EBELEO 8 - Disambi Dipyadipya

¹ KU malo aa lolo atudi mu kutôya, dicina dia bwalo didi ene, Twapwangata bokanda bunene bwa noku, bwamaxikama ku kidyo kia lukwasa lwa Bunene mu melu kulu,

² musadi a bidi bia babala, yi a ncibo a bixeba amapika Fumu, kumoni muntu.

³ Bwalo bwamalungikibwa bokanda bwoso bunene ndo kulongola yi malongi yi bixipilu ; mbwôso bokanda bobu noku kabidi bwakadi yi dibambu dia dilongi kulongola.

⁴ Kaninga ndo yei uxeakala ku loboko, kaxeakala bokanda pô, bwalo budiko bantu bamalongola malongi bea biamatôya bwadi ;

⁵ bamasala mudimo ă ncibo you udi kifwanisa yi mudingidingi ă bintu bia diulu ; luna biakadimuxibwa Mosese kudi Ncembi pakalandayi kukisa ncibo a bixeba ; bwalo bwakatôyayi ene, Mona, upangi bintu bioso luna mwocindu ou ăkakwebexebwa owe ku lupongo.

⁶ Mo nkyekyu apwangata busadi bwamadika bunengela, bwalo budiyi kabidi musambodi a disambi diamadika dinengela, diamasambikibwa bwalo bwa bilaka biamadika binengela.

⁷ Bwalo ndo disambi dia buxi dixeakala kadina mwosaku, kidi kakixedidixibwa kia disambi diamubidi.

⁸ Mo bwalo bwakamonayi mwosaku ndo bwakatôyayi ene, Fumu ene, Mona, matuku alolwa anasubisa disambi dipyadipya yi ncibo a Isalele yi ncibo a Yuda ;

⁹ kumoni luna disambi dinakasambikanana yi bateteabo ku dituku dinakabakwata ku kianca ndo kubaxiya kunci kwa mbata a Ecipito ; bwalo butasalabo mu disambi diamene, yi nakadi kisobadingila ; Fumu ndo atôya nako.

¹⁰ Kunu pako kudi disambi ; dinasambikanana yi ncibo a Isalele kunyuma kwa matuku yia, (Fumu ndo atôya nako) ; nakuteka madi amene mu lukanyi lwabo yi nakwafunda kabidi ku mucima ăbo ; yi nakwakala yinabo Ncembi, yi bobo banakala yinami bantu ;

¹¹ yi kabanakweyesa muntu mwoso muna bula bwanci muntu mwoso muna bula bwanci, ndo muntu mwoso muna kwanci muntu mwoso muna kwanci ene, Lubukwa Fumu ; bwalo bunangulubukwa bungi bwabo pôi muntu mubende pôi muntu munene yinabo.

¹² Bwalo bunakwombwela mona abo mwengo amakwonabo, yi kinakwela mabi abo lukanyi kabidi nyô.

¹³ Pa kutôya ene, Disambi dipyadipya, amateka dia buxi kinunu. Mo kintu kioso kiamatekyebwa kinunu yi kiamadika kunyenga kidi pepe yi kuncimina.