Luka 24 - NTETO ĨMBEGA TA BŨRĨA YANDĨKIRWE NĨ LUKA

Kũriũka kwa Jesũ

¹ Ntukũ ya Kiumia rũkĩrĩ mũno antũ aka bau nĩ bathiire mbĩrĩrani, bakamatĩte intojianunkaga wega irĩa bathondekete.

² Bagũkinya bakĩĩthĩra ĩiga rĩrĩa rĩaingĩte mbĩrĩra rĩrĩtumbie rĩkarutwa mũromoni wa mbĩrĩra.

³ Ĩndĩ bakũthũngĩra ndani batethĩĩre mwĩrĩ wa Mwathani Jesũ.

⁴ Na rĩrĩa barũngi au barigarĩte nĩ ũntũ bũu, bakĩona antũ arũme baĩrĩ bekĩrĩte nguo igũkengakenga barũngi akuĩ nabo.

⁵ Aka bau nĩbegwire ũkĩri mũno nkinya bakĩĩnĩka mothiũ mao ndĩ. Antũ arũme bau bakĩbaũria atĩrĩ, “Nĩmbi ĩgũtũma bũcũa muntũ ũrĩ mwoyo kĩrĩ barĩa akuũ?

⁶ Atĩ aa, nĩ mũriũku. Taririkanani bũrĩa abwĩrire rĩrĩa arĩ Galili, atĩ

⁷ ‘Mwana wa Muntũ no mwanka anenkanĩrwe kĩrĩ antũ eyia, ambwe, na ntukũ ya ithatũ ariũke.’”

⁸ Rĩu nĩrĩo antũ aka bau baririkanire jiugo jia Jesũ.

⁹ Bakiuma mbĩrĩrani bakĩthi bakĩĩra arutwa barĩa ĩkũmi na ũmwe na antũ barĩa bangĩ bonde maũntũ mau monde.

¹⁰ Antũ aka bau baarĩ Maria Magidalina, Joana, na Maria gina wa Jakubu, o na aka bangĩ barĩa baarĩ nabo.

¹¹ Ĩndĩ atũmwa batabetĩkirie nĩũntũ beguire nteto iu ikari ta ngono.

¹² [Ĩndĩ Petero nĩ aũkĩĩre agĩkuthũka mbĩrĩrani, agĩkuamĩĩria akĩraitha ndani, akĩona cuka ĩrĩa yatunganĩtie mwĩrĩ wa Jesũ, ĩndĩ gũtarĩ na gĩntũ kĩngĩ. Agĩcoka mũjiĩ arigarĩtue nĩ maũntũ mau mekarĩkĩte.]

Rũgendo rwa kũthi Emaũ

¹³ Ntukũ o ĩu athingati ba Jesũ baĩrĩ nĩbathiĩte ntũũra yetagwa Emaũ, ĩrĩa yaarĩ kilomita ĩkũmi kuuma Jerusalemu.

¹⁴ Na nĩbathiĩte bakĩaragia nteto jia maũntũ marĩa mekarĩkĩte.

¹⁵ Bathiĩte bakĩaragia o ũgu, Jesũ we wengwa akĩbakuĩria, akĩgwatana nabo bakĩthijania.

¹⁶ Nĩbamũonaga no ĩndĩ batamũmenyaga.

¹⁷ Akĩbaũria atĩrĩ, “Nĩ nteto irĩkũ ino bũthiĩte bũkĩaragia?” Bakĩrũngama kii, bena kwĩthikĩĩra.

¹⁸ Ũmwe wa bo wetagwa Kileopa akĩmũcokeria, “Nĩka arĩ gwe gwenka mũgeni gũkũ Jerusalemu, ũtijĩ maũntũ marĩa mekarĩkĩte ku o rua rũrũ?”

¹⁹ Akĩbaũria, “Maũntũ marĩkũ?” Bakĩmwĩra, “Maũntũ megiĩ Jesũ wa Nazarethi. Muntũ ũu ararĩ kĩroria, na nĩ aronagwa arĩ na inya nene methoni ma Ngai na ma antũ, kĩrĩ maũntũ marĩa araugaga na akarũtha.

²⁰ Athĩnjĩri Ngai betũ barĩa anene na aathani baramũnenkanĩre atuĩrwa kũũragwa, na bakĩmwambithia.

²¹ Ĩndĩ tũrerĩgĩrĩte atĩ nĩwe ũgakũũra antũ ba Isiraeli! Amwe na bũu bunde rĩ, ĩno nĩyo ntukũ ya ithatũ kuuma maũntũ mau magwĩkarĩka.

²² O na kũnakari ũgu, antũ aka bamwe ba gĩkundi gĩetũ nĩbaratũrigaririe mũno. Bakũraũka mbĩrĩrani rũkĩrĩ mũno,

²³ bakĩthĩra mwĩrĩ wa Jesũ ũtĩ ku. Bejire batwĩra atĩ nĩbaumĩrĩrwe nĩ kioneki kĩa araika, babera atĩ Jesũ arĩ mwoyo.

²⁴ Antũ bamwe ba barĩa tũrarĩ nabo nĩ bathiire mbĩrĩrani, bakĩthĩra gũkari o ta bũrĩa aka bau baraugĩte; ĩndĩ batona Jesũ.”

²⁵ Nawe Jesũ akĩbeera, “Ĩ nĩka bwagĩte ũmenyo atĩa, bũtĩ mpũĩ jia gwĩtĩkia maũntũ monde marĩa maarirue nĩ iroria!

