1 TIMOTEO 1 - Disambi Dipyadipya

¹ PAULU, mutumibwi a Kalistu Yisu, bwalo bwa mulangu ă Ncembi Mupandixi ecu, yi ă Kalistu Yisu mudingidilu ěcu ;

² kudi Timoteo mwanami a sôsôlwo mu kwetabusa ; lwoxixi, mwengo, polo, kudi Ncembi Tete yi Kalistu Yisu Fumwecu.

³ Bea binakakubondabonda panakadi mu kuya ku Makyedonia, ene, usali ku Efeso, bixelanga owe banga bantu ene, kabeyexi kweyesa kunga,

⁴ yi kababaki tufumu macu ndo mena a batete atena kipwilu kia kupwa, biamafikisa mbata, yi kabasofikisa bunkôngôlo bwa Ncembi budi mu kwetabusa.

⁵ Mo dicina dia mulangu didi nyinga ya mu mucima ă babala, yi kilubukilu kia munda kinengela, yi kwetabusa kutena mancanga ;

⁶ banga bantu pako, bwalo bwamapengowesabo bintu bebi, bamapengowa kuya tabakana ntabakani ya kanana.

⁷ Bakyeba kwakala beyexi ba bwadi, isanga kabasolubukwa ndo bwalo bwatôyabo ndo bintu bebi biamakolesabo kutôya.

⁸ Kaninga coco twalubukwa ene, bwadi bwa Mosese budi kunengela, ndo muntu encenca yinabu bea bialelekyela yi bwadi,

⁹ yi ndo amalubukwa ene, bwadi kabusokwelebwa ku mucwe ă muntu a nkwami, kate ku micwe ya bilema yi batomboki, ku micwe ya bantu batena yi mwosambu ă Ncembi yi boni, ku micwe ya bantu batena babala yi bena mietangu, ku micwe ya baxipanani ba bateteabo yi baxipanani ba bamamabo, ku micwe ya bondi,

¹⁰ ku micwe ya badibi, ku micwe ya babalumi bamadiona mikyeabo yi babalumi, ku micwe ya befi bebeba bantu, ku micwe ya bena ncimi, ku micwe ya bateyañani ba mancanga, yi ndo bunga bwalo bwoso budiko bwamatandañana yi kweyesa kwa loko ;

¹¹ kwamalelekyela yi losangu lunengela lwa dikai dia Ncembi a kiango, lwakatekyebwa ku makaci amene.

¹² Meme mwaxingila biloba akampa ngulu, isanga Kalistu Yisu Fumwecu, bwalo bwakangwencayi muna kibaku, amanguteka ku mudimo ănci ;

¹³ isanga nakadi mutangodi ku buxi, yi mukolomoni, yi mutatisañani ; kaninga nakamonebwa yi mwengo bwalo bunakakwenca nako kutena kulubukwa, pa kusaka yi kwetabusa ;

¹⁴ yi lwoxixi lwa Fumwecu lwakalekola bungi bungi yi kwetabusa yi nyinga bidi munda mwa Kalistu Yisu.

¹⁵ Diyi didi diyi dia ko, diamalelekyela yi kwangacibwa kudi bantu boso, ene, Kalistu Yisu akalwa ku loboko kulwa pandisa boni ; bandi meme mwamukulu abo.

¹⁶ Kaninga ku mucwe ou ndo kunakamonebwa yi mwengo, bixekwebesa Kalistu Yisu kicwandundu kienci kincimancima munda mwamene, mwamukulu a boni, bwalo bwa kielekyexelu kia kwelekyexela bantu baxemwetabuxila kunyuma ku môyo ă kô kô.

¹⁷ Nkyekyu kudi Fumu a mieciya utena yi musalu, utasomonebwa ku meso, kudi you udi Ncembi mutupu, kwakali diedya yi dikai ku mieciya ya mieciya. Amen.

¹⁸ Nkwalanga mulangu ou, mwanami Timoteo, bea bialelekyela yi bidimuxilu biakadimuxibwa ku bwalo bwebe buxi, bixetanda owe mbita unengela kudibio ;

¹⁹ udi mu kubamba kwetabusa yi kilubukilu kinengela kia munda. Banga bamaxindika kieki kudibo, kulexi yi ndo bamapudeya kibusu bwalo bwa kwetabusa ;

²⁰ banga bena noku badi Umenayo yi Alesanda, banamalongola kudi Satana bixekweyexebwabo kumoni kutangola Ncembi.