Luka 22 - NTETO ĨMBEGA TA BŨRĨA YANDĨKIRWE NĨ LUKA

Mũbango wa kũũraga Jesũ

¹ Rĩu, kĩrugo kĩa Mambura ma Mĩgate ĩrĩa ĩtĩmĩkĩre ndawa ya kwimbia, kĩrĩa gĩtagwa Pasaka, kĩarĩ akuĩ gũkinya.

² Athĩnjĩri Ngai barĩa anene na arutani ba Watho nĩbacũaga bũrĩa bankĩũraga Jesũ na withũ, nĩ tontũ nĩbakĩraga antũ.

Judasi gwĩtĩkĩra gũkunyanĩra Jesũ

³ Rĩu Nkoma nĩ aatonyire Judasi, ũrĩa wetagwa Isikarioti, ũmwe wa arutwa barĩa ĩkũmi na baĩrĩ.

⁴ Judasi nĩ athiire akĩrĩkanĩra na athĩnjĩri Ngai barĩa anene na anene ba arangĩri Hekarũ, bũrĩa ankĩbatetheria kũgwata Jesũ.

⁵ Nabo bagĩkena na bakĩrĩkanĩra bakamũrĩĩa mbeca.

⁶ Judasi agĩtĩkĩra, na akĩambĩĩria gũcũa kanya ka gũkunyanĩra Jesũ antũ batĩkũmenya.

Jesũ kwĩarĩria kũrĩa irio jia Pasaka

⁷ Ntukũ ya Mambura ma Mĩgate ĩrĩa ĩtĩ mĩkĩre ndawa ya kwimbia, na no yo ntukũ ĩrĩa gatũrũme ka Pasaka kathĩnjagwa, nĩ yakinyire.

⁸ Kwogu Jesũ agĩtũma Petero na Johana, akĩbeera, “Thini bũtũbangabangĩre irio jia Pasaka twĩje tũrĩe.”

⁹ Nabo bakĩmũũria, “Nĩkũ ũkwenda tũmĩbangĩra?”

¹⁰ Akĩbeera atĩrĩ, “Bwatonya ntũũrani bũkona mũntũ akamatĩte mũtũngi wa rũjĩ. Mũthingateni nkinya nyomba ĩrĩa agatonya.

¹¹ Bwatonya ku bwĩre mwene nyomba atĩrĩ, ‘Mũrutani arĩkwĩra ũtwonie nyomba ĩrĩa we na arutwa bae bakarĩĩra irio jia Pasaka.’

¹² Akabwonia nyomba nene ngorobani ĩgũrũ ĩrĩ mbange wega na into jionde. Bangĩrani Pasaka ku.”

¹³ Bakĩthi, bakĩthĩra gũkari o ta bũrĩa aberĩĩte. Bakĩbangabanga irio jia Pasaka.

Irio jia Mwathani

¹⁴ Na rĩrĩa thaa jia kũrĩa jiakinyire Jesũ agĩkara ndĩ kũrĩa, arĩ amwe na atũmwa bae.

¹⁵ Akĩbeera atĩrĩ, “Nĩnderirĩrĩtie mũno kũrĩjanĩra nabwi irio jia Pasaka ĩno ntanathĩnua.

¹⁶ Ndĩbwĩra na ma ntĩkarĩa irio jia Pasaka ĩngĩ nkinya rĩrĩa gĩtũmi kĩa mambura ma Pasaka gĩkamenyeka wega Ũnene bwa Ngai bweja.”

¹⁷ Jesũ agĩcoka akĩjũkia gĩkombe, na rĩrĩa arĩkirie gũcokeria Ngai nkatho akĩuga, “Keni gĩkombe gĩkĩ bũnyue bwinde.

¹⁸ Ndĩbwĩra na ma atĩ, kuuma rĩu ntĩkanyua ndibei kaĩrĩ nkinya rĩrĩa Ũnene bwa Ngai bũkeja.”

¹⁹ Akĩjũkia mũgate, na rĩrĩa arĩkirie gũcokeria Ngai nkatho, akĩũng'enyũranga akĩbanenkera akiugaga, “Ũũ nĩ mwĩrĩ wakwa ũrĩa ũnenkanĩrĩtwe nĩũntũ bwenu. Rũthagani ũũ nĩkenda bũkandirikanaga.”

