1 TESALONIKA 5 - Disambi Dipyadipya

¹ MO ku mucwe ă bikondo yi layinga, bakunyi, kanusokwabila mukanda uxenufundidibwa.

² Bwalo bunwalubukwa dyendeli mikyenu ene, Dituku dia Fumu dilolwa bea luna mwefi ku butuku.

³ Panakala badi mu kutôya ene, Polo, yi ene, Ko, ku kikondo kieki kunabalula kufwa kwa kikalankoso, bea loenu kudi mwamukaxi yi difu ; yi kabanapanduka pô.

⁴ Kaninga nonu, bakunyi, kanuna ku mwedima bixenutongola dituku dedi bea biamatongolebwa mwefi.

⁵ Bwalo bunudi bana ba obo bungi bwenu, yi bana ba munyinya ; katuna bena butuku ndo bena mwedima.

⁶ Mbwôso katuladi tulu bea biencenca banga bantu, kate tudingili ; twakali yi mulangu.

⁷ Bwalo bwa bantu balala tulu, bamalala ku butuku ; yi bobo bakolwa nkolwa ya malufu, bamakolwa ku butuku.

⁸ Kaninga coco, bwalo bututani bena munyinya, twakali yi mulangu ; tuteki kisamuninu kia kwetabusa yi nyinga ku kiedi ; yi tuteki kifulu ku mucwe kia mudingidilu ă kupandixibwa kwa môyo.

⁹ Bwalo butasotunamuna Ncembi ku bisusu, kate ndo kwangata kupandixibwa kwa môyo kudi Fumwecu Yisu Kalistu,

¹⁰ akatufwila bituxesangila yinanci ku môyo, ndo tukiadingila ndo twamalala tulu.

¹¹ Mbwôso nubondanani yi nwabakanani muntu mwoso muna kwanci, bea binwencenca kabidi.

¹² Mo tunwaxengula bakunyi, ene, nulubukwi bantu bakamba kamba pakacikaci penu, badi ku buxi bwenu mu Fumu, banwadimusa ;

¹³ nubaleyileyi yi nyinga mingi ku mucwe ă mudimo ăbo. Nwakali polo mikyenu.

¹⁴ Yi tunwabondabonda bakunyi, ene, nubadimusi bematomboka, nukolesi bantu badi bena bubolu ku micimat nukwati bena kulebela, nwakali yi kicwandundu kudi bantu boso.

¹⁵ Nutebeli, muntu kapingaxidi muntu mwoso bubi bwalo bwa bubi ; kate nulandi bwalo budi kunengela matuku moso, yi kwenu mikyenu yi kudi bantu boso.

¹⁶ Nuxekyeleli matuku moso.

¹⁷ Nulombi kangala kangala.

¹⁸ Nuxingi biloba mu bwalo bwoso, bwalo budi nyinga ya Ncembi noku mu Kalistu ku bwalo bwenu.

¹⁹ Kanupudikixi Mwoxixi.

²⁰ Kanutamuni meyi a badimuxi.

²¹ Nwelekyesi malo moso ; nunamati kudi bwalo budi kunengela.

²² Nuncili butonga bwoso bwa bubi.

²³ Yi Ncembi a polo mikyenci anubaloli dyendeli ; yi kidimu kienu kincimancima, yi mucima ěnu, yi mumbidi ěnu bimunibwi, kutena bwalo pôi ku kilulu kia Fumwecu Yisu Kalistu.

²⁴ Yei udi muna kibaku unwabikila, unakwenca nako kabidi.

²⁵ Bakunyi, nutulombeleli.

²⁶ Nubisi bakunyi boso yi kunyita kwa babala.

²⁷ Nwatôyela kudi Fumu ene, Mukanda ou ăbadidibwi bungi bwa bakunyi.

²⁸ Lwoxixi lwa Fumwecu Yisu Kalistu Iwakali yinenu.