1 TESALONIKA 2 - Disambi Dipyadipya

¹ BWALO bunwalubukwa mikyenu, bakunyi, dia mubwelelu ě cu kwenu ene, kawakadi kanana.

² Kate bitwakadi twamatata buxi yi twamakolomonebwa ku Filipi, bea binwalubukwa, twakakolesa mucima ěcu mu Ncembi ecu ndo kunwambila losangu lunengela lwa Ncembi yi kusama kungi.

³ Bwalo butakadi dikwami diecu dia mancanga, ndo dia lobindu, ndo yi mwalo ;

⁴ kate, bwalo butwamakwalakanibwa kudi Ncembi, losangu lunengela kunamibwa kutudi, ndo butwatôya ; kumoni bea kuxekyelesa bantu, kate Ncembi you udi mwelekyexi a micima yecu.

⁵ Bwalo bututakadi ku kikondo kioso yi meyi a soso, bea binwamalubukwa ; ndo yi lodimbu lwa bwefi kumoni, Ncembi ndo mutôbôdi ;

⁶ ndo kupalala kinemu kudi bantu kumoni, isanga kunudi ndo kudi banga bantu, pakadi ambeci tuxebaka buxitu bwalo bututani batumibwi ba Kalistu.

⁷ Kate twakadi kulebela pakacikaci penu, bea luna mubungudi amabungula bana banci.

⁸ Mo nako, bwalo butwakanuleyaleya, twakaxekyelela kunulongola kumoni losangu lwa Ncembi lutupu, kate mieyo yecu kabidi, bwalo bunwakatudikila nyinga mingi.

⁹ Bwalo bunwelela nkambi yecu yi mudimo ěcu nkanyi, bakunyi ; yi ku butuku yi ku munyinya ndo kutwakakisa kisa, bitutaxebaka buxitu kudi muntu mwoso kwenu ; yi twakanwambila losangu lunengela lwa Ncembi.

¹⁰ Nonu nudi batôbôdi yi Ncembi kabidi, mutwakadi yi mwosambu ă babala yi ă nkwami utena yi bwalo bubi ku mpala yenu bamakwetabusa ;

¹¹ binwalubukwa mutwakadi yi muntu mwoso enu bea tete yi bana banci ; tudi mu kunubondabonda, yi kunusubisa, yi kunutôbôlela,

¹² ene, nuxekwenda bea bialelekyela yi Ncembi amanubikila ku bufumu bwanci yi ku dikai dienci.

¹³ Yi ku bwalo bobu kabidi ndo kutwaxinga Ncembi biloba kangala kangala, ene, panwakangata diyi dia losangu kutudi, dia Ncembi, nwakadiangata kumoni bea diyi dia bantu, kate bea bididio sôsôlwo diyi dia Ncembi ; diamakisañana munda mwenu bamakwetabusa.

¹⁴ Bwalo bunwakalwa bokodi, bakunyi, ba bikokye bia Ncembi bidi mu Kalistu Yisu mu Yudiya ; bwalo bunwamatata bintu kudi bena bubila bwenu bea biamatatabo kudi bena Yuda ;

¹⁵ bakaxipa Fumu Yisu yi badimuxi ; yi bamatupiya coco ; kabasoxekyelesa Ncembi, yi batanda yi bantu boso ;

¹⁶ bamatukaka, katwambidi Mabila diembi bixepandixibwabo, bixekwombudisabo mabi abo matuku moso ; kaninga bisusu biamalwa kudibo dyendeli.

¹⁷ Kaninga coco, bakunyi, twamanamunibwa kunudi kakondo kabende, (mo ku mumbidi, kumoni ku mucima,) twakakyeba kungi kunumona ku mpala yenu yi nyinga mingi.

¹⁸ Mbwôso twakapalala kulwa kunudi, isanga meme Paulu, dia buxi yi diamubidi ; yi Satana akatukanda.

¹⁹ Bwalo budi mudingidilu ecu beci ? ndo kiango kiecu ? ndo kilongo kiecu kia kuxekyelela ? Ka nonu, isanga nonu, ku mpala a Fumwecu Yisu ku kilulu kienci ?

²⁰ Bwalo bunudi nonu muxekyelelu ěcu yi kiango kiecu.