KIEBEXELU 14 - Disambi Dipyadipya

¹ YI nakatebela, yi mona, Mwana a mukwakwa udi mu kwemana kulu kwa lupongo lwa Siono, yi bantu yinanci nkama a nkone yi nkone masangi anai yi nkone inai, badi yi dina dienci yi dina dia Tetenci difunda ku mpala yabo.

² Yi nakakwombwa diyi mu diulu, luna diyi dia mai mangi, yi luna diyi dia dikongola dinene ; yi diyi dinakakwombwa diakafwana diyi dia bena sese badi mu kukuma sese yabo.

³ Yi badi mu kwembikisa musambu mupyamupya ku buxi bwa lukwasa yi bwa bipangu binai bia môyo yi bwa babakulu. Kumoni muntu ubili kweya musambu ou utena bantu nkama a nkone yi nkone masangi anai yi nkone inai, bakapikudibwa ku loboko.

⁴ Baba ndo bantu batasopindixibwa yi babakaxi bwalo budibo banciki. Baba ndo bantu bamalandudila Mwana a mukwakwa kwoso kwendendayi. Baba bakapikudibwa kudi bantu, somo ya buxi kudi Ncembi yi kudi Mwana a mukwakwa ;

⁵ yi mu musuku ăbn kamwakadi ncimi pô ; kabena yi bwalo bubi.

⁶ Yi nakamona munga mwangele udi mu kupumbuka pakacikaci pa diulu, udi yi losangu lunengela lwa kô kô lwa kusakolela bantu bamaxikama ku loboko, yi bubila bwoso yi bulungu bwoso yi ludimi lwoso yi bantu boso ;

⁷ udi mu kutôya yi diyi dikola ene, Nucini Ncembi, numutumbisi ; bwalo bwamafika ola a kusambola kwanci ; yi numuxingili akapanga diulu yi loboko yi mai manene yi mpokolo ya mai.

⁸ Yi munga mwangele akalanda amutidi ene, Babelono munene amapona, amapona, you akanusa mabila moso malufu a bisusu bia budibi bwanci.

⁹ Yi munga mwangele akabalanda, amusatu, udi mu kutôya yi diyi dikola ene, Aka muntu mwoso amaxingila Nyama yi kifwanisa kienci, yi amangata kilembetelu ndo ku mpala anci ndo ku kianca,

¹⁰ yei unanwa kabidi malufu a bisusu bia Ncembi malungika mu mpamba a bituku bienci kutena kulebexebwa, yi unatatixibwa yi mudilu yi sulufa ku mpala ya bangele ba babala, yi ku mpala a Mwana a mukwakwa.

¹¹ Yi munyinga ă kusama kwabo ămaximuna ku mieciya ya mieciya ; yi kabasokwomowa ndo ku munyinya ndo ku butuku, bobo bamaxingila Nyama yi kifwanisa kienci, yi muntu mwoso amangata kilembetelu kia dina dienci.

¹² Kunu kudi bwika bwa bena babala, bobo bamanama milangu ya Ncembi, yi kwetabusa kwa Yisu.

¹³ Yi nakakwombwa diyi mu diulu ene, Funda ene, Balwangwasanibwi ndo bafu bafofwa mu Fumu pôi nkyekyu. Mwoxixi ndo atôya ene, E, bixekwomowabo ku nkambi yabo ; bwalo bwasangila makisa abo yinabo.

¹⁴ Yi nakatebela, yi mona, dibaxi dia susu ; yi kulu kwa dibaxi kwakadi muntu uxikamini ulexi yi Mwana a muntu, udi yi kilongo kia ôlo ku mucwe ănci, yi mwele ă kucwa ă masangu mu kianca kienci.

¹⁵ Yi munga mwangele akabatuka mu ntempelo, udi mu kwamena diyi dikola kudi you axikama ku dibaxi, ene, Bwesa mwele ěbe, buka lolo ; bwalo bwamafika ola a kubuka, bwalo bwamakwoma masangu a loboko.

¹⁶ Yi you akaxikama ku dibaxi akabaka mwele ănci ku loboko yi loboko lwakabukibwa masangu.

¹⁷ Yi munga mwangele akabatuka mu tempelo udi mu diulu, yei kabidi akadi yi mwele ă masangu ă kucwa.

¹⁸ Yi munga mwangele akabatuka mu kilongolelu, udi yi bumanya kulu kwa mudilu ; yi akakwelela you diyi dikola udi yi mwele ă kucwa ă masangu, ene, Tuma mwele ěbe ă kucwa, buka bibomba bia mamoma a finyo a loboko ; bwalo bwamapya mamoma anci.

¹⁹ Yi mwangele akabaka mwele ănci ku loboko, akabuka finyo a loboko, yi akakwela mu kinyacilu kinene kia bisusu bia Ncembi.

²⁰ Yi kinyacilu kiakanyacibwa kunci kwa bula, yi mu kinyacilu mwakabatuka maxi amafika pôi ku bipiko bia misuku ya tubala, lwedi lwa lokone lwa “ stadia ” nkama isambomo.