²⁰ Ningĩ o ta ũgu, bakũrĩkia kũrĩa nĩ abanenkere gĩkombe akiugaga, “Gĩkombe gĩkĩ nĩ kĩrĩkanĩro kĩerũ kĩrĩa kĩthondeketwe na ndamu yakwa, ĩrĩa ĩgwĩtũrwa nĩũntũ bwenu.

²¹ “Ĩndĩ bũmenye atĩrĩ, o aa methani ĩno tũrĩ na ũrĩa ũkambendia.

²² Mwana wa Muntũ agakua o ta bũrĩa Ngai abangĩte, ĩndĩ wũinanũ kĩrĩ mũmwendia!”

²³ Rĩu bakĩambĩria kũrania nũũ gatagatĩ kao ũkarũtha ũntũ bũu.

Arutwa kũgĩa nkarari jiĩgiĩ ũnene

²⁴ Gũgĩcoka gũkĩgĩa nkarari gatagatĩ kao, bakĩenda kũmenya nĩ ũrĩkũ kĩrĩ bo mũnene nkũrũki ya bau bangĩ.

²⁵ Nawe Jesũ akĩbeera, “Anene ba antũ barĩa batijĩ Ngai baathaga antũ na njĩra ya kũbainyĩrĩria, bagĩĩtaga aguni antũ.

²⁶ Ĩndĩ tĩ bu bwiũ bũbatiĩ gwĩkara. Ũrĩa mũnene gatagatĩ kenu nĩ ekare ta ũrĩa mũnini buru; na mũtongoria nĩ ekare ta ũrĩa ũtungataga barĩa bangĩ.

²⁷ Atĩrĩ, nĩ ũrĩkũ wĩthagĩrwa arĩ mũnene kĩrĩ ũrĩa ũngĩ, nĩ ũrĩa ũkũreterwa irio methani kana nĩ ũrĩa ũkũretanĩra? Anga tĩ ũrĩa wĩkarĩte methani areterwa? Ĩndĩ niũ mbĩkaranĩtie naabwi nkari ta ũrĩa ũbũtungataga.

²⁸ “Bwiũ nĩbwi bwĩkarĩte amwe naani kagiita ka magerio makwa.

²⁹ Kwogu nĩnkũbũnenkera ũnene o ta bũrĩa Baba anenkere bu.

³⁰ Bukarĩa na bũnyue amwe nani ũneneni bwakwa, na bwĩkarĩre itĩ jia ũnene bũkĩathaga mĩrĩga ĩkũmi na ĩĩrĩ ya Isiraeli.”

Jesũ kwĩra Petero atĩ akamũkana

³¹ Jesũ akĩĩra Petero, “Simoni, Simoni, tathikĩrĩria! Nkoma nĩ arombete rũũtha abũũnge ta bũrĩa ngano iũngagwa.

³² Ĩndĩ nĩ nkũromberete, gwe Simoni, nĩkenda wĩtĩkio bwaku butĩkathĩre, na rĩrĩa ũgancokeera, wĩkagĩre arutwa barĩa bangĩ inya.”

³³ Petero akĩmwĩra, “Mwathani, niũ nĩ ndĩarĩrĩtie kũingĩrwa njera amwe nagwe, o na nkinya kũraganĩrua nagwe.”

³⁴ Ĩndĩ Jesũ akĩmwĩra, “Ndĩkwĩra atĩrĩ, Petero, ncamba ya ngũkũ ĩtĩkurura ũtukũ ũũ wa ũmundĩ ũtĩnkanĩte maita mathatũ.”

Kĩbeti, mondo na rũyiũ

³⁵ Rĩu Jesũ akĩũria arutwa bae atĩrĩ, “Rĩrĩa ndabũtũmĩte bũtĩ na ibeti jia mbeca kana mondo kana iratũ rĩ, kũrĩ gĩntũ bwagire?” Nabo bakiuga, “Arĩ, gũtĩ kĩo.”

