Luka 21 - NTETO ĨMBEGA TA BŨRĨA YANDĨKIRWE NĨ LUKA

Kĩeo kĩa mũka ntigwa

¹ Jesũ nĩ araithĩrĩrie akĩona bũrĩa itonga jiekagĩra iewa jiao ĩthandũkũni rĩa mwothi, kũu Hekarũni.

² Agĩcoka akĩona mũka ntigwa mũthĩni akĩruta ciringi jiĩrĩ jia rũthuku.

³ Akiuga, “Ndĩbwĩra na ma atĩ mũka ntigwa ũũ akũruta mbeca nyingĩ nkũrũki ya bau bangĩ bonde.

⁴ Gĩtũmi nĩ atĩ barĩa bangĩ barĩruta imwe jia irĩa igũtigara barĩkia kũingia mabata mao, ĩndĩ mũka ũũ anarĩ mũthĩni o ũgu, aruta o na kĩrĩa ankĩagũra gĩa kũrĩa nakĩo.”

Jesũ kwaria maũntũ megiĩ kwomorangwa gwa Hekarũ.

⁵ Na rĩ, arutwa bamwe ba Jesũ nĩbaragia bakiugaga bũrĩa Hekarũ yagemetue na maiga ma goro na iewa ĩrĩa Ngai arutagĩrwa. Nawe Jesũ akiuga atĩrĩ,

⁶ “Kagiita gakeja ino jionde bũkwona jiomorangwe, kwage ĩiga o na rĩmwe ĩgũrũ rĩa rĩrĩa rĩngĩ.”

Mathĩna na mĩnyamaro

⁷ Arutwa bae bakĩmũũria atĩrĩ, “Mũrutani, maũntũ mama magekarĩka rĩ? Nĩmbi ĩgatwonia atĩ maũntũ mama marĩ akuĩ gwĩkarĩka?”

⁸ Jesũ akĩbeera, “Ĩmenyagĩĩreni bũtĩkeje kwaĩrua; nĩũntũ antũ baingĩ bakeja bagĩtũmagĩra riĩtwa rĩakwa bakiugaga, ‘Nĩni Kristũ!’ na ‘Kagiita nĩ gakinyu!’ Bũtĩkabathingate.

⁹ Bũtĩgakĩre rĩrĩa bũkegua nteto jia ndũa na mbũkanĩĩro; no mwanka maũntũ mau mambe matwĩkĩke, ĩndĩ tĩtakuga mũthiro wa ndĩ ũrĩ akuĩ gũkinya.”

¹⁰ Akĩthi na mbere kũbera, “Ndĩ igaũkanĩĩra na monene maũkanĩĩre.

¹¹ Gũntũ kwingĩ gũkagĩa na ithingithia nene, ĩũra na mĩrimũ ya mĩthiro, na imaũntũ jioneke kuuma ĩgũrũ jia gũkĩrithia mũno na kũmakanithia.

¹² Ĩndĩ mbere ya maũntũ mau monde mekarĩka bakabũgwata na babũthĩnie. Bakabwira sinagoguni nĩkenda bũgambithue na babũthaĩkithie njera, na babwire mbere ya anene na ma gavana nĩũntũ bwa riĩtwa rĩakwa.

¹³ Gaka nĩko gakethĩrwa karĩ kanya kenu kũruta ũira bwakwa.

¹⁴ Bũtĩgatinde gwĩtanga bũgĩciria bũrĩa bũkauga rĩrĩa bũkagambithua.

¹⁵ Nĩni nkabũa ũũgĩ bwa kwaria bũrĩa bũtĩkaũmĩrua kana bũkararua nĩ anthũ benu.

¹⁶ Bũgakunyanĩrwa o na nĩ ajiari benu, nĩ barĩa bũjiaranĩrĩtue nabo, nĩ ndũgũ na acoore benu; na bamwe benu bakaũragwa.

¹⁷ Bũkathũũrwa nĩ antũ bonde nĩũntũ bwa riĩtwa rĩakwa.

