti.

²¹ Yi bibwelelu disangi yi bibidi biakadi mabwe disangi yi abidi a mayamba ; kibwelelu kimokimwe dibwe dimodimwe, kibwelelu kimokimwe dibwe dimodimwe ; yi ncila a bula akadi ôlo mutupu, obo luna mulondo.

²² Yi nakadi kisomona tempelo munda mwabu, bwalo budi tempelo abu Fumu Ncembi, Ncembi Xadai, yi Mwana a mukwakwa.

²³ Yi bula kabusokwabila diba, ndo ngondo kumoni, ndo kubutekyela obo ; bwalo bwamabulumukila dikai dia Ncembi, yi mwinda ăbu udi Mwana a mukwakwa.

²⁴ Yi mabila anakwenda ku obo abu ; yi bafumu ba loboko banacwala dikai diabo kudibu.

²⁵ Yi bibwelelu biabu kabinancibikibwa ku munyinya pô, bwalo butasoakala butuku momu.

²⁶ Yi banacwala dikai dia mabila yi bunene bwao munda mwabu.

²⁷ Yi momu kamunabwela kintu kioso kia kanana, ndo muntu encenca nyete yi lodimbu kumoni ; no bobo batupu bamafundibwa mu mukanda ă moyo ă Mwana a mukwakwa.