2 PITA 2 - Disambi Dipyadipya

¹ MO badimuxi bakadiko kabidi pakacikaci pa bantu, bena ncimi, bea biamakala beyexi ba ncimi pakacikaci penu kabidi, banabwesa malo a lufu ku busoko a bixe bixe, badi mu kwaba isanga Mukyelengi mwabu akabola ku diso, yi badi mu kudifikixila lufu mangwoso.

² Yi bantu bangi banalanda miesambu yabo ya madibi ; yi ku micwe yabo kunatangolebwa mwosambu ă sôsôlwo.

³ Yi ku bwalo bwa bwefi, yi ku meyi a mancanga, kunanusakilabo ; ku bwalo bwabo, lopelo Iwakabelebwabo kalikali kalusoxangalaka, yi lufu lwabo kalusoyimbwela.

⁴ Bwalo butakwombwela Ncembi bangele mwengo bakakwona, kate akabela mu dilungu dia munda, yi akabalongola ku ntuxa ya mwedima fu, ndo kunamibwa pôi ku lopelo.

⁵ Yi akadi kasokwombwela loboko lwa kalikali mwengo, kate akanama Nowa, you a yenana, mwambidi akakwambila nkwami, pakafikisayi muyi kulu kwa loboko lwa bantu batena yi mwosambu ă Ncembi.

⁶ Akakwosa lolo mala a Sodomo yi Ngomola kwakyi, yi akababela yi kinkambili kia bubi, yi akabateka luna kiebexelu kudi bantu baxekwenda yi môyo kunyuma utena mwosambu ă Ncembi.

⁷ Akapandisa lolo Loto a nkwami, akakwombwa kusama kungi ku mucima bwalo bwa miesambu ya budibi ya bantu babi.

⁸ Bwalo you muntu a nkwami akaxikama pakacikaci pabo, yi akatatisa mucima ănci ă nkwami, pa kumona yi pa kwombwa, yi kusama kungi ku dituku ku dituku, bwalo bwa makisa abo a bwolemo.

⁹ Fumu ubili kupaula bena mwosambu ă Ncembi mu kielekyexelu, yi kunama bantu batena yi nkwami muxi mwa kusama pôi ku diba dia lopelo ;

¹⁰ yi bobo pako bendenda yi mwosambu ă munyu ku luxindilu lwa lobindu yi bamatamuna bukalanga bwoso. Badi bena bosaka, bena kitata ; kabasocina kutangola bena bikupu ;

¹¹ mo bangele, isanga bamabadika yi mpinyu yi ngulu, kabasolwa yi lopelo lwa mwotangu ku bwalo bwabo ku mpala a Fumu.

¹² Mo bantu baba balexi yi nyama yitena nkanyi, yamapangibwa yi butonga bwayo bwa kukwacibwa yi kuxipibwa ; yi bamatangola mietangu mu maio atasolubukwabo pô ; yi bamasaludibwa ku musalu ăbo,

¹³ yi banangata sayi ya bwalo butena yi nkwami. Bakanyakanya ene, kiango kidi ndo kudya bidya bingi ku munyinya ; badi mantobo yi mbuta, yi bamasabañana yi mulaku ku ndimbu yabo, pakala badi mu kudyañana yinenu ;

¹⁴ badi yi meso amakwolubilañana yi diendela, atasolubukwa kulekyela bubi ; bamaputa bantu ku bubi batasosuba loko ; badi yi mucima ămakwekyelexebwa yi luxindilu ; badi bana ba mulau.

¹⁵ Bamakadeya ncila a swi, yi bamaungaunga, yi bamalanda mu ncila a Balama a Beolo, akananga sayi ya bwalo butena yi nkwami ;

¹⁶ mo akakaminibwa kwona kwanci dikamu ; mpundu a kimeme akatôya yi diyi dia muntu yi akancidika budibi bwa mudimuxi.

¹⁷ Baba noku badi mpokolo yitena yi mai, yi mbungi yamapumbuxibwa ku ngiembi ; bamatekyelebwa mwedima ă mungila fu.

¹⁸ Pa kutôya meyi manene amakwolubila yi kimbombo, badi mu kuputa bantu yi xindilu ya munyu ku budibi, isanga bobo baxekwongoloka mo nkyekyu kudi bantu bendenda yi kwona.

¹⁹ Bamabaxiyila kilaka kia bwana bwa bula, mo mikyeabo badi bapika ba musalu ; bwalo you amapwexebwa muntu kudiyi, kudiyi kabidi kwamatekyebwayi yi bupika.

²⁰ Bwalo panakala bamakwongoloka ku mbindu ya loboko ku kilubukilu kia Fumu yi Mupandixi Yisu Kalistu, akali bamadingibwa yi bamapwexebwa kudiyo, mwakadilu ăbo ă kunyuma ămadika mwakadilu ăbo ă buxi bubi.

²¹ Kuxedika loko ku bwalo bwabo kumoni kulubukwa ncila a nkwami ; kumoni kumulubukwa buxi, yi kupiñana kunyuma ku mulangu ă babala ăkabalongolebwa.

²² Mwele ou ă sôsôlwo ămabafikila ene, Yimbwa amapinana kabidi ku kuluka kwanci, yi ngulubi a mbuxi akakusudibwa ku kudifunda kwanci mu bitoto.