2 KOLINTI 4 - Disambi Dipyadipya

¹ MBWÔSO bwalo bututani yi busadi bobu, yi bea bitwamakwombwelebwa mwengo, ndo bitutasopwangwa.

² Kate twamanyañana malo masokoka a bundu, yi katusokwenda yi buluba, yi katusokwata diyi dia Ncembi yi mancanga ; kate pa kwebesa sôsôlwo, tudi mu kwalakanisa kilubukilu kia munda kia muntu mwoso ku meso a Ncembi, ku bwalo bwecu.

³ Mo ndo losangu lwecu lunengela lwamabukidibwa, lwamabukidibwa mu bantu bancimina ;

⁴ bamaxipibwa meso munda mwabo a nkanyi ya bantu batasokwetabusa, kudi ncembi a loboko lolu ; ximbi obo kaikai a losangu lunengela lwa dikai dia Kalistu, udi kifwanisa kia Ncembi, uxebalumukila.

⁵ Bwalo bututasokwambila bwalo bwecu mikyecu, kate Kalistu Yisu, ene, Fumu ; yi mikyecu ene, basadi benu ku bwalo bwa Yisu.

⁶ Bwalo Ncembi you, akatôya ene, obo alumuki mu mwedima, amalumusa obo mu micima yecu ndo kubatusa obo kaikai a kilubukilu kia dikai dia Ncembi mu mpala a Yisu Kalistu.

⁷ Mo twapwangata bodidi bobu mu mpamba ya dibumba, bixeakala ngulu bungi bungi ndo ya Ncembi, kumoni yecu.

⁸ Twamannibwa ku mwanca mwoso, kate katusodingibwa kô ; twamantunkantunka, kate katusodixengaxenga ;

⁹ twamakwapacibwa, kate katusokadeyebwa ; twamaxindibwa paxi, kate katusoxipibwa ;

¹⁰ matuku moso tudi mu kucwala kufwa kwa Yisu mu mumbidi, bixekwebexebwa kabidi môyo ă Yisu mu mumbidi ěcu.

¹¹ Bwalo bwecu bwa coco batani yi môyo, twamalongolebwa ku lufu matuku moso ku bwalo bwa Yisu, bixekwebexebwa môyo kabidi ă Yisu mu munyu ěcu ă kufwa.

¹² Mbwôso lolo lufu lwamakisañana munda mwecu, mo môyo munda mwenu.

¹³ Mo bwalo bututani yi mucima ou ă kwetabusa (bea biakafundibwa ene, Nakakwetabusa, ndo binakatôya) ; coco kabidi twamakwetabusa, mbwôso twatôya kabidi.

¹⁴ Bwalo butwalubukwa ene, you akabisa Fumu Yisu unatubisa kabidi yi Yisu, yi unatuteka ku mpala yinenu ndongo.

¹⁵ Bwalo budi bintu bioso ku micwe yenu ; mo nako lwoxixi, pa kulelañana mu bantu bangi, luxelekolesa biloba bungi bia kulundisa dikai dia Ncembi.

¹⁶ Ku bwalo bobu coco katusopwangwa ; kate isanga muntu ecu a kunci amaxeleleka, a munda amasubixibwa ku dituku ku dituku.

¹⁷ Bwalo kaxitu kyecu kabende ka nkyekyu you kadi mu kutukixila buxitu bungi bungi bwa dikai butena lwedi, bwa kô kô ;

¹⁸ bitudi lolo mu kudingila kumoni bintu biamamonebwa kate bintu bitasomonebwa ; bwalo budi bintu biamamonebwa bia kikondo kibende, mo bintu bitasomonebwa bidi bia kô kô.