Luka 3 - NTETO ĨMBEGA TA BŨRĨA YANDĨKIRWE NĨ LUKA

Maunjio ma Johana Mũbatithania

¹ Mwakani wa ĩkũmi na ĩtano wa wathani bwa Tiberio Kaisari, Pontio Pilatũ arĩ gavana wa Judea; Herode aarĩ mũtongoria wa Galili nawe mũruagina Filipu aatongoretie mwena wa Iturea na Trakonitisi, Lisaniasi nĩwe warĩ mũtongoria kũu Abilene,

² nabo Anasi na Kaiyaba barĩ athĩnjĩri Ngai barĩa banene, nĩrĩo ntũmĩĩri ya Ngai yakinyĩĩre Johana mwana wa Zakaria arĩ rwanda.

³ Rĩu Johana akĩthi ntũũrani jionde irĩa jiarigenie na mũuro wa Jorodani, akĩunjagĩria antũ berire na babatithue nĩkenda barekerwa meyia mao.

⁴ Ta bũrĩa kwandĩkĩtwe mbukuni ya kĩroria Isaya, “Kũrĩ na mũgambo wa muntũ ũkugĩĩria rwanda, Thondekani njĩra ya Mwathani, Rũngariani tũjĩra twae.

⁵ Ibonde jionde ikejũrua, na irĩma na tũrĩma jiaraganue, Kũrĩa gũkĩgamu gũkĩgamũrwe, Na njĩra irĩa irĩ na mĩtaro ikathikwa mĩtaro ĩu;

⁶ Nabo antũ bonde bakona wonokio bwa Ngai!”

⁷ Antũ baingĩ nĩbeumĩririe kĩbatithua nĩ Johana, nawe akĩbeera, “Bwiũ rũjiaro rũrũ rwa njoka! Nũũ ũbwĩrĩte no bũmbe kũebera ĩtua rĩa Ngai rĩrĩa rĩjĩte?

⁸ Rũthani jiĩko irĩa ikwonania nĩbwĩrirĩte meyia menu. Bũtĩkeĩre na nkoro atĩ, ‘Tũrĩ njiarwa jia Aburahamu’; Ka ndĩbwĩre, Ngai no atuĩkithie maiga mama njiarwa jia Aburahamu.

⁹ Na rĩu ũgu ĩthoka rĩrĩ gĩtako kĩa mĩtĩ; na mũtĩ o unde ũrĩa ũkagaga majiaro marĩa mega ũgatemagwa ũkagerwa mwankini.”

¹⁰ Antũ bakĩmũũria, “Rĩu tũrũthe atĩa?”

¹¹ Nawe akĩbacokeria akĩbeera, “Muntũ ũrĩa ũrĩ na nguo jiĩrĩ nĩanenkere ũrĩa ũtĩ nayo, na ũrĩa ũrĩ na gĩa kũrĩa nĩagaĩre ũrĩa ũtĩ nakĩo.”

¹² Arutithia goti bakĩthi kũbatithua, o nabo bakĩmũũria, “Mũrutani, tiũ tũbatiĩ kũrũtha atĩa?”

¹³ Akĩbeera, “Bũtĩgetie goti nyingĩ nkũrũki ya ĩrĩa bwathĩrĩtwe.”

¹⁴ Athigari nabo bakĩmũũria, “Twiũ natwi tũbatiĩ kũrũtha atĩa?” Johana akĩbacokeria akĩbeera, “Tigagani gũtunya muntũ o na ũmwe mbeca jiae kana bũandĩĩra muntũ maũntũ marĩa matĩ o. Ĩganagĩrwani nĩ mũcara wenu.”

¹⁵ Ntũmĩĩri ya Johana nĩyekĩĩre antũ mwĩrĩgĩĩro mwingĩ, na bakĩambĩĩria kwĩũria na nkoro kethĩrwa Johana no ethĩrwe arĩ we Kristũ.

¹⁶ Ĩndĩ Johana akĩbacokeria bonde akĩbeera, “Niũ ndĩbũbatithia na rũjĩ, ĩndĩ nĩ ejĩte mũnene nkũrũki yakwa, ũrĩa niũ ntĩ mwĩganu gũkundũra ndigi jia iratũ jiae. Ũu akabũbatithagia na Roho Mũtheru na mwanki.

