2 TESALONIKA 3 - Disambi Dipyadipya

¹ KU sula bakunyi, nutulombeleli, bixekwenda diyi dia Fumu mangwoso, bixetumbixibwadio bea yinenu kabidi ;

² bituxepaudibwa coco kudi bena nkyekye, yi bena mabi ; bwalo butasoakala bantu boso yi kwetabusa.

³ Kaninga Fumu udi muna kibaku, unanusubisa, unanunama ku bubi.

⁴ Yi coco twamakwetabuxila Fumu ku bwalo bwenu, ene, nwencenca yi nunakwenca milangu yitwamanulanga.

⁵ Fumu lolo axiyixiyi micima yenu mu nyinga ya Ncembi, yi mu bwika bwa Kalistu.

⁶ Nkyekyu tunwalanga, bakunyi, mu dina dia Fumwecu Yisu Kalistu, ene, nuncuki kudi mwakunyi mwoso endenda yi Iwocitu, kumoni luna kweyesa kwakangatabo kutudi.

⁷ Bwalo bunwalubukwa mikyenu munuxetwokola coco ; bwalo bututakixili kwenu yi Iwocitu ;

⁸ yi twakadi katusodya bidya kudi muntu mwoso kutena diso ; kate twakakwenca yi nkambi yi mudimo ku butuku yi ku munyinya, bitutaxebaka buxitu kudi muntu mwoso ;

⁹ kumoni bwalo bututena yi bumanya, kate bituxediteka mikyecu luna kielekyexelu kia kwelekyexebwa kwenu, binuxetwokola.

¹⁰ Bwalo butwakanulanga pakadi tutani yinenu, ene, muntu ndo anyañana kwenca mudimo, kadi kabidi.

¹¹ Bwalo butwombombwa ene, banga badi kwenu bendenda yi lwocitu, batasokwenca mudimo pô, kate badi bena kisoka.

¹² Nkyekyu twalanga bena noku yi tubabondabonda kudi Fumu Yisu Kalistu, ene, benci mudimo yi polo, badi bidya biabo mikyeabo.

¹³ Mo nonu bakunyi, kanupenyuki yi kwenca kwa kunengela.

¹⁴ Aka lolo muntu mwoso kasokwedeya diyi diecu dia mu mukanda ou, nulembeteli muntu you, kanusangidi yinanci, bixefwayi bundu.

¹⁵ Kaninga kanumwenci muna nkyetekyete, kate numudimusi bea mwakunyi.

¹⁶ Nkyekyu Fumu a polo mikyenci anupi polo ku bikondo bioso ku bintu bioso. Fumu akali yinenu bungi bwenu.

¹⁷ Môyo kudi meme Paulu, mufunda yi kianca kiamene mikyemi ; kakieki ndo kilembetelu mu mukanda mwoso ; ndo bingwafunda.

¹⁸ Lwoxixi lwa Fumwecu Yisu Kalistu lwakali yinenu bungi bwenu.