²⁶ Anga gũtagĩrĩte Kristũ athĩnue ũgu nĩkĩo acoke atonye ũgemuni bwae?”

²⁷ Rĩu Jesũ akĩbatarĩĩria nteto jionde irĩa jiarĩtue imwĩgiĩ Mandĩkoni Matheru monde, akĩambagĩria na mbuku irĩa jĩandĩkirwe nĩ Musa o nkinya irĩa jiandĩkirwe nĩ iroria jionde.

²⁸ Bagũkuĩria ntũũra ĩrĩa bathiĩte, Jesũ agĩkara ta agũkũrũka athi mbere na rũgendo.

²⁹ Ĩndĩ bakĩmũkaĩria bakĩmwĩraga, “Rarĩĩra gũkũ gwetũ; kũrĩ akui gũtuka na gũkwambĩĩria kũgĩa ntuma.” Kwogu agĩtonya kũrara kwao.

³⁰ Na rĩ, rĩrĩa ekarire ndĩ kũrĩa nĩ ajũkirie mũgate, agĩcokeria Ngai nkatho, agicoka akĩũng'enyũranga akĩbanenkera.

³¹ O thaa iu metho mao makĩingũka, bakĩmũmenya. Nawe agĩcoka akĩũra o rimwe, bagĩtiga kũmwona.

³² Bakĩũrania atĩrĩ, “Anga nkoro jietũ itĩgũcancamũkaga rĩrĩa agũtwaragĩria tũrĩ njĩrani, agĩtũtaũragĩra Mandĩko?”

³³ Bagĩũkĩra o thaa iu bagĩcoka Jerusalemu. Bakĩthĩra arutwa barĩa ĩkũmi na ũmwe bethĩranĩte amwe na antũ bau bangĩ baarĩ nabo

³⁴ bakiugaga, “Nĩ ma Mwathani nĩ ariũkĩĩte! Nĩ eonanĩtie kĩrĩ Simoni!”

³⁵ Rĩu athingati bau baĩrĩ nabo bakiuga bũrĩa bonire njĩrani, na bũrĩa bamenyire Jesũ rĩrĩa ang'enyũrangire mũgate.

Jesũ kwĩonania kĩrĩ arutwa bae.

³⁶ O bakĩaragia Jesũ we wengwa akĩonekana arũngi gatagatĩ kao, akĩbeera, “Bũrogĩa na ũkiri!”

³⁷ Ĩndĩ bo bakĩjũrwa nĩ ũkĩri na kĩmako, nĩ tontũ beciragia nĩ nkoma bakwona.

³⁸ Nawe Jesũ akĩbeera atĩrĩ, “Nĩmbi ĩkũbũmakia? Nĩka bũrĩ na nkanja nĩkĩ nkoroni jienu?

³⁹ Raithani njara jiakwa na magũrũ, bwone nĩni ningwa. Ntongani, na bũndaithe, nĩ tontũ nkoma ĩtĩ nyama na mĩĩndĩ ta ino bũkwona ndĩ najio.”

⁴⁰ [Akũthiria kuga ũgu nĩ akĩbonia njara na magũrũ mae.]

⁴¹ Na rĩrĩa bekarĩte ũgu batĩkũmwĩtĩkia nĩũntũ bwa gũkena na kũrigara, Jesũ akĩbaũria atĩrĩ, “Bũrĩ na gĩntũ gĩa kũrĩa gũkũ?”

⁴² Bakĩmũnenkera kĩnuku gĩa samaki ĩrĩa nduge.

⁴³ Akĩmĩjũkia akĩrĩa bakĩonaga.

⁴⁴ Agĩcoka akĩbeera atĩrĩ, “Maũntũ mama nĩmo ndabwĩrire rĩrĩa ndekaranagia nabwi: maũntũ monde mandĩke mambĩgiĩ Wathoni bwa Musa, na Mandĩkoni ma iroria na kĩrĩ Thaburi no mwanka mankĩaingĩkire.”

⁴⁵ O thaa iu Jesũ akĩbaa ũũgĩ bwa kũmba gũtaũkĩrwa nĩ Mandĩko.

⁴⁶ Akĩbeera, “Nĩ kwandĩke atĩrĩ; Kristũ akathĩnua, na ntukũ ya ithatũ no mwanka akariũka, aume kĩrĩ akuũ,

⁴⁷ na no mwanka nteto jiĩgiĩ kwĩrira na kũrekerwa meyia iunjĩrue antũ ba ndĩ yonde, jiambĩrĩtie Jerusalemu.

⁴⁸ Bwiũ bũrĩ aira ba maũntũ mama.

⁴⁹ Atĩrĩ, nĩnkũbũtũmĩra kĩrĩa Baaba augire akabũa, ĩndĩ no mwanka bwetere gũkũ Jerusalemu nkinya rĩrĩa bũkanenkerwa inya ya Ngai kuuma ĩgũrũ.”

Jesũ gwitithua ĩgũrũ

⁵⁰ Agĩcoka akĩbatongoria kuuma kũu ntũũrani, bakĩthi nkinya Bethania. Agĩũkĩĩria njara jiae, akĩbatharima.

⁵¹ Na akĩbatharimaga o ũgu, akĩbatiga, agitithua ĩgũrũ kwa Ngai.

⁵² Nabo bakĩmũthathaiya, na bagĩcoka Jerusalemu barĩ na gĩkeno kinene mũno.

⁵³ Bagekaraga Hekarũni magiita monde bagĩkumagia Ngai.