Luka 9 - NTETO ĨMBEGA TA BŨRĨA YANDĨKIRWE NĨ LUKA

Jesũ gũtũma arutwa barĩa ĩkũmi na baĩrĩ

¹ Jesũ nĩ etire arutwa barĩa ĩkũmi na baĩrĩ amwe, na akĩbaa inya na wathani bwa kwĩnga nkoma jia mĩthemba yonde, na kũragithia mĩrimũ.

² Agĩcoka akĩbatũma bathi bakaunjie nteto jia Ũnene bwa Ngai, bakĩragithagia antũ barĩa arũaru.

³ Akĩbeera atĩrĩ, “Bwatua kũthi rũgendo bũtĩgekamatĩre no mbi; bũtĩkajũkie rũthanju kana kĩondo, irio kana mbeca, na bũtĩgakamate nguo jiĩrĩ.

⁴ Mũjiĩ ũrĩa bũkagwatwa ũgeni, ĩkaragani ku nkinya rĩrĩa bũkauma ntũũra ĩu.

⁵ Na kũrĩa antũ bakarega kũbũgwata ũgeni rĩ, bume ku na bũbaringaringĩre tĩĩri ya magũrũ menu bũkiumagara, ũrĩ ta ũira atĩ batabũkenia.”

⁶ Arutwa bakiumagara bakĩthi ntũũrani jionde bakĩunjagia Nteto Ĩmbega na bakĩragithagia arwaru gũntũ kunde kũrĩa bakinyaga.

Herode gũkangaa nĩ nteto jiĩgiĩ Jesũ

⁷ Rĩu Herode, ũrĩa warĩ mũtongoria wa Galili, nĩ egujaga maũntũ marĩa Jesũ arũthaga, na makamũkangaiya mũno. Gĩtũmi nĩ atĩ kũrĩ baugaga nĩ Johana Mũbatithania ũriũkĩte,

⁸ bangĩ bakauga nĩ Elija mũcoku, o na bangĩ bakauga nĩ ũmwe wa iroria irĩa jia tene ũriũkĩte.

⁹ Herode akĩuga, “Nĩndarengithirie Johana kĩongo; ĩndĩ ũũ nkwĩgua nteto jiae nĩka arĩ ũ?” Kwogu Herode nĩ acũaga bũrĩa ankionana na Jesũ.

Jesũ kũrera antũ ngiri itano

¹⁰ Rĩrĩa atũmwa bacokire nĩberire Jesũ bũrĩa bunde baarũthĩte. Nawe akĩbajũkia barĩ bonka akĩthi nabo, berekeere taũni nene ĩrĩa yetagwa Bethisaida.

¹¹ Rĩrĩa antũ bamenyire Jesũ akũthi gĩkĩmũthingata. Jesũ akĩbagwata ũgeni na akĩbarutana nteto jia Ũnene bwa Ngai, akĩragithagia barĩa baarĩ barũaru.

¹² Gũgũtua gũtuka arutwa barĩa ĩkũmi na baĩrĩ nĩ bathire kĩrĩ Jesũ bakĩmwĩra, “Ĩra antũ baba bathi ntũũrani na mĩgũndani ĩrĩa ĩrĩ gũkuĩ, bagacũe gĩakũrĩa na gwa kũmama, nĩũntũ gũkũ tũrĩ gũtĩtwĩre antũ.”

¹³ Ĩndĩ Jesũ akĩbacokeria, “Bwiũ bacũĩreni gĩa kũrĩa.” Bakĩmwĩra atĩrĩ, “Gĩa kũrĩa kĩrĩa twĩ nakĩo nĩ mĩgate ĩtano na samaki jiĩrĩ akĩ. Rĩu no anga tũthiire kũgũrĩra antũ baba bonde irio.”

¹⁴ Antũ bau baarĩ arũme ta ngiri itano. Jesũ akĩĩra arutwa bae, “Ĩkariani antũ ndĩ, bũbekarie ikundi jia antũ mĩrongo ĩtano ĩtano.”