³⁶ Nawe Jesũ akĩbeera atĩrĩ, “Ĩndĩ rĩu ũrĩa ũrĩ na kĩbeti na mondo nĩ aikamate, na muntũ ũrĩa ũtĩ na rũyiũ nĩ endie ĩgoti rĩae arũgũre.

³⁷ Nĩũntũ ndĩbwĩra atĩ bũrĩa bwandĩkĩtwe bũmbĩgiĩ no mwanka bũingĩke, atĩ ‘Nĩ atuĩrĩrwe bũmwe ta ũmwe wa antũ barĩa eyia.’ Nĩũntũ maũntũ marĩa mandĩke mambĩgiĩ nĩ ĩndĩ mathiĩte kũinga.”

³⁸ Arutwa bae bakĩmwĩra, “Teene, Mwathani; tũrĩ na mpiũ jiĩrĩ!” Nawe akĩbacokeria akĩbeera, “Nĩ ũgu rĩu!”

Jesũ kũromba arĩ kĩrĩmani kĩa Mĩtamaiyũ

³⁹ Jesũ nĩ aumire ntũũrani akĩthi kĩrĩmani kĩa Mĩolĩbu, o bũrĩa amenyeretie; nabo arutwa bakĩmuuma nyuma.

⁴⁰ Agũkinya antũ arĩa endaga akĩbeera, “Rombani bũtĩkeje kũgwa magerioni.”

⁴¹ Akĩbatiga akĩthi antũ gataaria, agĩturia maru akĩromba akiuga,

⁴² “Baba, kethĩrwa nĩ ũkwenda no ũmpererie gĩkombe gĩkĩ; ĩndĩ wendi bwaku nĩ bwĩkarĩke, no tĩ bwakwa.”

⁴³ Kagĩita o kau mũraika kuuma ĩgũrũ nĩ amumĩrĩĩre, akĩmwĩkĩra inya.

⁴⁴ Nawe Jesũ akĩromba mũno nkũrũki arĩ na ũrũrũ mwingĩ, nkinya ndigino jiakari ta matanta manene ma ndamu igĩĩtĩka ndĩ.

⁴⁵ Akũthiria kũromba agĩũkĩĩra, agĩcoka arĩa atigĩte arutwa, akĩthĩra nĩ bamamire nĩ bũrĩa baũmbĩtwe nĩ kwĩthikĩra.

⁴⁶ Akĩbeera, “Nĩmbi ĩgũtũma bũmaama? Ũkĩrani bũrombe nĩkenda bũtĩkagwe magerioni.”

Jesũ kũgwatwa

⁴⁷ Akĩaragia o ũgu, gũkĩja antũ gĩtutu, batongoretue nĩ Judasi, ũmwe wa arutwa barĩa ĩkũmi na baĩrĩ. Judasi akĩthi akuĩ na Jesũ nĩkenda amũmumunya,

⁴⁸ Ĩndĩ Jesũ akĩmũria atĩrĩ, “Judasi, anga no ũmumunye Mwana wa Muntũ rĩrĩa ũkũmwendia kĩrĩ anthũ bae?”

⁴⁹ Rĩrĩa arutwa barĩa baarĩ na Jesũ bonire bũrĩa kwathiĩte gwĩkara bakĩũria Jesũ atĩrĩ, “Mwathani, tũbatemange na mpiũ?”

⁵⁰ Ũmwe wao agĩtema nkombo ya Mũthĩnjĩri Ngai ũrĩa mũnene, akĩmĩrenga gũtũ kwa ũrĩo.

⁵¹ Ĩndĩ Jesũ akiuga, “Tiganĩ ndũa!” Agĩtongithia gũtũ gwa nkombo akĩmĩragithia.

⁵² Agĩcoka akĩĩra athĩnjĩri Ngai barĩa anene na anene ba arangĩri ba Hekarũ na akũrũ barĩa bejĩte kũmũgwata atĩrĩ, “Nĩka bwĩjĩte na mpiũ na nchũgũma ta mwamba bwĩjĩte kũgwata?

⁵³ Ndaratindanagia nabwi Hekarũni o ntukũ o ntukũ, na bũtangwataga. Ĩndĩ rĩ, gaka nĩ kagiita kenu, na kagiita ga ntuma kwathana.”

