Luka 23 - NTETO ĨMBEGA TA BŨRĨA YANDĨKIRWE NĨ LUKA

Jesũ kwirwa kĩrĩ Pilatũ

¹ Barĩa bonde baarĩ au kĩamani bagĩũkĩra bakira Jesũ kĩrĩ Pilatũ.

² Bakĩambĩria kũmũthitanga bakiugaga, “Tũragwatire muntũ ũũ akĩremagia antũ ba day yetũ, na agĩkanagia antũ kũrutĩra Kaisari goti, na akiugaga atĩ we nĩwe Kristũ, na nĩ mũnene.”

³ Pilatũ akĩmũũria, “Gwe nĩgwe mũnene wa Ayahudi?” Jesũ akĩmũcokeria, “Ũkuuga bu.”

⁴ Pilatũ akĩĩra athĩnjĩri Ngai barĩa anene amwe na gĩtutu gĩa antũ atĩrĩ, “Ntĩkwona muntũ ũũ arũthĩte ũthũku no bũrĩkũ.”

⁵ Ĩndĩ bo bagĩkinyĩĩria mũno kũmwĩra, “Ũrutani bwae bũtũmĩte antũ bonde batiga gũtuĩka athĩki Judea yonde; ambĩrĩĩrie Galili na rĩu arĩ gũkũ.”

Jesũ kwirwa kĩrĩ Herode

⁶ Rĩrĩa Pilatũ egwire ũgu akĩũria atĩrĩ, “Ka muntũ ũũ arĩ Mũgalili?”

⁷ Na akwĩgua Jesũ arĩ wa kuuma Galili, kũrĩa Herode aathanaga, akiuga airwe kĩrĩ we. Kagiitani kau Herode aarĩ Jerusalemu.

⁸ Herode akwona Jesũ nĩ akenire mũno, nĩũntũ nĩ egujaga nteto nyingĩ imwĩgiĩ na nĩ aatwĩre eriragĩria kũmwona, na nĩ erĩgagĩĩra kwona Jesũ akĩringa kĩama.

⁹ Kwogu akĩũria Jesũ jiũria kagiita ma, ĩndĩ Jesũ atacokia kĩũria o na kĩmwe.

¹⁰ Nabo athĩnjĩri Ngai barĩa anene na arutani ba Watho nĩ bakĩrutanĩria nkũrũki kũthitanga Jesũ.

¹¹ Herode na athigari bae bakĩmũtemba na bakĩmũmaria. Herode agĩcoka agĩĩkĩrithia Jesũ nguo ya goro na akĩmũcokia kĩrĩ Pilatũ.

¹² Herode na Pilatũ baatwĩre barĩ anthũ, ĩndĩ kuuma ntukũ ĩu bagĩtuĩka acoore.

Jesũ gũtuĩrwa kũũragwa

¹³ Pilatũ nĩ etire mũcemanio wa athĩnjĩri Ngai barĩa anene na athani na antũ.

¹⁴ Akĩbeera atĩrĩ, “Bũndeterete muntũ ũũ bũkiugaga atĩ nĩ agwĩtithia antũ. Nkũrĩkia kũmũgambithia mbere yenu na ntamũgwata na maĩtia o na marĩkũ marĩa bũmũthitangĩrĩte.

¹⁵ O nawe Herode atamũgwata na maĩtia. Nĩkĩo gĩtũmi amũcokia kĩrĩ twi. Muntũ ũũ gũtĩ ũntũ arũthĩte wa gũtũma aũragwe.

¹⁶ Kwogu ndĩmũringithia iboko nkĩnamũrekeeria.”

¹⁷ (O kagiita ka Mambura ma Pasaka Pilatũ nĩ athaũragĩra antũ mũbungwa ũmwe ũrĩa bakauga.)

¹⁸ Ĩndĩ antũ bakiugĩĩria barĩ amwe, bakiugaga, “Nĩ aũragwe! Tũthaũrĩre Baraba!”

¹⁹ (Baraba athaĩkĩtwe nĩũntũ bwa gũtũma antũ barega watho, na kũragana.)

²⁰ Pilatũ nĩ endaga kũrekia Jesũ, kwogu akĩarĩria antũ o kaĩrĩ.

²¹ Ĩndĩ antũ bakiugĩrĩria bakiugaga, “Mwambe mũtharabani! Mwambe mũtharabani!”