¹⁵ Arutwa bakĩrũtha ũgu berirwe, bagĩĩkarithia antũ bonde ndĩ.

¹⁶ Na rĩ, Jesũ akĩjũkia mĩgate ĩu ĩtano na samaki jiĩrĩ, akĩraitha ĩgũrũ akĩitharima, akĩing'enyũranga agĩcoka akĩinenkera arutwa bae bagaĩre antũ.

¹⁷ Bonde bakĩrĩa na bakĩnyira; arutwa bakĩĩthĩrania ing'enywa irĩa jiatigarĩte ikĩjũria ikabũ ĩkũmi na jiĩrĩ.

Petero kuuga Jesũ nĩwe Mesia

¹⁸ Ntukũ ĩmwe Jesũ nĩ arombagĩra gũntũ gũtarĩ na antũ, na arutwa baarĩ akuĩ nawe. Akĩbaũria atĩrĩ, “Antũ baugaga ni ndĩ ũ?”

¹⁹ Arutwa bakĩmũcokeria, “Baugaga gwe nĩgwe Johana Mũbatithania, ĩndĩ kũrĩ bangĩ baugaga ũrĩ Elija, o na bangĩ bakauga gwe ũrĩ ũmwe wa iroria irĩa ia tene, ariũkĩte.”

²⁰ Jesũ agĩcoka akĩbaũria, “Bwiũ nabwi bugaga ndĩ ũ?” Petero akĩmũcokeria, “Gwe nĩgwe Kristũ wa Ngai.”

Jesũ kwaria nteto ya kũthĩnua na gũkua kwae.

²¹ Ĩndĩ Jesũ akĩbakaania akĩbeera batĩkere muntũ o na ũrĩkũ nteto iu.

²² Akĩthi na mbere kũbera ũũ, “Mwana wa Muntũ no mwanka akathĩnua, na aregwe nĩ akũrũ na athĩnjĩri Ngai barĩa anene na arutani ba Watho. Akaũragwa ĩndĩ agacoka ariũkue ntukũ ya ithatũ.”

²³ Agĩcoka akĩĩra antũ bonde atĩrĩ, “Muntũ ũrĩa ũkenda kũndingata nĩ erege we mwene, ajũkie mũtharaba wae o ntukũ, andingate.

²⁴ Nĩũntũ rĩ, muntũ ũrĩa ũkenda kwonokia mwoyo wae agaũta; ĩndĩ ũrĩa ũgata mwoyo wae nĩũntũ bwakwa akawonokia.

²⁵ Atĩrĩ, kũrĩ na baita ĩrĩkũ kethĩrwa muntũ akegwatĩra ndĩ yonde ĩndĩ ate mwoyo wae kana ethirie we mwene?

²⁶ Nĩkwĩthĩrwa muntũ ũrĩa ũgaconoka nĩũntũ bwakwa na nĩũntũ bwa jiugo jiakwa, Mwana wa Muntũ akamũconokera rĩrĩa akeja na ũkumio bwae o amwe na bwa Ĩthe na bwa araika barĩa atheru.

²⁷ Ndabwĩra atĩrĩ na ma, kũrĩ bo barũngi aa batĩgakua batĩonete Ũnene bwa Ngai.”

Jesũ kũgarũrũka

²⁸ Ntukũ ta inyanya kuuma Jesũ akwarĩa nteto ino nĩ ajũkirie Petero na Johana na Jakubu, bagiitia kĩrĩmani kũromba.

²⁹ Na rĩrĩa Jesũ aarombaga ũthiũ bwae bũkĩgarũrũka, najio nguo jiae ikĩerua cwa!.

³⁰ Na rĩ, antũ baĩrĩ, Musa na Elija, bakĩonekana bakĩaria nawe,

³¹ bakengete mũno, bakĩaragia na Jesũ nteto jia gĩkuũ kĩae kĩrĩa aarĩ mũragĩrwa Jerusalemu.

