Luka 8 - NTETO ĨMBEGA TA BŨRĨA YANDĨKIRWE NĨ LUKA

Aka barĩa bagendanagia na Jesũ

¹ Kagiita kanini gakũthira Jesũ nĩ athiĩrĩre mataũnini manene na ntũũrani, akĩunjagia Nteto Ĩmbega ya Ũnene bwa Ngai. Arutwa bae barĩa ĩkũmi na baĩrĩ nĩbathijanĩtie nawe,

² o na aka bamwe barĩa baragithĩtue nkoma na mawonje. Nabo nĩbo Maria, ũrĩa wetagwa Magidalina, na no we warutĩtwe nkoma mũgwanja,

³ Joana mũka wa ntungata ya Herode ĩrĩa yetagwa Kuza, Susana, na bangĩ baingĩ. Aka baba nĩbamenyagĩĩra Jesũ na arutwa bae, bakĩbatugaga na into jiao eene.

Ngerekano ya mũandi wa mbeũ

⁴ Antũ nĩ baumire mataũnini nkũrani nkũrani bakĩthĩ kĩrĩ Jesũ, na rĩrĩa bethĩranire bagĩtuĩka antũ baingĩ mũno Jesũ nĩ aberire na ngerekano:

⁵ “Mũrĩmi nĩ aumagarire akĩthi kũanda mbeũ. Na rĩrĩa aandaga mbeũ imwe ikĩgwa njĩrani, igĩkinyangwa na irĩa jiĩngĩ ikĩrĩwa nĩ inyoni.

⁶ Jiĩngĩ ikĩgwa maigani, na rĩrĩa jiamerire ikĩũma nĩ kwaga rũjĩ.

⁷ Najio jiĩngĩ ikĩgwa kũrĩa kwarĩ na mĩgua, ikĩmeranĩria amwe, ikĩmuntangwa nĩ mĩgua ikĩũma.

⁸ Jiĩngĩ nĩ jiagwĩre mũthetuni ũrĩa mũnoru na igĩkũra, ikĩjiara o mpĩndĩ maita ĩgana.” Akĩrĩkĩĩria akiuga na mũgambo mũnene atĩrĩ, “Ũrĩa ũrĩ na matũ ma kwĩgua nĩ egue.”

Gĩtũmi gĩa gũtũmĩra ngerekano

⁹ Rĩrĩa arutwa bae bamũririe gĩtũmi kĩa ngerekano ĩu,

¹⁰ nĩ aaberire atĩrĩ, “Bwiũ nĩbũetwe ũũgĩ bwa kũmenya ciri jia Ũnene bwa Ngai, ĩndĩ mbaragĩria barĩa bangĩ na ngerekano nĩkenda baraitha barege kũona na begua barege gũtaũkĩrwa.

Jesũ gũtaũra ngerekano ya mũandi mbeũ

¹¹ “Ngerekano ĩno ĩrĩtaũka ũũ: Mbeũ nĩ kiugo kĩa Ngai.

¹² Mbeũ irĩa jiagũĩre njĩrani nĩ antũ barĩa begujaga nteto jia Ngai ĩndĩ Nkoma akeja akaruta nteto ĩu nkoroni jiao nĩkenda batĩgetĩkie, beja kũonoka.

¹³ Najio irĩa jiagwĩre maigani nĩ antũ barĩa begujaga nteto na bakaijũkia bakenete mũno, ĩndĩ nteto iu ikarega kũgwata nkoroni jiao; betĩkagia kagiita kanini ĩndĩ magerio mabejĩĩra bagatiganĩria wĩtĩkio wao.

¹⁴ Najio mbeũ irĩa jiagwĩre mĩguani ni barĩa begujaga nteto ĩndĩ mĩtangĩko na motonga na ikeno jia gũkũ ndĩ ikabarigicania o kaora, nteto ikaaga kũreta majiaro mĩtũrĩreni yao.

