1 TESALONIKA 4 - Disambi Dipyadipya

¹ MBWÔSO tunwalomba kabidi bakunyi, yi tunwabondabonda mu Fumu Yisu ene, bea binwakangata kutudi munuxekwenda yi munuxexekyelesa Ncembi,—bea binudi mu kwenda lolo,—ndo binuxelekola noku bungi bungi.

² Bwalo bunwalubukwa milangu yitwakanulanga kudi Fumu Yisu.

³ Bwalo budi nyinga ya Ncembi, nonu kubalolebwa, binuxencila diendela ;

⁴ muntu mwoso enu alubukwi kwakala yi mumbidi ănci mubalola yi diedya ;

⁵ kumoni yi nyinga ya bwefi bea Mabila atasolubukwa Ncembi.

⁶ Muntu kadikixi muna kwanci kanana ku bwalo bobu, kamufini ; bwalo budi Fumu musombolexi ku malo aa noku moso ; bea bitwakanudimusa yi bitwakanutôbôlela ntôbô.

⁷ Bwalo butasotubikila Ncembi ku lobindu, kate ndo kubalolebwa.

⁸ Mbwôso you atamuna kasotamuna muntu, kate Ncembi, unupapa Mwoxixi anci a babala.

⁹ Mo ku bwalo bwa nyinga ya bakunyi, kanusokwabila muntu kunufundila ; bwalo bunwamakweyexebwa kudi Ncembi ndo kunangañana.

¹⁰ Yi nwencenca noku sôsôlwo ku bwalo bwa bakunyi boso badi mu bungi bwa Makyedonia. Mo tunwabondabonda bakunyi, nulekoli noku bungi bungi ;

¹¹ lomo lwenu lwapemi ndo kwakala yi polo, yi kunama bwalo bwenu mikyenu ; kusala mudimo yi makaci enu, bea bitwakanutôyela ;

¹² binuxekwenda yi nkwami ku meso a bantu badi kunci, yi binutaxekwayila yi kintu kioso.

¹³ Kaninga katusonanga nonu kwakala yi bwilwa, bakunyi, bwalo bwa bantu bamalala tulu ; kanudidi bea banga bantu batena yi mudingidilu.

¹⁴ Coco ndo twamakwetabusa ene, Yisu akafwa yi akabika kabidi,—mo nako kabidi bobo bamalala tulu mu Yisu,—Ncembi unabacwala yinanci.

¹⁵ Bwalo butunwatôyela ku diyi dia Fumu ene, Coco badi yi môyo, bamasala pôi kilulu kia Fumu, kabanabayila buxi pô bamalala tulu.

¹⁶ Bwalo bunapweka Fumu mikyenci mu diulu, yi mwongoma, yi diyi dia mwangele munene, yi mpungi a Ncembi ; yi bafu bamafwa mu Kalistu banabika buxi.

¹⁷ Kunyuma, coco badi yi môyo bamasala banakwacibwa yinabo ndongo mu mabaxi, kuya pomana yi Fumu kulu ; yi mo nako tunakala yi Fumu kô kô.

¹⁸ Mbwôso nubondanani yi meyi aa.