2 TIMOTEO 4 - Disambi Dipyadipya

¹ NGWATÔBÔLA ku mpala a Ncembi yi a Kalistu Yisu utanalanda kusambola yi bena môyo bafu, yi ku bwalo bwa kimonekyelu enci yi bwa bufumu bwanci,

² ene, Ambiia diyi ; ikala yi mwokulu ku kipoma kinengela yi ku kipoma kitena kinengela ; tongola, kama, bondabonda, yi kicwandundu kioso yi kweyesa kwoso.

³ Bwalo bunalwa kikondo kitasonangabo kwekyela yi kweyesa kwa loko ; kate bwalo bwakalabo yi macu a nkadi ndo bunadikokyeyelabo beyexi balanda xindilu yabo mikyeabo ;

⁴ yi banakulumuna macu abo ku sôsôlwo, yi banakulumuka kuya ku tufumu twa kanana.

⁵ Mo owe ikala muna mulangu mu bintu bioso, tata, enca mudimo ă mwambidi a losangu lunengela, kukisa busadi bwebe.

⁶ Bwalo buntanapanguludibwa bea malufu nkyekyu, yi kikondo kia kulekyelebwa kwamene kitani pepe.

⁷ Namatanda mbita you unengela, namamana sambo kusambola, namanama kwetabusa ;

⁸ pôi nkyekyu pamangubumbidibwa kilongo kia nkwami kinampa Fumu, musambodi a nkwami, ku dituku dedi ; yi kumoni meme mutupu, kate bungi bwabo kabidi bamananga kimonekyelu kienci.

⁹ Palala yi mwokulu kulwa kundi mangwoso ;

¹⁰ bwalo bwakangukadeya Demasa, amananga mwociya ou ă nkyekyu you, yi akaya ku Tesalonika. Kyelesense amaya ku Ngalatia, Tito ku Dalamatia.

¹¹ Luka mutupu udi yinami. Angata Maku, umucwali yinebe ; bwalo bwamangusadisayi loko ku mudimo ă Fumu.

¹² Mo namatuma Tikiko ku Efeso.

¹³ Mucwala ă maxika unakaxiya ku Toloasa kwa Kapo, ucwali palolwa, yi mikanda ; dingila yei mikanda mifunda pa bixeba.

¹⁴ Alesanda, mutudi a ôlo, akangwebesa bubi bungi ; Fumu unamusayila bea bidi makisa anci ;

¹⁵ owe dimuka kabidi ku bwalo bwanci, bwalô bwakatandayi yi meyi ecu kungi kungi.

¹⁶ Ku kukyata kwamene kwa buxi, kakwakadi muntu yinami ; kate bungi bwa bantu bakangukadeya ; bwalo bobu kabubakibwi kudibo.

¹⁷ Mo Fumu akakwemana yinami yi akampa ngulu, bixesakolebwa mwobeki kundi dyendeli yi bixekwombwa bungi bwa mabila ; yi nakapaudibwa mu musuku ă ntambwi.

¹⁸ Fumu unangupaula ku mudimo mwoso mubi, yi unangupandisa pôi ku bufumu bwanci bwa diulu ; kudiyi kwakali dikai ku mieciya ya mieciya. Amen.

¹⁹ Bisa Filisikila yi Akwila yi ncibo a Onesifolo.

²⁰ Elasto akasala ku Kolinti ; mo namaxiya Tolofimo ku Mileto, udi yi kusama.

²¹ Palala yi mwokulu kulwa buxi bwa ngondo ya maxika. Eubulu ukwabisa, yi Pudense yi Lino yi Kolôdia yi bungi bwa bakunyi.

²² Fumu akali yi mucima ěbe. Lwoxixi lwakali yinenu.