¹⁵ Najio mbeũ irĩa jiagwĩre mũthetuni ũrĩa mũnoru, nĩ antũ barĩa begujaga kiugo kĩa Ngai na bagaking'inyia barĩ na nkoro irĩa mbega na mbathĩki, bagekara bakirĩrĩtie, na bakagĩa na majiaro mega.

Taa ĩtĩkunĩkagĩrwa na ndoo

¹⁶ “Gũtĩ muntũ ũgwatagia taa amĩkunĩkĩra na ndoo kana amiiga rungu rwa gĩtanda. Amigaga antũ ĩgũrũ nĩkenda barĩa bagũtonya nyomba baũmba kwona werũ.

¹⁷ “Gũtĩ ũntũ o na bũrĩkũ bwithe bũtĩkonanua werũni na gũtĩ bwaragua na ciri bũtĩkamenyeka.

¹⁸ “Kwogu bwĩmenyagĩĩreni bũkĩthikĩrĩria kiugo kĩa Ngai, tontũ muntũ ũrĩa ũrĩ na into akongerwa jiĩngĩ, na ũrĩa ũtĩ najio nĩka agatunywa o na irĩa agwĩciiria arĩ najio.”

Gina wa Jesũ na ba mũruagina

¹⁹ Rĩu gina wa Jesũ na ba mũruagina na Jesũ nĩ bathiire kĩrĩ we, ĩndĩ bakĩremwa nĩ kũmũkinyĩra nĩ bũrĩa antũ batĩkanĩte.

²⁰ Jesũ akĩrwa atĩrĩ, “Nyũkwe na ba mũruanyũkwe nĩ barũngi nja, bakĩenda gũkwona.”

²¹ Ĩndĩ we akĩbeera atĩrĩ, “Antũ barĩa begujaga kiugo kĩa Ngai na bagakĩathĩkĩra nĩbo iya na bamũruaiya.”

Jesũ kũmaarĩria rũkũngi

²² Ntukũ ĩmwe Jesũ na arutwa bae nĩbatũire ĩtarũni, nawe akĩbeera, “Tũriũkeni tũthi mũrĩmo ũrĩa ũngĩ wa ĩria.” Bakĩambĩĩria kũrĩũka.

²³ Barĩ rũgendoni kũu ĩriani Jesũ akĩgwatwa nĩ toro, akĩmama. Gũgĩcoka gũkĩgĩa kĩbubani, gĩgĩtindĩka rũjĩ ĩtarũni rĩkĩambĩĩria kwĩjũra rũjĩ, o akuĩ rĩorokera ĩriani. Jesũ na arutwa bakĩthĩrwa barĩ ũgwatini mũnene.

²⁴ Arutwa bakĩthi kĩrĩ Jesũ bakĩmũũkĩria bakĩmwĩra, “Mwathani, Mwathani, nĩ tũkũthira!” Jesũ agĩũkĩra, agĩkania kĩbubani na mĩkuũko mĩnene ya ĩria. Kĩbubani gĩgĩtiga kurutana na ĩria rĩkĩmaarĩra.

²⁵ Agĩcoka akĩũria arutwa bae, “Nĩka wĩtĩkio bwenu bũrĩ kũ?” Ĩndĩ bo bakĩĩgua ũkĩri na bakĩũrania barigarĩte, “Ũũ karĩ ũ, ũkwatha kĩbubani na ĩria na ikamwathĩkĩra?”

Jesũ kũragithia muntũ warĩ na nkoma

²⁶ Jesũ na arutwa bae nĩ bathiire nkinya ntũũra yetagwa Gerasa, ĩrĩa yaarĩ mwerekana na Galili.

²⁷ Jesũ akuuma ĩtarũni agĩkinya ndĩ mpũmũ nĩ atirimirwe nĩ muntũ warĩ na nkoma, wa taũni nene ĩu. Muntũ ũu nĩ athirĩtie kagiita karaja atĩgwĩkĩra nguo, na atekaraga nyomba; atũũraga kũrĩa mbĩrĩra jiarĩ.

