KIEBEXELU 2 - Disambi Dipyadipya

¹ KUDI mwangele a kikokye kia ku Efeso funda ene, Bintu bebi ndo biamatôya you udi yi mitoto sambwali mu kianca kienci kia kidyo, endenda pakacikaci pa minda sambwali ya ôlo,

² ene, Ngwalubukwa makisa ebe, yi nkambi yebe, yi bwika bwebe ; yi ene, kusolubukwa kwekyela yi bantu babi ; yi wamakwelekyesa bantu batôya ene, mikyeabo badi batumibwi, mo kabena noku, yi wamabasañana bena ncimi ;

³ udi lolo yi kicwandundu, wamakwombwa buxitu ku mucwe ă dina diamene, yi kusopwangwa pô.

⁴ Kate ndi yi bwalo bobu yinebe, ene, wamakadeya nyinga yebe ya buxi.

⁵ Mbwôso ela kidi lukanyi kiamapona owe kudikio, udibeli lolo, yi enca makisa a buxi ; kaninga ndo kumoni, ndolwa kudi, yi nakuncula mwinda ěbe ku kidi kiau, kutena unadibela.

⁶ Kate udi yi bwalo bobu bunengela, ene, wombombwa makisa a bena Nikolao nyete, angwombombwa meme nyete kabidi.

⁷ You udi yi dicu, a-ombwi mwatôyela Mwoxxxi bikokye. You amapila, nakumupa ndo kudya mamoma a muci ă môyo, udi mu Paladisi a Ncembi.

⁸ Yi kudi mwangele a kikokye kia mu Sumuna, funda ene, Bintu bebi ndo biatôya you a buxi yi you a ku sula, you akadi mufu yi akapiñana yi môyo,

⁹ ene, Ngwalubukwa buxitu bwebe yi bokombi bwebe (kate udi yi bodidi) ; yi mwotangu ăbo bamatôya ene, badi bena Yuda, yi kabena noku, kate badi kikokye kia Satana.

¹⁰ Kucini bintu binatata owe mo nkyekyu. Mona, diaoolo ditanalanda kwela banga bantu benu mu ncibo a nkanu, binuxekwelekyexebwa, yi nunakala yi buxitu matuku disangi. Ikala owe yi kibaku pôi ku lufu, yi nakukupa kilongo kia môyo.

¹¹ You udi yi dicu, a-ombwi mwatôyela Mwoxixi bikokye. You amapila kanatatixibwa ku lufu lwamubidi pô.

¹² Yi kudi mwangele a kikokye kia mu Pengamo, funda ene, Bintu bebi ndo biatôya you udi yi mwele ă kucwa, ă mpala ibidi ;

¹³ ene, Ngwalubukwa kidi kiamaxikama owe, kitani nkwasa a Satana ; yi wamanamata ku dina diamene, yi wakadi kusonyañana kwetabusa kwamene, isanga ku matuku a Antipasa, mutôbôdi amene a kibaku, akaxipibwa pakacikaci penu, mu kidi kiapwakala Satană.

¹⁴ Kate ndi yi malo mabende yinebe, bwalo butani owe yi banga koku bamanamata ku kweyesa kwa Balama, akakweyusa Balaka ndo kuteka kiponexelu mu ncila a bena Isalele, bixedyabo malongi akalongolebwa ku mpala a ngixi, yi bixekwendelabo bakaxi babene.

¹⁵ Udi kabidi yi banga bamanamata ku kweyesa kwa bena Nikolao mo nako.

¹⁶ Mbwôso udibeli ; kaninga ndo kumoni, ndolwa kudi mangwoso, yi nakutanda yinabo mbita yi mwele ă musuku ămene.

¹⁷ You udi yi dicu, a-ombwi mwatôyela Mwoxixi bikokye. You amapila, nakumupa “ Mana ” musokoka ; yi nakumupa dibwe dia susu yi dina difunda ku dibwe ditasolubukwa muntu mwoso kutena you amadiangata.

¹⁸ Yi kudi mwangele a kikokye kia mu Tiatila funda ene, Bintu bebi ndo biatôya Mwana a Ncembi, udi yi meso bea mwanga ă mudilu, yi makasa anci bea kiengele obo,

¹⁹ ene, Ngwalubukwa makisa ebe, yi nyinga, yi kwetabusa, yi mudimo, yi bwika ; yi ene, makisa ebe a nyuma amadika makisa ebe a buxi bungi.

²⁰ Kate ndi yi bwalo bobu yinebe ene, Wamakwekyela yi mwamukaxi you Yesebele, amadibikila mikyenci ene, Mudimuxi, yi eyesa basadi bamene, yi amabaungisaungisa bendeli bakaxi babene, yi badi bixipilu biamalongolebwa ku mpala a ngixi.

²¹ Yi nakamupa kikondo bixedibelayi, yi yei kasonanga kudibela bwalo bwa budibi bwanci.

²² Mona, meme nakumwela mu ntangi, yi bobo bamwendela yi budibi mu buxitu bungi, kutena banadibela bwalo bwa makisa anci.

²³ Yi nakuxipa bana banci yi lufu ; yi bikokye bioso binalubukwa ene, Meme ndi you amaxixima mala yi micima ; yi nakufuta muntu mwoso enu bea biamalelekyela yi makisa enu.

²⁴ Mo nwatôyela nonu, isangu bobo bamasala mu Tiatila batena yi kweyesa koku, batasokweya malo malemale twakô a Satana, luna biatôyabo ; ene, kisokwapeya bunga buxitu kulu kwenu ;

²⁵ mo bwalo bwa bintu bebi bidi yinenu nkyekyu, nunamati kudibio pôi kikondo kindolwa.

²⁶ You amapila, amanama makisa amene pôi ku sula, nakumupa bumanya kulu kwa mabila ;

²⁷ yi unabumba yi kita kia kidimadima ; bea biamanyanyudibwa sala ya mufumbi ; luna binamangata kabidi kudi Tetemi ;

²⁸ yi nakumupa mutoto ă butwatuku.

²⁹ You udi yi dicu, a-ombwi mwatôyela Mwoxixi bikokye.