³² Kagiita kau Petero na arutwa bau bangĩ nĩ baarĩ na toro nyingĩ mũno. Rĩrĩa baũkĩĩre bakĩona ukumio bwa Jesũ na bwa antũ bau baĩrĩ aarũngi nabo.

³³ Na rĩrĩa antũ bau batuire gũtigana na Jesũ Petero akĩĩra Jesũ, “Mwathi wakwa, nĩ wega turĩ aa; tiga twake tũnyomba tũthatũ, kamwe gaaku, kangĩ ka Musa na kau kangĩ ka Elija.” Ĩndĩ Petero atamenyaga bũrĩa augaga.

³⁴ Na akĩaragia o ũgu, ĩtu rĩkĩbakunĩkĩra, na arutwa bakĩmaka mũno rĩrĩa Musa na Elija baũrĩĩre ĩtuni rĩu.

³⁵ Mũgambo ũkiuma ĩtuni rĩu, ũkiuga atĩrĩ, “Ũũ nĩwe Mwana wakwa ũrĩa nduurĩte, muthikagĩĩrieni!”

³⁶ Mũgambo ũu ũgũtiga kwĩguĩka noka bonire Jesũ arĩ wenka. Bagĩkira ki, na ĩgiitani rĩu bateera muntũ o na ũrĩkũ bũrĩa bonire.

Jesũ kũragithia Kaana kaarĩ na nkoma

³⁷ Ntukũ ĩu yarũmĩĩrĩte Jesũ na arutwa bau bae bathatũ nĩbemanire kuuma kĩrĩmani. Antũ baingĩ mũno bakĩmũtũngatũnga.

³⁸ Muntũ ũmwe warĩ kũu kĩrĩndĩni akiugĩĩria akiuga, “Mũrutani! Ndagũkaĩra ũka ũndaithĩre mwana wakwa nĩ tontĩ ntĩ ũngĩ tiga we!

³⁹ Rĩmwe agwatagwa nĩ nkoma ĩkamũkaithia; ĩgatũma akenyongoora na ikamũmagaria ta muntũ ũrĩ na kĩbaba, nkinya akaruta mũbũyũ. Ĩkamũthũkangia mũno, na ĩtĩmũtigangaga na mpũĩ.

⁴⁰ Nkaĩre arutwa baku bamĩnge ĩndĩ batĩũmbire.”

⁴¹ Jesũ agĩcokia, “Biũ rũjiaro rũtĩ wĩtĩkio na rũremu; Ngatũũrania nabi ndĩbũcaĩrĩte nkinya rĩ?” Agĩcoka akĩĩra muntũ ũu, “Reete mwana waku aa.”

⁴² Rĩrĩa kamwana kau kathiĩte kĩrĩ Jesũ nkoma ĩu ĩgĩkagera ndĩ gakĩambĩĩria kũgera thari. Ĩndĩ Jesũ akĩgondokera nkoma ĩu, akĩragithia kamwana na agĩcoka agĩgacokia kĩrĩ ĩthe.

⁴³ Antũ bonde bakĩrigara nĩũntũ bwa inya nene ya Ngai. Ĩndĩ rĩrĩa antũ bonde barigarĩtue nĩ maũntũ monde marĩa arũthaga, Jesũ nĩ erire arutwa bae,

Jesũ kwaria kaĩrĩ nteto jia gũkua kwae

⁴⁴ “Thikĩĩriani na bũgwate wega bũrĩa nkuga: Atĩrĩ, Mwana wa Muntũ nĩengerie kũnenkanĩĩrua njarani jia antũ.”

⁴⁵ Ĩndĩ arutwa batataũkĩrwa nĩ bũrĩa Jesũ aberaga, tontũ baarĩ aithe ũmenyo bwa ũntũ bũu, na nĩbakĩraga kũmũũria bũrĩa endaga kuga.

Nũũ mũnene nkũrũki

⁴⁶ Na rĩ, nĩkwagĩĩre na nkarari gatagatĩ ka arutwa, bakĩenda kũmenya nũũ aarĩ mũnene nkũrũki ya barĩa bangĩ.

