Luka 7 - NTETO ĨMBEGA TA BŨRĨA YANDĨKIRWE NĨ LUKA

Jesũ kũragithia ntungata ya Mũnene wa athigari Mũroma

¹ Jesũ akũrĩkia kwĩra antũ maũntũ marĩa monde endaga kuuga akĩthi Kaperinaumu.

² Na kũu nĩ kwarĩ na mũnene ũmwe Mũroma warũngamagĩĩra athigari ĩgana. Mũnene ũu nĩ aarĩ na nkombo endete mũno, nayo ĩkĩrwara mũno o akuĩ gũkua.

³ Rĩrĩa mũnene ũu eegwire nteto jiĩgiĩ Jesũ nĩ atũmire akũrũ ba Ayahudi bakamũũrie athi akaragithie nkombo ĩu yae.

⁴ Bagũkinya kĩrĩ Jesũ nĩbamũkaĩre bakĩmwĩraga, “Muntũ ũũ nĩ abatiĩ ũtethio bwaku

⁵ nĩ tontũ nĩendete antũ betũ, na nĩwe watwakĩĩre sĩnagogu.”

⁶ Kwogu Jesũ akĩthi na akũrũ bau kwa mũnene ũu. Bagũkuĩria, mũnene ũu wa athigari ĩgana agĩtũma acoore bae kĩrĩ Jesũ bakamwĩre atĩrĩ, “Mwathani, tiga gwĩtanga nĩ tontũ niũ ntĩ mwagĩru wa gũkũgwata ũgeni gwakwa.

⁷ Na nĩkĩo o naani ntĩũkire kĩrĩ gwe. Ĩndĩ rĩ, ruta kiugo tu, na nkombo yakwa nĩkũragia.

⁸ Nĩ tontũ o naani nĩmbathagwa, na ndĩ na athigari mbathaga. Mbĩraga ũmwe, ‘Thi’, na akathi. Nkera ũngĩ, ‘Njũ,’ na akeja. Na ndera nkombo yakwa, ‘Rũtha ũũ’ ĩkarũtha.”

⁹ Jesũ akwĩgua ũgu nĩ arigarire mũno nĩwe. Akĩgarũkĩra antũ barĩa bamũthingatĩte akĩbeera, “Ka ndĩbwĩreni, niũ ntanona muntũ ũrĩ na wĩtĩkio bũnene ta bũbũ, o na nkinya kĩrĩ Aisiraeli.”

¹⁰ Na rĩrĩa barĩa batũmĩtwe bacokire nyomba ya mũnene ũu bakĩthĩra nkombo ĩkũragia.

Jesũ kũriũkia mwana wa mũka wa ntigwa

¹¹ Nyumani anini, Jesũ nĩ acokire akĩthi taũni nene yetagwa Naini, na arutwa bae na antũ baingĩ bakĩthijania nawe.

¹² Agũkuĩria mpingĩro ya taũni ĩu ya Naini agĩtũngana na mũka wa ntigwa athiĩte kũthika mwana wae ũrĩa arĩ agũkua. Na nĩ kwarĩ na antũ baingĩ mũno ba ntũũra ĩu barĩa bathiĩte mathikoni. Mũka ũu wa ntigwa ataarĩ na mwana ũngĩ.

¹³ Na rĩrĩa Mwathani amwonire akĩmwĩguĩra kĩao, akĩmwĩra atĩrĩ, “Tiga kũrĩra.”

¹⁴ Jesũ agĩkuĩria ĩthandũkũ rĩrĩa rĩarĩ na mwĩrĩ akĩrĩtonga, na barĩa barĩkamatĩte bakĩrũngama. Jesũ akiuga atĩrĩ, “Mũthaka! ndakwĩra ũkĩra!”

¹⁵ Na rĩ, muntũ ũu wakuĩte agĩũkĩra agĩkara ndĩ, akĩambĩĩria kwaria. Jesũ agĩcokeria gina mwana wae.

¹⁶ Antũ bonde bakĩgwatwa nĩ ũkĩri, na bakĩgoca Ngai bakiugaga, “Tũrĩ na kĩroria kĩnene gatagatĩ getũ!” Bagĩcoka bakiuga, “Ngai nĩ ariũngĩrĩte antũ bae!”