²² Pilatũ nĩ abarĩrie ĩita rĩa kathatũ akĩbeera, “Mbĩrani, nĩ ũthũku bũrĩkũ arũthĩte? Gũtĩ ũntũ mũthũku nkwona arũthĩte wa gũtũma aũragwa. Kwogu ndĩmũringithia iboko nkĩnamũrekia.”

²³ Ĩndĩ antũ bakiugĩĩria na inya nkũrũki, bakiugaga no mwanka Jesũ ambwe. Mũthiani kĩnegene kĩao gĩgĩcinda.

²⁴ Nĩũntũ bwa gĩtũmi kĩu, Pilatũ agĩtuĩra Jesũ ta bũrĩa antũ bendete.

²⁵ Akĩthaũra muntũ ũu waingĩrĩtwe njera nĩũntũ bwa gũtũma antũ barega kwathĩka na ũragani, nĩũntũ antũ nĩ bamwĩtirie na inya. Akĩbanenkera Jesũ bamũrũtha bũrĩa bendaga.

Jesũ kwambwa mũtharabani

²⁶ Na rĩrĩa athigari baumagarĩtie Jesũ bathiĩte kũmwamba nĩ batirimanire na muntũ ũmwe wa kuuma ntũũra ya Kurene wetagwa Simoni, aumĩte mũgũndani. Bakĩmũgwata na bakĩmwigĩĩra mũtharaba nĩkenda aũkamate arĩ nyuma ya Jesũ.

²⁷ Na gĩkundi kĩnene gĩa antũ gĩkiuma Jesũ nyuma. Bamwe bao baarĩ antũ aka, na nĩ barĩragĩra Jesũ bakiugagĩĩria barĩ na kwĩthikĩĩra kũnene.

²⁸ Jesũ nĩ abeũgũrĩĩre, akĩbeera, “Bwiũ aarĩ ba Jerusalemu tigani kũndĩrĩra; Ĩrĩrĩreni na bũrĩrĩre aana benu.

²⁹ Nĩkwĩthĩrwa kagiita nĩkejĩte karĩa antũ bakaugaga, ‘Kũtharimwa nĩ aka barĩa ndata, barĩa batanagĩa jiana kana nyonto jiao jionkwa!’

³⁰ Ĩndĩ ĩu nĩyo antũ bakambĩĩria kwĩra irĩma ‘Tũgwĩre!’ na beere tũrĩma, ‘Tũkunĩkeni!’

³¹ Tontũ kethĩrwa bũu nĩbu bakũrũtha mũtĩ ũrĩ mwĩthĩ rĩ, bakarũtha ũrĩa mũmũ atĩa?”

³² Nĩgweũkirue antũ bangĩ baĩrĩ, imaramari, bakĩthi kũraganĩrua na Jesũ.

³³ Rĩrĩa bakinyire antũ arĩa eetagwa, “Mũĩndĩ wa kĩongo” bakĩamba Jesũ o, amwe na imaramari iu jiĩrĩ; ũmwe rũteere rwa Jesũ rwa ũrĩo na ũu ũngĩ rũteere rwae rwa ũmotho.

³⁴ Jesũ akiuga atĩrĩ, “Baba, barekere, nĩũntũ batĩkũmenya bũrĩa bakũrũtha.” Athigari bau bagĩcoka bakĩringĩra nguo jia Jesũ kuura bakĩenda kũmenya o ũmwe wa jiao akathi na ĩrĩkũ.

³⁵ Antũ nĩbarũngamĩte baraithĩrĩtie bũrĩa gwekarĩkaga; ĩndĩ atongoria ba Ayahudi nĩbatembaga Jesũ bakiugaga, “Anga ataonokagia antũ barĩa bangĩ, ta nĩ eonokie rĩu, kethĩrwa nĩwe Kristũ ũrĩa Ngai athuurĩte.”

³⁶ Athigari o nabo nĩbamũmaragia; na bakĩja akuĩ nawe, bakĩmũnenkeeria ndibei ya ncachũ,

³⁷ bakĩmwĩraga, “Ĩonokie, kethĩrwa ũũma nĩgwe Mũnene wa Ayahudi!”

³⁸ Na rĩ, au ĩgũrũ rĩa kĩongo kĩae nĩ kwarĩ na mandĩko mama: “Ũũ nĩwe Mũnene wa Ayahudi.”

