Luka 4 - NTETO ĨMBEGA TA BŨRĨA YANDĨKIRWE NĨ LUKA

Jesũ kũgerua

¹ Jesũ nĩ aumire rũjĩni rwa Jorodani ejũrĩtwe nĩ Roho Mũtheru. Roho ũu akĩmũtongoria akĩmwira rwanda.

² Agĩĩkara rwanda ntukũ mĩrongo ĩna akĩgeragua nĩ Nkoma. Atarĩjaga no mbi ntukũ iu mĩrongo ĩna, kwogu ikũthira akĩgua aũti.

³ Nkoma akĩmwĩra, “Kethĩrwa gwe ũrĩ Mwana wa Ngai, atha ĩiga rĩrĩ rĩtuĩke mũgate.”

⁴ Nawe Jesũ akĩmũcokeria, “Nĩkwandĩke, ‘To mũgate ũngĩtũũria muntũ mwoyo.’”

⁵ Nkoma akĩmwitithia antũ ĩgũrũ, na o rĩmwe akĩmwonia monene monde ma ndĩ,

⁶ akĩmwĩra atĩrĩ, “Nĩngũkũa monene mama monde na ũkumio bwamo. Marĩ njarani jiakwa na no nenkere muntũ o wonde ndĩnkienda.

⁷ Ũngĩnturĩria maru ũndathaiye, ũnene bũbũ bunde bũgatuĩka bwaku.”

⁸ Nawe Jesũ agĩcokeria Nkoma akĩmwĩra, “Nĩkwandĩke, ‘Thathaagia Mwathani Ngai waku, na ũmũtungatagĩre o we wenka.’”

⁹ Nkoma agĩcoka akĩmwira Jerusalemu, akĩmũtũyia gacũmbĩrĩ ga Hekarũ akĩmwĩra, “Kethĩrwa ũrĩ Mwana wa Ngai, ĩarũkie kuuma aa;

¹⁰ nĩũntũ nĩkwandĩke, ‘Akatha araika bae bakũmenyeere na bagũĩkarie,’

¹¹ Na atĩrĩ, ‘Bagakwambĩĩria na njara jiao Ũtĩkeje kũringwa kũgũrũ nĩ ĩiga.’”

¹² Ĩndĩ Jesũ akĩmũcokeria, “Mandĩko nĩmaugĩte, ‘Ũtĩkagerie Mwathani Ngai waku.’”

¹³ Rĩrĩa Nkoma athiririe kũgeria Jesũ na njĩra jionde, akĩmũtiga, o nkinya rĩrĩa akona kanya kangĩ.

Jesũ kwambĩĩria kũunjia Galili

¹⁴ Jesũ nĩ acokire Galili atongoretue nĩ Roho Mũtheru, na nkuma yae igĩtamba ndĩ ĩu na kũrĩa kunde kwariganĩtie na yo.

¹⁵ Nawe akĩrutana sinagoguni jiao na antũ bonde bakamũkumagia.

Jesũ kũregwa Nazarethi

¹⁶ Na rĩ, Jesũ nĩ athiire Nazarethi kũrĩa arereretwe. Ntukũ ya Sabatũ ĩgũkinya akĩthi sinagoguni o ta bũrĩa amenyeretie. Akĩrũngama nĩkenda athoma Mandĩko Matheru.

¹⁷ Akĩnenkerwa mbuku ya kĩroria Isaya, akĩguũria arĩa kwandĩkĩtwe atĩrĩ,

¹⁸ “Roho wa Mwathani arĩ amwe naani, nĩũntũ nĩ ambamũrĩte nkaunjie nteto ĩrĩa mbega kĩrĩ nkĩa. Antũmĩte mbũke ndaũrithie barĩa bathaĩke Na nĩkenda atumuumu bacoke kwona, Nkinyũrũkie barĩa bakinyĩĩrie,

¹⁹ Na mbugĩrĩrie atĩ ũũ nĩu mwaka ũrĩa Mwathani agũkinyĩria antũ wega wae.”

²⁰ Akũthiria kũthoma agĩkunĩka mbuku, akĩmĩcokia kĩrĩ mũmenyeeri wa sinagogu, agĩĩkara ndĩ. Nabo barĩa bonde baarĩ kũu sinagoguni bagĩĩkara bamũraithĩte kũnũũ.

²¹ Nawe akĩbeera atĩrĩ, “Mandĩko mama mathomwa bũkĩgujaga makũinga ũmundĩ.”

²² Antũ bonde nĩbamukathiirie, na bakĩrigarua nĩ rwaria rwae rwega. Bakĩũrania, “Anga ũũ tĩ mwana wa Josefu?”

²³ Nawe akĩbeera, “Gũtĩ nkanja nĩbũkũngwetera ngerekano ĩno: ‘Ndagitarĩ, amba wĩthondeke gwengwa; maũntũ ta mau twĩgwĩte nĩ ũrũthĩte Kaperinaumu marũthe o na gũkũ ntũũrani yaku.’”