¹⁷ Nĩ agwete gĩtararũ gĩa kũũnga mwere, nĩkenda aũrute rwarani awige ĩkũmbĩni. Ĩndĩ maũngo akamaĩthĩĩria na mwanki ũrĩa ũtĩoraga.”

¹⁸ Johana nĩ aunjĩrie antũ Nteto Ĩmbega ya wonokio agĩcancamũraga nkoro jiao na morutani mangĩ maingĩ.

¹⁹ Na rĩ, Johana nĩ anegeniirie Herode ũrĩa warĩ mũtongoria nĩ tontũ Herode nĩ ajũkĩtie Herodia mũka wa mũruagina na akamũtua mũka wae, na agacoka akarũtha maũntũ mangĩ maingĩ mathũku.

²⁰ Rĩu Herode akĩrũtha ĩĩtia rĩthũku nkũrũki; akĩgwatithia Johana akĩmũingithĩria njeera.

Kũbatithua kwa Jesũ

²¹ Rĩrĩa antũ bonde babatithiirue, o nawe Jesũ akĩbatithua. Na rĩrĩa aarombaga, ĩgũrũ rĩkĩrugũka,

²² na Roho Mũtheru akiuma ĩgũrũ akari ta kĩjĩa, akĩmana kĩrĩ we. Nau mũgambo ũkiuma ĩgũrũ ũkiuga, “Gwe nĩgwe Mwana wakwa ũrĩa mbendete; nĩnkenaga mũno nĩgwe.”

Rũrĩjo rwa Jesũ

²³ Rĩrĩa Jesũ ambagĩria wĩra wae aarĩ na mĩaka ta mirongo ĩthatũ. Antũ beciiragia aarĩ mwana wa Josefu, mwana wa Heli.

²⁴ Heli aarĩ mwana wa Mathati, mwana wa Levi, mwana wa Melki, mwana wa Janna-i, mwana wa Josefu,

²⁵ ũrĩa aarĩ mwana wa Matathiasi, mwana wa Amosi, mwana wa Nahumu, mwana wa Esli, mwana wa Naga-i,

²⁶ mwana wa Maathi, mwana wa Matathiasi, mwana wa Seme-ini, mwana wa Joseki, mwana wa Joda,

²⁷ mwana wa Joanani, mwana wa Resa, mwana wa Zerubabel, mwana wa Shealitieli, mwana wa Neri,

²⁸ mwana wa Melki, mwana wa Adi, mwana wa Kosamu, mwana wa Elimadamu, mwana wa Era,

²⁹ mwana wa Joshua, mwana wa Elieza, mwana wa Jorimu, mwana wa Mathati, mwana wa Levi,

³⁰ mwana wa Simioni, mwana wa Juda, mwana wa Josefu, mwana wa Jonamu, mwana wa Eliakimu,

³¹ mwana wa Mele-a, mwana wa Menna, mwana wa Matatha, mwana wa Nathani, mwana wa Daudi,

³² mwana wa Jesii, mwana wa Obedi, mwana wa Boazi, mwana wa Sala, mwana wa Nahashoni,

³³ mwana wa Aminadabu, mwana wa Adimini, mwana wa Arani, mwana wa Hezoroni, mwana wa Perezi, mwana wa Juda,

³⁴ mwana wa Jakubu, mwana wa Isaka, mwana wa Aburahamu, mwana wa Tera, mwana wa Nahoru,

³⁵ mwana wa Serugu, mwana wa Reu, mwana wa Pelegi, mwana wa Ebera, mwana wa Shela,

³⁶ mwana wa Ka-inani, mwana wa Arafakisadi, mwana wa Shemu, mwana wa Noa, mwana wa Lameki,

³⁷ mwana wa Methusela, mwana wa Enoku, mwana wa Jaredi, mwana wa Mahaleeli, mwana wa Kainani,

³⁸ mwana wa Enosi, mwana wa Sethu, mwana wa Adamu, mwana wa Ngai.