Luka 5 - NTETO ĨMBEGA TA BŨRĨA YANDĨKIRWE NĨ LUKA

Jesũ gwĩta arutwa ba mbere

¹ Ntukũ ĩmwe Jesũ nĩarũngamĩte rũteere rwa ĩria rĩa Genesareti. Nabo antũ nĩbatindĩkanaga bamũrigicĩrĩtie, bakĩenda kwĩgua ntũmĩĩri ya Ngai wega.

² Akĩona matarũ maĩrĩ au rũteere rwa ĩria, na ene matarũ nĩbathambagia neti irĩa batũmagĩra gũtega samaki.

³ Agĩtũa ĩtarũni rĩmwe rĩrĩa rĩarĩ rĩa muntũ wetagwa Simoni, akĩmwĩra agendagendie ĩtarũ riume akuĩ na ndĩ mpũmũ. Jesũ agĩkara ndĩ ĩtarũni, akĩrutana antũ.

⁴ Rĩrĩa athiririe kũrutana akĩĩra Simoni, “Gendagendia ĩtarũ rĩrĩ rĩtonye kũrĩa kũrĩ na rũjĩ rworokeru, bũgere neti rũjĩni bũgwatie samaki.”

⁵ Simoni akĩmũcokeria, “Mwathi wakwa, tũrere tũgĩtega na kĩĩo ũtukũ bunde na gũtĩ gĩntũ tũragwatia. Ĩndĩ nĩũntũ ũkuuga bu rĩ, nĩnkũigera rũjĩni.”

⁶ Bakũgera neti rũjĩni bakĩgwatia samaki nyingĩ mũno nkinya neti ikĩenda gũtuĩkanga nĩ kũritũa.

⁷ Bakĩeneria antũ barĩa barutithanagia wĩra nabo barĩ ĩtarũni rĩu rĩngĩ nĩkenda bathi kũbatetheeria. Bakĩthi bakĩjũria matarũ mo maĩrĩ samaki, nkinya makĩambĩĩria kworokera.

⁸ Rĩrĩa Simoni Petero onire ũgu, agĩturia maru mbere ya Jesũ akĩmwĩra, “Mperera Mwathani. Niũ ndĩ muntũ mwĩyia!”

⁹ Simoni na barĩa bangĩ baarĩ nawe nĩbarigariirue mũno nĩ wingĩ bwa samaki irĩa bagwatirie.

¹⁰ O najio ndaka jia Zebedii ta bo Jakubu na Johana, barĩa barutithanagia wira na Simoni nĩbamakire. Jesũ akĩĩra Simoni, “Ũtĩkamake; kuuma ũmundĩ ũrĩcoka gũtegaga antũ.”

¹¹ Na rĩ, bakũrĩkia gũcokia matarũ rũteere rwa ĩria nĩ batiganĩĩrie into jiao jionde, bakĩmũthingata.

Jesũ kũragithia muntũ warwarĩte mũrimũ wa mũtigiri

¹² Kagiita kamwe Jesũ nĩ arĩ taũni nene ĩmwe. Rĩu muntũ ũmwe warwarĩte mũrimũ wa mũtigiri akũmũona nĩ athiire kĩrĩ we, akĩgwĩthia ndĩ mbere yae, akĩmũkaĩra akĩmwĩra, “Mwathani, ũnkĩenda no ũnderie.”

¹³ Jesũ agĩtambũrũkia njara akĩmũtonga, akĩmwĩra, “Nĩnkwenda, thera!” Mũrimũ ũu wa mũtigiri ũkĩthira o rĩo.

¹⁴ Jesũ akĩmũkania akĩmwĩra, “Ũtĩkeere muntũ o na ũrĩkũ nteto ino. Thi wĩonanie kĩrĩ mũthĩnjĩri Ngai, ũcoke ũrute kĩgongoana gĩa kũtherua, o ta bũrĩa Musa aathanire na nĩkenda antũ betĩkia ũkũthera.”

¹⁵ Ĩndĩ rĩu nkuma ya Jesũ ĩkĩthi mbere gũtamba nkũrũki, na antũ baingĩ bakĩthi kũu aarĩ nĩkenda bamũthikĩĩria na baragithua mĩrimũ ĩrĩa baarĩ nayo.

¹⁶ Ĩndĩ we Jesũ nĩ abatigaga akathi rwanda kũromba.

Jesũ kũragithia muntũ wakuĩte jiĩga jia mwĩrĩ

¹⁷ Ntukũ ĩmwe Jesũ nĩ arutanaga, nao au arutanagĩra nĩ gwekarĩte Afarisai na arutani ba Watho barĩa baumĩte tũtũrani tunde twa Galili na Judea, o na bangĩ bakauma Jerusalemu. Nawe Jesũ nĩ aarĩ na inya ya kũragithania kuuma kĩrĩ Mwathani.

¹⁸ Na rĩ, antũ bakĩja na muntũ wakuĩte jiĩga jia mwĩrĩ bamũkamatĩte na mũgeka. Bendaga kũmũthũngĩria nyomba bamwige mbere ya Jesũ,

¹⁹ ĩndĩ gũtaũmbĩkire nĩ bũrĩa kwarĩ na antũ baingĩ. Bagĩtũa ĩgũrũgũrũ rĩa nyomba, bakimbũra tũiga tũrĩa twaimbĩte, bakĩmwĩmanĩĩria au mwanyani arĩ o mũgekani, bakĩmwiga mbere ya Jesũ, gatagatĩ ga antũ.