³⁹ Ũmwe wa imaramari irĩa jiambanĩrĩtue na Jesũ nĩ amũcengire akĩmwĩraga, “Anga gwe tĩgwe Kristũ? Tĩ wĩonokie ũgĩtwonokia!”

⁴⁰ Ĩndĩ kĩmaramari kĩu kĩngĩ gĩkĩmũgũkia, gĩkĩmwĩra, “Nĩka ũtĩgũkĩra Ngai? Gweũ nawe bũtuĩrĩtwe ĩgamba bũmwe, kũũragũa.

⁴¹ Twiũ tũtwĩrĩtwe bũrĩa kũbatiĩ; nĩũntũ bwa jiĩko jietũ ndũku; ĩndĩ muntũ ũũ atĩrũthĩte ũthũku o na bũrĩkũ.”

⁴² Kĩmaramari kĩu gĩkĩĩra Jesũ atĩrĩ, “Jesũ, ũndirikane rĩrĩa ũgacoka na Ũthamaki bwaku.”

⁴³ Nawe Jesũ akĩmũcokeria atĩrĩ, “Ga nkwĩre, ũũma nĩ atĩ ũmundĩ ũũ ũkethĩrwa ũrĩ amwe naani kũũrĩa Ĩkenero.”

Jesũ gũkua

⁴⁴ Na rĩ, gĩntũ ta thaa thiita nĩ kwagĩĩre ntuma ndĩ yonde ya kũu, nkinya thaa kenda,

⁴⁵ nĩũntũ werũ bwa riũa nĩbwakunĩkarire. Nakĩo gĩtambaa kĩa Hekarũ gĩgĩatũkana icuncĩ jiĩrĩ.

⁴⁶ Jesũ agĩkaa na mũgambo mũnene akiuga, “Baba, ndawiga mwoyo wakwa njarani jiaku!” Na akũthiria kuuga ũgu agĩtuĩkana.

⁴⁷ Na rĩrĩa mũnene wa athigari onire bũrĩa gwekarĩka nĩ akumirie Ngai akiugaga, “Gũtĩ nkanja muntũ ũũ ararĩ mwagĩru!”

⁴⁸ Antũ baingĩ mũno nĩbethĩranĩte au bejĩte kwĩonera gĩũntũ kĩu. Rĩrĩa bonire maũntũ marĩa mekarĩkire benũkire bekĩrĩte njara jiongo jiao.

⁴⁹ Nabo antũ barĩa bamwijĩ, amwe na aka barĩa bamũrũmĩĩrĩte kuuma Galili, baarũngi gataaria, na bakĩona maũntũ mau monde.

Jesũ kũthikwa

⁵⁰ Nĩ kwarĩ na muntũ wetagwa Josefu, wa kuuma taũni ĩmwe ya Ayahudi wetagwa Arimathea. Josefu aarĩ ũmwe wa akĩama ba kĩama kĩa atongoria ba Ayahudi, na nĩ aarĩ muntũ mwega na mwagĩru.

⁵¹ Nĩ atũrĩte eteerete kwĩja kwa Ũnene bwa Ngai na atagwatanĩrĩte na nteto jia gũtuĩra Jesũ na kũmwambithia.

⁵² Josefu nĩ athiire kĩrĩ Pilatũ akĩromba anenkerwe mwĩrĩ wa Jesũ.

⁵³ Akĩruta mwĩrĩ mũtharabani, akĩwoania na cuka, akĩthi akĩũmamia mbĩrĩrani ĩrĩa yenjĩtwe ĩigani, na ĩtaarĩ ĩraigwa mwĩrĩ ũngĩ.

⁵⁴ Kwarĩ ntukũ ĩrĩa yetagwa ya Mũbango, rĩrĩa antũ bearagĩĩria nĩũntũ rũni rwa ntukũ ĩu kwarĩ ntukũ ya Mambura ma Pasaka.

⁵⁵ Antũ aka barĩa bejanĩtie na Jesũ kuuma Galili bakiuma Josefu nyuma na bakĩona mbĩrĩra, na bũrĩa mwĩrĩ wa Jesũ wamamirue.

⁵⁶ Bakĩnũka, bakĩthondeka maguta na into jianunkaga wega, jia gwaka mwĩrĩ wa Jesũ. Bagĩcoka bakĩnogoka ntukũ ya Sabatũ, ta bũrĩa Watho bwaugĩte.