¹⁷ Na nteto ino igĩtamba Judea yonde na ndĩ ĩrĩa yamĩthiũrũkĩrĩtie.

Johana Mũbatithania gũtũma antũ kĩrĩ Jesũ

¹⁸ Rĩrĩa Johana erirwe nĩ arutwa bae bũrĩa bunde Jesũ arũthaga

¹⁹ nĩ etire arutwa bae baĩrĩ akĩbatũma kĩrĩ Mwathani nĩkenda bathi kũmũũria atĩrĩ, “Gwe nĩgwe ũrĩa twerirwe akeja, kana tũthi mbere gweteera ũngĩ?”

²⁰ Bagũkinya kĩrĩ Jesũ bakĩmwĩra, “Johana Mũbatithania atũtũma kĩrĩ gwe tũkũũrie atĩrĩ, ‘Gwe nĩgwe ũrĩa twerirwe akeeja, kana tũthi mbere gweteera ũngĩ?’”

²¹ O thaa iu Jesũ nĩaragithiirie antũ baingĩ mĩrimũ na ndwari, o na nkoma. Ningĩ agĩtũma atumuumu baingĩ bacoke kwona.

²² Jesũ agĩcoka akĩĩra atũmwa bau batũmĩtwe atĩrĩ, “Thini bwĩre Johana bũrĩa bwona na bwegua: atumumu nĩbacokete kwona, ithua rĩu nĩ ikũthi, antũ ba mũtigiri nĩ atherie, itaigua nĩ ikwĩgua, akuũ nĩ bariũku na nkĩa nĩikũunjĩrua nteto irĩa mbega.

²³ Gũkena nĩ muntũ ũrĩa ũtĩ na nkanja ũntũni bũmbĩgiĩ.”

²⁴ Arutwa ba Johana bakũthi, Jesũ akĩambĩria kwarĩria antũ maũntũ megiĩ Johana, akĩbeera atĩrĩ, “Nĩmbi bwathiĩte kwona rwanda? Nĩ ĩthanje rĩkinainua nĩ rũkũngi?

²⁵ Nĩmbi obu bwathiĩte kũona? Muntũ arĩ na nguo irĩa mbega? Atĩrĩ, barĩa bekagĩra nguo irĩa mbega na bagatũũra mĩtũrĩre mĩega bonekanaga nyomba jia anene.

²⁶ Nĩmbi ĩndĩ bwathiĩte kwona? Nĩ kĩroria? Ĩĩ! Ĩndĩ ũrĩa bwonire nĩ akũrũkĩte kĩroria.

²⁷ Johana nĩwe mandĩko maaragia bwae rĩrĩa maugaga, ‘Atĩrĩ, nĩngũtũma mũtũmwa wakwa mbere ya wĩĩja, Ũrĩa ũgagũtemera njĩra.’

²⁸ Ndĩbwĩra atĩrĩ, kĩrĩ bonde barĩa banajiarwa nĩ mũka gũtĩ we mũnene ta Johana. Ĩndĩ rĩ, ũrĩa mũnini buru Ũneneni bwa Ngai nĩ mũnene kũmũkĩra.”

²⁹ (Na rĩrĩa antũ bonde na arutithia goti begwire ũgu bagĩtĩkĩa Ngai nĩ wa gĩoto, nĩũntũ nĩbabatithĩtue na kĩbatithio kĩa Johana.)

³⁰ Ĩndĩ Afarisai na arutani ba Watho nĩbaregire bũrĩa Ngai ababangĩrĩte, nĩ tontũ bo batabatithĩtue nĩ Johana.

³¹ Jesũ akiuga, “Ndĩgerekania antũ ba ntukũ ino na mbi? Bakari ta mbi?

³² Bakari ta twana twĩkari thokoni tũkiugaga, ‘Twabũringĩĩre mĩtũrirũ bwarega kwina, 1 Twacoka twabwinĩra nyĩmbo jia kwĩthikĩra bwarega kũrĩra.’

³³ Rĩrĩa Johana Mũbatithania ejire atarĩĩjaga kana anyua ndibei; naabwi bũkiuga, ‘Arĩ na nkoma.’

³⁴ Mwana wa Muntũ akwĩja akĩrĩjaga na akĩnyunyaga bũriuga, ‘Eneni ũũ mũkoroku na mũrebi; mũcoore wa arutithia goti na eyia!’