²⁴ Agĩcoka akĩbeera atĩrĩ, “Ndĩbwĩra atĩrĩ na ma, gũtĩ kĩroria gĩĩtĩkagĩrwa kwao.

²⁵ Ta ririkanani kagiita ka Elija; kũu Isiraeli nĩ kwathiririe mĩaka ĩthatũ na mĩeri ĩthandatũ gũtĩkuura mbura. Gũkĩgĩa ĩũra rĩnene mũno kũu kunde. Ĩndĩ o na kethĩrwa nĩ kwarĩ na aka ba ntigwa baingĩ mũno kũu Isiraeli,

²⁶ Elija atatũmirwe kĩrĩ no ũmwe wa bo; atũmirwe kĩrĩ mũka ũmwe wa ntigwa wa Zarefathi, kũu Sidoni.

²⁷ O na kaĩrĩ kagiita ga kĩroria Elisha nĩ kwarĩ na antũ baingĩ barũarĩte mũtigiri, ĩndĩ gũtĩ we waragithiirue nĩ Elisha, o tiga Namani Mũsuriata.”

²⁸ Antũ bonde barĩa baarĩ sinagoguni bakwĩgua ũgu bakĩthũũra mũno.

²⁹ Bagĩũkĩra bakĩmũrutũrũra nja ya kũu taũni nene. Bakĩmwira rwarani rwa karĩma karĩa taũni ĩu yakĩtwe, nĩkenda bamwarũkie rwarani ya karĩma kau.

³⁰ Ĩndĩ Jesũ agĩkũrũkĩĩra gatagatĩ kao, akĩthiĩra.

Muntũ warĩ na nkoma

³¹ Jesũ agĩcoka akĩĩmana Kaperinaumu, taũni nene ya Galili, na ntukũ ĩmwe ya Sabatũ nĩ arutanaga antũ sinagoguni

³² Nĩbarigaraga mũno nĩ ũrutani bwae, nĩ bũrĩa arutanaga arĩ na wathani.

³³ Kũu sinagoguni nĩ kwarĩ na muntũ warĩ na nkoma. Muntũ ũu akiugĩĩria akiugaga,

³⁴ “Wuui! Nĩmbi ũkwenda natwi gwe Jesũ wa Nazarethi? Nĩka wĩjĩte gũtũthiria? Nĩnkũmenya gwe ũrĩ ũ; ũrĩ ũrĩa Mũtheru wa Ngai.”

³⁵ Ĩndĩ Jesũ akĩmĩgũkia, akĩmĩĩra, “Kira, na uume kĩrĩ muntũ ũũ!” Nkoma ĩu ĩgĩtungumania muntũ ũu nau ndĩ gatagatĩni kao, ĩgĩcoka ĩkiuma, ĩndĩ ĩtamũthũkia no kũ.

³⁶ Antũ bonde bakĩrigara. Bakĩũrania, “Ankĩũmba kuuga ũgu atĩa? Muntũ ũũ arĩ na ũnene na inya; arĩatha nkoma jiume ndani ya muntũ na ikauma.”

³⁷ Nkuma ya Jesũ ĩgĩtamba gũntũ kunde kũu kwathiũrũkĩrĩtie mwena ũu.

Jesũ kũragithia antũ baingĩ

³⁸ Jesũ agĩũkĩra akiuma sinagoguni, agĩtonya nyomba ya Simoni. Gina wa mũka wa Simoni nĩ arũarĩte mũrimũ wa kwĩgua mwanki mwĩrĩ, nabo bakĩromba Jesũ amũragithie.

³⁹ Jesũ akĩrũngama akuĩ nawe, akĩgondokera mũrimũ ũu, nau ũkĩthira. O rĩmwe mũka ũu agĩũkĩra na akĩbamandĩra.

⁴⁰ Na rĩrĩa riũa rĩathũaga antũ bonde barĩa baarĩ na arũaru mĩrimũ nkũrani nkũrani nĩbabaretire kĩrĩ Jesũ, nawe akĩbaigĩĩra njara bonde, akĩbaragithia.

⁴¹ O najio nkoma ikiuma ndani ya antũ baingĩ ikiugagĩĩria, “Gwe ũrĩ Mwana wa Ngai!” Ĩndĩ akĩigũkia, agĩikania kwaria, nĩũntũ jio nĩ jiaijĩ we nĩwe Kristũ.

Jesũ kũunjia sinagoguni

⁴² Gwakĩa, Jesũ nĩ aumagarire akĩthi gũntũ gũtarĩ na antũ. Antũ bakĩmũcũa na rĩrĩa bamwonire bakĩgeria kũmũgirĩrĩria kuuma kũu kwao.

⁴³ Ĩndĩ we akĩbeera atĩrĩ, “No nkinya mpunjie Nteto Ĩmbega ya Ũnene bwa Ngai kĩrĩ antũ ba ntũũra irĩa jiĩngĩ o najio, nĩũntũ bũu nĩbu Ngai antũmire mbĩja kũrũtha.”

⁴⁴ Jesũ akĩthi mbere kũunjia sinagoguni jia kũu kunde Judea.