²⁸ Rĩrĩa muntũ ũu onire Jesũ akĩambĩĩria kuuga mbu, akĩgwa ndĩ mbere ya Jesũ na akiugĩĩria, “Jesũ Mwana wa Ngai Ũrĩa ũrĩ Ĩgũrũ Mũno, nĩmbi ũkwenda nani? Ndagũkaĩra ũtĩkambangaĩkie.”

²⁹ Muntũ ũu aaragia ũgu nĩũntũ Jesũ nĩ aarĩ akwatha nkoma iu jiume ndani yae. (Nkoma iu nĩ jiamũgwataga maita maingĩ, agekaraga emwoanie na nyororo na mpengũ magũrũ na njara; ĩndĩ agaituĩkangia na nkoma iu ikamwĩngĩĩria rwanda.)

³⁰ Jesũ akĩmũũria atĩrĩ, “Wĩtagwa atĩa?” Muntũ ũu akĩmũcokeria, “Mbĩtagwa mbũtũ.” Aacokirie ũgu nĩũntũ nkoma irĩa jiamũtonyete jiarĩ nyingĩ.

³¹ Nkoma iu igĩkaĩra Jesũ atĩkajiĩngĩrie ĩrimani rĩrĩa rĩtĩ mũthia.

³² O au akuĩ nĩ kwarĩ na gĩkundi kĩa ngũrwe jiarĩjaga rwaruni rwa karĩma. Nkoma igĩkaĩra Jesũ ajiĩtĩkĩĩrie itonye ngũrweni iu, nawe akĩjiĩtĩkĩĩria.

³³ Nkoma ikiuma kĩrĩ muntũ ũu igĩtonya ngũrweni. Gĩkundi kĩonde kĩa ngũrwe gĩkĩthingithũkĩĩra ncurĩrani gĩkĩthũngĩra ĩriani, na ngũrwe iu ikĩũragwa nĩ rũjĩ.

³⁴ Rĩrĩa arĩthi ba ngũrwe iu bonire bũrĩa gwekara bakĩũra, bakĩthi bakĩaragia nteto iu mataũnĩni o na ntũũrani.

³⁵ Nabo antũ bakiuma kwao mĩjiĩ bakĩthi kwĩonera bũrĩa gwekarĩkĩte. Rĩrĩa bakinyire arĩa Jesũ aarĩ bakĩthĩra muntũ ũu nkoma jiarutĩtwe kuuma kĩrĩ we ekarĩte ndĩ magũrũni ma Jesũ, arĩ na nguo na arĩ na kĩongo kĩega. Bakĩgwatwa nĩ ũkĩri.

³⁶ Barĩa beonerete muntũ ũu warĩ na nkoma akĩragithua bakĩĩra antũ bau bũrĩa Jesũ amũragithirie.

³⁷ Ĩndĩ atũũri bonde ba mĩena ĩu yonde ya Gerasa bakĩĩra Jesũ aume kwao. Gĩtũmi nĩ atĩ nĩbagwatirwe nĩ ũkĩri bũnene mũno. Kwogu Jesũ agĩtũa ĩtarũni nĩkĩo acoke Galili.

³⁸ Muntũ ũrĩa waragithĩtue nkoma agĩkaĩra Jesũ amwĩtĩkĩĩrie ekaranie nawe. Ĩndĩ Jesũ akĩrega, akĩmwĩra

³⁹ “Coka mũjiĩ kwenu; thi ũkamenyithie antũ maũntũ manene marĩa Ngai akũrũthĩrĩte.” Muntũ ũu akiuma au akĩthi akĩanagĩĩra kunde ntũũrani ĩu bũrĩa Jesũ aamũrũthĩrĩte.

Jesũ kũragithia mwarĩ wa Jairũ na mũka ũrĩa waumaga ndamu

⁴⁰ Na rĩ, rĩrĩa Jesũ acokire mũrĩmo ũu ũngĩ wa ĩria, antũ bakĩmũgwata ũgeni nĩũntũ nĩ kĩamweteerete.