³⁵ Ĩndĩ rĩ, ũgĩ bwa Ngai bwĩtĩkĩrĩkaga nĩ bwagĩru kumania na barĩa babũthingataga.”

Jesũ kũgwatwa ũgeni kwa Mũfarisai wetagwa Simoni.

³⁶ Mũfarisai ũmwe nĩ etire Jesũ kwae bakarĩjanĩre. Jesũ agĩtĩkĩra, akĩthi kwa Mũfarisai ũu agĩkara ndĩ kũrĩa.

³⁷ Na rĩ, nĩ kwarĩ muntũ mũka ntũũrani ĩu watũũrĩte mũtũrĩre wa wĩyia. Akũmenya atĩ Jesũ nĩ aarĩ kwa Mũfarisai ũu, Mũka ũu akĩthi nao akamatĩte cuuba yaarĩ na maguta manunkaga wega.

³⁸ Akĩthi akuĩ na magũrũ ma Jesũ akĩrĩraga, methori mae magetĩkagĩra magũrũ ma Jesũ. Agĩturia, akĩgiria magũrũ ma Jesũ methori na njuĩrĩ jiae jia kĩongo, akĩmamumunya, agĩcoka akĩmaaka maguta mau manunkaga wega.

³⁹ Rĩrĩa Mũfarisai ũrĩa etĩĩte Jesũ onire ũgu akĩĩra na nkoro atĩrĩ, “Kethĩrwa muntũ ũũ nĩ kĩroria nĩ ankĩamenya muntũ mũka ũũ ũkũmũtonga nĩ muntũ ũkari, nĩũntũ nĩ mwĩyia.”

⁴⁰ O au Jesũ akĩĩra Mũfarisai ũu, “Simoni, ndĩ na ũntũ nkwenda gũkwĩra.” Simoni akiuga, “Ĩĩ Mũrutani, mbĩra.”

⁴¹ Jesũ akĩmwĩra atĩrĩ, “Muntũ ũmwe nĩ akobithĩtie antũ baĩrĩ mbeca. Ũmwe akobithĩtue dinari magana matano na ũu ũngĩ agĩkobithua mĩrongo ĩtano.

⁴² Rĩrĩa baremirwe nĩ kũmũrĩa randũ akĩbarekera bo baĩrĩ. Nĩ ũrĩkũ wabo ũkenda muntũ ũu nkũrũki?”

⁴³ Simoni akĩmũcokeria, “Mbuga nĩ ũrĩa arekeerwe ĩrandũ rĩnene.” Jesũ akĩmwĩra atĩrĩ, “Ũgu wauga nĩbu.”

⁴⁴ Akĩgarũkĩra muntũ mũka ũu, akĩĩra Simoni atĩrĩ, “Nĩ ũkwona muntũ mũka ũũ? Ngũtonya nyomba ĩno yaku ũtĩnenkeere rũjĩ rwa kũthamba magũrũ. Ĩndĩ muntũ mũka ũũ akũndambia magũrũ na methori mae na angiria na njuĩrĩ jiae.

⁴⁵ Gweũ ũtĩmumunyire, ĩndĩ muntũ mũka ũũ atĩtigĩte kũmumunya magũrũ makwa kuuma rĩrĩa mbĩjire.

⁴⁶ Ũtĩmbakire maguta kĩongo, ĩndĩ muntũ mũka ũũ agwaka magũrũ makwa maguta marĩa makũnunka wega.

⁴⁷ Kwogu ndĩkwĩra atĩrĩ, akũrekerwa meyia mae marĩa mararĩ maingĩ, nĩũntũ bwa wendo bũnene bũrĩa onania. Ĩndĩ rĩ, ũrĩa wonanagia wendo bũnini arekagĩrwa meyia o manini.”

⁴⁸ Jesũ agĩcoka akĩĩra muntũ mũka ũu atĩrĩ, “Ũkũrekerwa meyia maku.”

⁴⁹ Barĩa baarĩ gĩĩkaroni kĩu amwe na Jesũ bakĩambĩĩria kwĩũria, “Nĩka arĩ ũ ũũ ũkũmba kũrekanĩra meyia?”

⁵⁰ Jesũ agĩcoka akĩĩra muntũ mũka ũu, “Wĩtĩkio bwaku bũgũkwonokia; thi na ũkiri.”