1 KOLINTI 4 - Disambi Dipyadipya

¹ MUNTU mwoso abali ku bwalo bwecu bea bwa basadi ba Kalistu, yi bankôngôlo ba malo a bwisa a Ncembi.

² Kunu lolo, bwalo bwa bankôngôlo, kwamakyebebwa ene, muntu uxeakala muna kibaku.

³ Mo ku bwalo bwamene kudi mo kalo kabende nci, meme kusambolebwa kunudi, ndo ku kimu kia bantu ; ya, meme kisodisambola mikyemi.

⁴ Meme kisodilubukwa ene, bwalo budi yinami ; kaninga kisosuwixibwa noku ; mo yei ungwasambola udi Fumu.

⁵ Mbwôso kanubedi bwalo bwoso buxi bwa kikondo, pôi diba dilolwa Fumu, unasokolola bintu bisokoka bia mwedima, unakwebesa nkanyi ya micima ; yi ku kikondo kieki kunakala muntu mwoso yi mwalakanu kudi Ncembi ămakwalakanibwayi.

⁶ Bintu bebi pako bakunyi, ndo binamakulumuna ku mwele ku bwalo bwamene yi bwa Apolo, ku micwe yenu ; binuxekweya kutudi, kumoni kudika bintu biamafundibwa ; bitaxedibandisa muntu umoumwe ku mpala a muna kwanci.

⁷ Amakuxiyananisa ñani ? Yi owe udi yi kintu kai kitangacili ? Kaninga ndo wamakiangata kukai wañana mwanu bea muntu utakiangata ?

⁸ Nonu nwamakwokuta isanga nkyekyu ; nudi yi madidi isanga nkyekyu ; nwamadidila bufumu kutena coco ; yi meme ngwakyeba nuxeakala bafumu, bituxeakala bafumu yinenu kabidi ndongo.

⁹ Bwalo bungwakisa ene, Ncembi amatwebesa coco batumibwi bantu ba ku sula, bea luna bena yipanga ; bwalo butwamatekyebwa kimonenu kudi loboko, yi kudi bangele, yi kudi bantu.

¹⁰ Coco tudi badibi ku mucwe ă Kalistu, mo nonu nudi yi bwinu mu Kalistu ; coco tudi kulebela, mo nonu nudi yi ngulu ; nonu nwamanemekyebwa, mo coco twamakyesolebwa.

¹¹ Isanga pôi ola you twombombwa ncala, yi nyota, yi tudi mataka, yi twamakumibwa mapi, yi twamasambasamba kutena ncibo ;

¹² yi fwakamba kamba, tudi mu kwenca mudimo yi bianca biecu mikyecu. Pa kutangolebwa, coco twamalwangwasana ; pa kukolomcnebwa, twamatata yi bwika ;

¹³ pa kukixibwa, twamabondabonda. Twamalwa bea mbindu ya loboko, bea mayedi a bintu bioso pôi dituku dedi.

¹⁴ Kisofunda bintu bebi ndo kunufwisa bundu, kate nwadimusa bea bana bamene banangibwi.

¹⁵ Bwalo isanga nudi yi beyexi nkone disangi mu Kalistu, kanuna yi batete bangi ; bwalo bunakanulela mu Kalistu Yisu ku losangu lunengela.

¹⁶ Mbwôso meme nwabondabonda ene, nwakali bokodi bamene.

¹⁷ Ku mucwe ou ndo kunamanutumina Timoteo, udi mwanami munangibwi yi muna kibaku mu Fumu, unanwelesa miesambu yamene nkanyi idi mu Kalistu, luna bingweyesa ku kidi kioso mu kikokye kioso.

¹⁸ Mo banga bamadibandisa, kulexi yi ndo meme kinalwa kwenu.

¹⁹ Kaninga nakulwa kwenu mo nkyekyu, ndo Fumu ananga ; yi nakulubukwa, kumoni diyi diabo dia bantu bamadibandisa, kate ngulu.

²⁰ Bwalo budi bufumu bwa Ncembi, kumoni yi diyi, kate yi ngulu.

²¹ Nwakyeba beci ? Meme nxelwa kunudi yi kanonge ? sungu yi nyinga, yi mucima ă diedya ?