²⁰ Na rĩrĩa Jesũ onire bũrĩa wĩtĩkio wao warĩ mũnene akĩĩra kĩonje kĩu, “Mũcoore, ũkũrekerwa meyia maku.”

²¹ Arutani ba Watho na Afarisai bakĩambĩria kũrania, “Nĩka muntũ ũũ arĩ ũ ũkũruma Ngai? Nĩ muntũ ũrĩkũ ũmba kũrekanĩra meyia tiga Ngai wenka?”

²² Rĩrĩa Jesũ amenyire bũrĩa beciragia akĩbaũria, “Nĩmbi ĩgũtũma bũgĩa na meciria ta mau nkoroni jienu?

²³ Nĩ bũrĩkũ bũthũ; nĩ kuuga, ‘Ũkũrekerwa meyia maku’ kana nĩ kuga, ‘Ũkĩra wĩthiĩre’?

²⁴ Ĩndĩ nĩkenda bũmenya atĩ Mwana wa Muntũ arĩ na inya gũkũ ndĩ ya kũrekanĩra meyia,” akĩĩra muntũ ũu warĩ kionje, “Ndakwĩra atĩrĩ, ũkĩra, jũkia mũgeka waku wĩnũke.”

²⁵ Muntũ ũu warĩ kĩonje agĩũkĩra o rĩo antũ barĩa baarĩ o bakĩonaga, akĩjũkia mũgeka wae akĩnũka agĩkumagia Ngai.

²⁶ Antũ bonde bakĩrigara na bakĩĩjũrwa nĩ ũkĩri, na bagĩkumia Ngai bakĩĩranaga, “Ũmundĩ tũkwona maũntũ ma kũrigaria!”

Jesũ gwĩta Lawi

²⁷ Jesũ akũthiria kũrũtha ũgu nĩ aumire kũu akĩthi akĩona mũrutithia goti wetagwa Lawi ekarĩte obisini yae, akĩmwĩra, “Ndingata.”

²⁸ Lawi agĩũkĩra, agĩtiga into jionde akĩmũthingata.

²⁹ Rĩu Lawi akĩrũthĩra Jesũ kĩrugo kĩnene mũno kwae mũjiĩ. Kĩrugoni kĩu nĩ kwarĩ na arutithia goti baingĩ, o na antũ bangĩ baarĩ o, bakĩrĩjanagĩra amwe.

³⁰ Afarisai na arutani bao ba Watho bakĩambĩĩria kũnuguna bakĩũragia arutwa ba Jesũ, “Nĩmbi ĩgũtũma bũrĩjanĩra na bũnyunyanĩra na arutithia goti na eyia?”

³¹ Jesũ akwĩgua bakĩnuguna akĩbacokeria akĩbeera, “Antũ barĩa batĩ arwaru batĩbataraga ndagitarĩ, nĩ barĩa aruaru bamũbataraga.

³² Ntĩjĩte gwĩta antũ barĩa bagĩru; mbĩjĩte nĩkenda eyia berire.”

Kĩũria kĩgiĩ kwĩima

³³ Afarisai na arutani bao ba Watho bakĩĩra Jesũ, “Arutwa ba Johana Mũbatithania nĩ beimaga kũrĩa na kũnyua kaingĩ, na bakĩromba. O na arutwa ba Afarisai nĩbarũthaga o ũgu. Ĩndĩ baku no kũrĩa barĩjaga na bakanyua.”

³⁴ Nawe Jesũ akĩbaũria atĩrĩ, “No bũũmbe kwĩra antũ barĩa betĩtwe ũikini beime kũrĩa irio rĩrĩa mũikania arĩ amwe nabo?

³⁵ Ĩndĩ rĩ, kagiita nĩ kejĩte rĩrĩa mũikania akajũkua aume kĩrĩ bo. Kagiita kau nĩrĩo bakeima kũrĩa.”

³⁶ Agĩcoka akĩbaa ngerekano ĩno: “Gũtĩ muntũ ũtambũraga kĩraka kuuma nguoni ĩrĩa njerũ nĩkenda agĩkĩra nguoni ĩrĩa nkũrũ. Akarũtha ũgu, akathũkia nguo ĩrĩa njerũ, o na kĩo kĩraka kĩu gĩtĩbuĩra nguoni ĩrĩa nkũrũ.

³⁷ O na kaĩrĩ gũtĩ muntũ wĩkagĩra ndibei ĩrĩa mbĩthĩ ithirini irĩa nkũrũ. Akarũtha ũgu, ndibei ĩu ĩgatũmũra ithiri iu na ĩĩtĩke, najio ithiri ikue.

³⁸ Antũ a ũgu, ndibei ĩrĩa mbĩthĩ no ĩkĩĩrwe ithirini irĩa njerũ.

³⁹ O na rĩ, muntũ ũkundĩte ndibei ĩrĩa nkũrũ atĩenda kũnyua ndibei ĩrĩa mbĩthĩ, nĩkwĩthĩrwa augaga, ‘Ĩrĩa nkũrũ nĩyo mbega.’”