Petero gũkana Jesũ

⁵⁴ Bakĩgwata Jesũ bakĩmwira nyomba ya Mũthĩnjĩri Ngai ũrĩa mũnene. Petero akĩbauma nyuma arĩ gataaria.

⁵⁵ Rĩrĩa antũ baakirie mwanki gatagatĩ ka rwirigo rwa kaja na nyomba ĩu ya Mũthĩnjĩri Ngai na bagĩĩkara ndĩ kũwota, Petero agĩĩkara amwe nabo.

⁵⁶ Rĩu, mwarĩ ũmwe ũrĩa warĩ ntungata akĩona Petero ekarĩte akuĩ na mwanki, akĩmũraitha wega agĩcoka akiuga, “Muntũ ũũ o nawe ararĩ amwe na Jesũ.”

⁵⁷ Ĩndĩ Petero agĩkaana, akiuga, “Arĩ mwarĩ, niũ ntĩmwijĩ!”

⁵⁸ Nyuma ya kagiita kanini muntũ ũngĩ akĩona Petero, akiuga, “O nagwe ũrĩ ũmwe wa bo.” Ĩndĩ Petero akĩmwĩra, “Arĩ muntũ ũrĩa, ni ntĩ ũmwe wa bo.”

⁵⁹ Ningĩ nyuma ya kagiita ta ka ĩthaa rĩmwe muntũ ũngĩ nĩ agĩkinyĩĩria ũntũ bũu, akiuga, “Nĩ ma muntũ ũũ o nawe ararĩ amwe na Jesũ, nĩũntũ o nawe nĩ Mũgalili!”

⁶⁰ Ĩndĩ Petero akiuga atĩrĩ, “Tiga muntũ ũũ; o na ntiijĩ nĩmbi ũkuga.” O rĩo Petero akĩaragia o ũgu, nchamba ya ngũkũ ĩgĩkurura.

⁶¹ Mwathani akĩũgũra, akĩraitha Petero. Petero akĩririkana jiugo irĩa Mwathani amwĩrire, atĩrĩ, “Mbere ya nchamba ya ngũkũ ĩkurura ũtukũ wa ũmundĩ, ũgankana maita mathatũ.”

⁶² Petero akiuma nja ya rwirigo akĩrĩra, arĩ na marũrũ maingĩ mũno.

Jesũ kũmarua na kũriwa

⁶³ Antũ barĩa baarangĩrĩte Jesũ nĩbamũmaragia na kũmũria.

⁶⁴ Ningĩ nĩ bamũkunĩkaga metho na gĩtambaa, bakamũũria, “Ta roria, ũtwĩre nũũ ũu wakũringa?”

⁶⁵ Bakĩmũgera jiugo jiĩngĩ nyingĩ mũno jia ncengo.

Jesũ kwirwa mbere ya kĩama

⁶⁶ Rũkĩrĩ gwakĩa, kĩama gĩa akũrũ, athĩnjĩri Ngai barĩa anene na arutani ba Watho gĩgĩkara ndĩ, nawe Jesũ akĩretwa kĩamani. Bakĩmũũria atĩrĩ,

⁶⁷ “Ta twĩre, gwe nĩgwe Mesia?” Jesũ akĩbacokeria akĩbeera, “O na nkabwĩra nĩni we bũtĩtĩkia.

⁶⁸ Ningĩ nkabũũria kĩũria bũtĩncokeria.

⁶⁹ Ĩndĩ kuuma rĩu Mwana wa Muntũ akethĩrwa ekarĩte mwena wa ũrio wa Ngai Mwene Inya Yonde.”

⁷⁰ Akĩama bonde bakĩmũũria, “Kwogu gwe ũrĩ Mwana wa Ngai?” Nawe akĩbacokeria, “Bwiũ nĩ bũkuga atĩ ndĩ we.”

⁷¹ Akĩama bau bakĩĩrana atĩrĩ, “Nĩ ũira bũrĩkũ bũngĩ tũkwenda? Tũkwĩĩguĩra na matũ metũ bũrĩa auga.”