⁴⁷ Rĩrĩa Jesũ amenyire bũrĩa bagwĩciria nĩ ajũkirie kaana agĩkaiga au akuĩ nawe,

⁴⁸ akĩbeera, “Muntũ o wonde ũrĩa ũgwataga kaana ta gaka ũgeni riĩtwani rĩakwa nĩni agwata ũgeni. Na ũrĩa wangwata ũgeni nĩ ũrĩa wantũmire agwataga ũgeni. Nĩũntũ rĩ, ũrĩa mũnini buru gatagatĩ kenu nĩwe mũnene nkũrũki yenu bwinde.”

Ũrĩa ũtĩ mũnthũ wenu nĩ mũcoore wenu

⁴⁹ Johana akĩmwĩra, “Mwathani, nĩtwonire muntũ akĩnga nkoma agĩtũmagĩra riĩtwa rĩaku, na twamũkania, nĩũntũ tĩ ũmwe wa jietũ.”

⁵⁰ Ĩndĩ Jesũ akĩmwĩra atĩrĩ, “Bũtĩgakanie muntũ ta ũu, nĩũntũ muntũ ũrĩa ũtĩ mũnthũ wenu nĩ mũcoore wenu.”

Asamaria kũrega kũgwata Jesũ ũgeni

⁵¹ Rĩrĩa kagiita ka Jesũ ga gwitia ĩgũrũ gakuĩrĩĩrie nĩ abangire athi Jerusalemu.

⁵² Agĩtũma antũ bathi barĩ mbere yae. Bagĩtonya ntũũrani ĩmwe ya Asamaria nĩkĩo babangabange arĩa Jesũ ankĩmama ũtukũ ũu.

⁵³ Ĩndĩ antũ ba ntũũra ĩu nĩbaregire kũmũgwata ũgeni, nĩũntũ nĩ athiĩte erekeere Jerusalemu.

⁵⁴ Rĩrĩa arutwa bae, ta bo Johana na Jakubu bonire ũgu bakĩũria Jesũ, “Mwathani, nĩ ũkwenda twĩtie mwanki kuuma ĩgũrũ, ũbathirie?”

⁵⁵ Jesũ akĩbagarũkĩra akĩbagũkia.

⁵⁶ Bagĩkũrũka bakĩthi ntũũrani ĩngĩ.

Barĩa babwĩri gũtuĩka athingati ba Jesũ

⁵⁷ Na rĩrĩa Jesũ na arutwa bae baarĩ njĩrani bathiĩte, muntũ ũmwe akĩarĩria Jesũ, akĩmwĩra, “Ngakũthingata o kũrĩa kunde ũkathi!”

⁵⁸ Jesũ akĩmwĩra atĩrĩ, “Mbwe irĩ marima ma kũmama, o najio inyoni jia ĩgũrũ irĩ na ntara, ĩndĩ Mwana wa Muntũ atĩ na antũ ankĩnogoka.”

⁵⁹ Agĩcoka akĩĩra muntũ ũngĩ atĩrĩ, “Ndingata!” Ĩndĩ muntũ ũu akiuga atĩrĩ, “Mwathani, tiga mbambe ndi nkathike baaba.”

⁶⁰ Jesũ akĩmwĩra atĩrĩ, “Tigana na akuũ bathike akuũ bao; gwe thi ũkaunjie nteto jia Ũnene bwa Ngai.”

⁶¹ Muntũ ũngĩ nawe akĩĩra Jesũ, “Nĩngũkũthingata Mwathani; ĩndĩ tiga mbambe ndi mũjiĩ gwakwa nkeere antũ bakwa batigwe wega.”

⁶² Ĩndĩ Jesũ akĩmũcokeria, akĩmwĩra atĩrĩ, “Gũtĩ muntũ ajũkagia mũraũ ambĩria kũrĩma ĩndĩ acoka kwĩũgũra ũbuĩrĩte gũtonya Ũneneni bwa Ngai.”