KIEBEXELU 16 - Disambi Dipyadipya

¹ YI nakakwombwa diyi dikola diamalwa mu tempelo, didi mu kwambila bangele sambwali ene, Nuyi, nutudeyi mpamba sambwali ya bisusu bia Ncembi pôi ku loboko.

² Yi you a buxi akaya, yi akatudeya mpamba anci pôi ku loboko ; yi akalwa mbuta a bubi yi a kusama kudi bantu bakadi yi kilembetelu kia Nyama, yi bamaxingila kifwanisa kienci.

³ Yi you amubidi akatudeya mpamba anci mu mai manene ; yi akalwa maxi, luna maxi a muntu mufu ; yi kipangu kioso kia môyo kia mu mai manene kiakafwa.

⁴ Yi you amusatu akatudeya mpamba anci mu ncedi yi mu mpokolo ya mai, yi akalwa maxi.

⁵ Yi nakakwombwa mwangele a mai udi mu kutôya ene, Owe udi yi nkwami, udiko, yi wakadiko, Owe a babala, bwalo bwamasambola noku ;

⁶ bwalo bwakapangululabo maxi a bena babala yi badimuxi, yi wamabanusa bobo maxi ; bobo bamalelekyela.

⁷ Yi nakakwombwa kilongolelu kidi mu kutôya ene, E, Fumu Ncembi, Ncembi Xadai, sambo yebe yasambola Owe idi sôsôlwo yi nkwami.

⁸ Yi you amunai akatudeya mpamba anci kulu kwa diba ; yi diakapebwa ndo kwosa bantu mudilu ;

⁹ yi bantu bakakwoxebwa mudilu mungi, yi bakatangola dina dia Ncembi akadi yi bumanya kulu kwa masama aa ; yi bakadi kabasokwela lwombixi ndo kumutumbisa.

¹⁰ Yi you amutano akatudeya mpamba anci kulu kwa lukwasa lwa Nyama, yi bufumu bwanci bwakapinda ; yi bakancankunya ndimi yabo bwalo bwa kusama ;

¹¹ yi bakatangola Ncembi a diulu bwalo bwa masama abo yi mbuta yabo ; yi bakadi kabasokwela lwombixi bwalo bwa makisa abo.

¹² Yi you amusambomo akatudeya mpamba anci kulu kwa ncedi munene Ufulatese ; yi mai anci akakwomexebwa, bixelungikibwa ncila a bafumu balolwa kulolwa munyinya.

¹³ Yi nakamona bidimu bisatu bia mbindu luna bidyamputoto biakabatuka mu musuku ă cici, yi mu musuku ă Nyama, yi mu musuku ă mudimuxi a mancanga ;

¹⁴ bwalo budibio bidimu bia bidimu bibi, bidi mu kwenca bilayixilu, biyeya kudi bafumu ba loboko luncimancima kuya bakokyeya ku mbita a dituku dinene dia Ncembi, Ncembi Xadai.

¹⁵ Mona, ndolwa luna mwefi. Mulwangwasanibwi ndo you amatebela yi amanama bilamba bienci, bitaxekwendayi butaka, yi bitaxemonabo bundu bwanci.

¹⁶ Yi akabakokyeya ku kidi kiamabikidibwa luna Ebeleo ene, Ala-Mangedo.

¹⁷ Yi you a sambwali akatudeya mpamba anci ku mwoxixi kulu ; yi mu tempelo mwakabatuka diyi dikola, ku lukwasa, ene, Kwamapwa.

¹⁸ Yi misadi ya kapenya yakadiko, yi meyi, yi makongola ; yi kutepa kunene kwakalwa kwa loboko kutakadi nako pôi kikcndo kiakadi bantu pa loboko, kutepa kunene kwa noku, kwa bubi.

¹⁹ Yi bula bunene bwakalwa bicini bisatu ; yi mala a mabila akaximbuka ; yi Babelono munene akakwelebwa lukanyi ku mpala a Ncembi ndo kumupa mpamba a malufu a bisusu bia bituku bienci.

²⁰ Yi kisala kioso kiakacina lubilu, yi mpongo yakadi kayisosafianibwa pô.

²¹ Yi mabwe manene a mbula akapweka kudi bantu pôi diulu, dibwe dioso didi buxitu bwa talente ; yi bantu bakatangola Ncembi bwalo bwa kusama kwa mabwe a mbula ; bwalo butani kusama kwao kungi kungi.