⁴¹ Rĩu muntũ ũmwe wetagwa Jairũ, ũrĩa warĩ mũtongoria wa sĩnagogu, akĩja. Akĩĩgwĩthia ndĩ magũrũni ma Jesũ, akĩmũkaĩra athi kwae mũjiĩ.

⁴² Gĩtũmi nĩ atĩ kaarĩ kae karĩa kaarĩ ka mĩaka ĩkũmi na ĩĩrĩ, kaarĩ akuĩ gũkua. Na rĩrĩa Jesũ athiĩte kwa Jairũ, antũ nĩ bamwatĩkaga nteere jionde.

⁴³ Kũu kĩrĩndĩni nĩ kwarĩ na muntũ mũka ũmwe wekarĩte na mũrimũ wa kumwa nĩ ndamu kagiita ka mĩaka ĩkũmi na ĩĩrĩ, ĩndĩ gũtĩ ndagitarĩ waũmbĩte kũmũragithia.

⁴⁴ Riu nĩ akuĩrĩrie Jesũ na mbarĩ ya nyuma, na agĩtongithia tũrigi twa nguo yae O rĩmwe ndamu ĩgĩtiga kuuma.

⁴⁵ Jesũ akĩũria, “Nũũ ũu wantongithia?” Rĩrĩa antũ bonde bakaanire, Petero akĩmwĩra, “Mũrutani, ũnkĩũria ũgu atĩa na nobu antũ bagwatikire!”

⁴⁶ Ĩndĩ Jesũ akiuga, “Arĩ, kũrĩ muntũ atongithia; nkwĩgua inya yauma kĩrĩ ni.”

⁴⁷ Rĩrĩa muntũ mũka ũu onire akũmenyeka akiumĩra akinainaga, akĩĩgwĩthia magũrũni ma Jesũ. Akiumbũra mbere ya antũ bonde kĩrĩa gĩatũmĩte atongithia Jesũ, na bũrĩa akũmũtongithia aragiirie o rĩo.

⁴⁸ Nawe Jesũ akĩmwĩra, “Mwarĩ wakwa, gwĩtĩkia gwaku nĩku gwatũma ũragia. Thi na ũkiri.”

⁴⁹ Jesũ akĩaragia o ũgu, muntũ ũmwe agĩkinya aumĩte kwa mũtongoria ũu wa sĩnagogu, akĩthi kĩrĩ Jairũ akĩmwĩra, “Tiga gũtanga Mũrutani kaĩrĩ; mwarĩ waku agũkua.”

⁵⁰ Ĩndĩ rĩrĩa Jesũ egwire ũgu akĩĩra Jairũ, “Ũtĩkamake, ĩtĩkia akĩ, na mwarĩgu nĩ agũcoka mwoyo.”

⁵¹ Rĩrĩa Jesũ akinyire mũjiĩ wa Jairũ atetĩkĩĩria muntũ o na ũrĩkũ atonya nyomba, o tiga Petero na Johana na Jakubu, na ĩthe na gina wa kaana.

⁵² Antũ bonde ba mũjiĩ ũu nĩbarĩraga bagĩkaaga mũno, ĩndĩ Jesũ akĩbeera, “Tigani kũrĩra, mwarĩ tĩ mũkuũ, nĩka amami.”

⁵³ Bakĩmũthekeera, nĩũntũ nĩbamenyaga kaarĩ kau nĩ kaarĩ gakuũ.

⁵⁴ Ĩndĩ Jesũ akĩkagwata njara, agĩkera atĩrĩ, “Kaana, ũkĩra!”

⁵⁵ Kaarĩ gakĩriũka, gagĩũkĩra o rĩmwe. Jesũ akĩathana akiuga kanenkerwe gĩntũ gĩa kũrĩa.

⁵⁶ Nabo ajiari ba kaarĩ kau bakĩrigara mũno, ĩndĩ Jesũ akĩbakaania kwĩra muntũ o na ũrĩkũ bũrĩa gwekarĩka.