1 PITA 4 - Disambi Dipyadipya

¹ MBWOSO, bwalo bwamatata Kalistu mu munyu, nudilungiki mikyenu yi lukanyi lolu kabidi bea yi bipiko bia mbita ; bwalo you amatata mu munyu amamana yi bubi ;

² kumoni kwakaia kinga kicini kia kikondo kienci mu munyu ndo kusadila xindilu ya bantu, kate nyinga ya Ncembi.

³ Bwalo bwamakuka kikondo kia kalikali, coco kukisa nyinga ya mabila, kitwakakwenda mu madibi, xindilu, nkolwa ya malufu, kusa kwa masa, bitula bia malufu, yi bixingilu bia ngixi bidi nyete.

⁴ Bobo pako bamakamakama, bwalo bunutasoya yinabo mbilu mbilu ku muyi ou ă bitoto, yi bamatôya malo mabi ku bwalo bwenu ;

⁵ baba banasakola bwalo bwabo kudi you utanalanda kusambola yi bena môyo yi bafu.

⁶ Ku mucwe ou kwakakwambidibwa bantu losangu lunengela bamafwa kabidi, bixebelebwabo yi kubelebwa kwa bantu mu munyu, mo bixeakalabo yi môyo luna biamalelekyela yi Ncembi mu kidimu.

⁷ Mo ku sula kwa bintu bioso kudi pepe ; mbwôso nwakali bena bweso, yi bena milangu bwalo bwa ndombu kulomba.

⁸ Buxi bwa bintu bioso, nwakali yi mulukutu mikyenu ă nyinga kunangañana ; nyinga yamancibika kibumbu kia mabi.

⁹ Nwangatanani ku ngendo kutena kupindula mapindu.

¹⁰ Bea biapwangata muntu mwoso dilongi, adilongoli pakacikaci penu, bea bankôngôlo banengela ba lwoxixi lwa Ncembi lwa ntonga yi ntonga.

¹¹ Ndo muntu mwoso atôya, atôyi bea yi mitôyelu ya Ncembi ; ndo muntu mwoso asala mudimo ă Ncembi, bea ku ngulu yipapa Ncembi ; bixetumbixibwa Ncembi mu bintu bioso kudi Yisu Kalistu, udi yi dikai yi mpinyu ku mieciya ya mieciya. Amen.

¹² Banangibwi, kanukamini kielekyexelu kia mudilu, kidi ndo kunwelekyesa, bea ndo kikamakama kiamanuponena ;

¹³ kate bwalo bunwabanyañana yi masama a Kalistu, nuxekyeleli ; binuxexekyelela ku kikondo kia kiebexelu kia dikai dienci yi kiango kingi.

¹⁴ Ndo nwamakyec bwa mu dina dia Kalistu, balwangwasanibwi nonu ; bwalo bwamakwomowa Mwoxixi a dikai yi a Ncembi kulu kwenu.

¹⁵ Kakuxeakala muntu umoumwe yinenu amatata luna muxipanani, ndo luna mwefi, ndo luna mukixi a bwalo bubi, ndo luna muna isoka mu malo a babene ;

¹⁶ mo akali luna muna Kalistu, kafwi bundu ; mo atumbisi Ncembi mu dina dedi.

¹⁷ Bwalo bwamafika kikondo, lopelo kubangola ku ncibo a Ncembi ; mo ndo ku buxi kutudi, kixikidilu kiabo kinakala beci batasokwedeya losangu lunengela lwa Ncembi ?

¹⁸ Yi ndo muna nkwami amapandixibwa yi kusama, you utena yi Ncembi yi you udi mwoni unamoneka kupai ?

¹⁹ Mbwôso bobo kabidi bamatata bwalo bwa nyinga yamakyeba Ncembi bateki mieyo yabo, pa kwenca kunengela, ku makaci a Mupangi a kibaku.