¹⁸ Ĩndĩ gũtĩ rũjuĩrĩ o na rũmwe rwa kĩongo kĩenu rũkaũra.

¹⁹ Kũũmĩria kwenu nĩ ku gũgatũma bwonokia mĩoyo yenu.

Jesũ kwaria maũntũ megiĩ kũmomorangwa kwa Jerusalemu

²⁰ “Ĩndĩ ĩrĩa bũkona mũjiĩ mũnene wa Jerusalemu ũgĩcĩgĩĩrua nĩ mbũtũ ya athigari, bũmenye kagiita kau ga kũmomorangwa karĩ akuĩ.

²¹ Kagiita kau barĩa bakethĩrwa barĩ Judea nĩ baũre bakeithe irĩmani; barĩa bakethĩrwa barĩ ndani ya taũni bakaumagara baume ku, na barĩa bakethĩrwa barĩ mĩgũndani batĩtonya ku.

²² Nĩũntũ iu nĩ jio ikethĩrwa irĩ ntukũ jia kĩerithanio, nĩkenda monde marĩa mandĩkĩtwe maingĩke.

²³ Wũũi kĩrĩ barĩa bakethĩrwa barĩ na nda na barĩa bakethĩrwa barĩ na twana twa gwonkia! Nĩũntũ ndĩ ĩno ĩkagĩa na kũthĩnĩka kũnene ĩndĩ ya kũerithua kwa antũ baba.

²⁴ Bamwe bakaũragwa na rũyiũ na bangĩ batawe bathamithue bathi bakĩnyagaragua antũni bonde ba ndĩ. Nabo antũ batĩ Ayahudi bakathũkangia Jerusalemu nkinya rĩrĩa kagiita kao ga kwathana gakathira.

Kwĩja kwa Mwana wa Muntũ

²⁵ “Gũkoneka ndwano riũani na mwerini, na nkinya njatani, nabo antũ ba ndĩ jionde bakagĩa na kũthĩnĩka na ũkĩri nĩũntũ bwa mĩrurumo na mĩkuũko ya ĩria.

²⁶ Antũ bakagirĩka nĩ ũkĩri, beterete kwona bũrĩa ndĩ ĩgekara, nĩũntũ mainya ma ĩgũrũ bakainainua.

²⁷ Nĩrĩo bũgacoka bwone Mwana wa Muntũ ejĩte arĩ ĩtuni, arĩ na inya na ũkengi mũnene.

²⁸ Rĩrĩa bũkona maũntũ mau mambĩria gwĩkarĩka rĩ, rũngamani wega, nĩũntũ wonokio bwenu bũkethĩrwa bũrĩ akuĩ.”

Ũrutani kuumania na mũfigi

²⁹ Jesũ agĩcoka akĩbaa ngerekano ĩno: “Ĩcirĩrieni mũfigi, na mĩtĩ ĩrĩa ĩngĩ yonde.

³⁰ Rĩrĩa bwona ĩkĩririba nĩbũmenyaga thano ĩrĩ gũkuĩ gũkinya.

³¹ Ũgu no bu o na bwi, rĩrĩa bũkona maũntũ magĩkarĩka, bũkamenya Ũnene bwa Ngai bũrĩ akuĩ.

³² “Ndĩbwĩra na ma atĩ rũjiaro rũrũ rũtĩthira maũntũ mama monde matĩkarĩkĩte.

³³ Ĩgũrũ na ndĩ ikathira, ĩndĩ jiugo jiakwa itĩkathira.

Gĩtũmi gĩa kwĩmenyeera

³⁴ “Ĩmenyagĩĩreni nkoro jienu itĩgatawe nĩ ndĩa na ũrebi, na gwĩtanga na maũntũ ma ũtũũro bwa gũkũ ndĩ. Bwarega kwĩmenyeera ntukũ ĩu ĩkabwĩthĩĩra o rĩmwe,

³⁵ ta mũtego, tontũ ĩkeja kĩrĩ antũ bonde barĩa batũũraga gũkũ ndĩ yonde.

³⁶ Ĩkaragani bwĩũgĩte magiita monde, bũkĩrombaga Ngai abũe inya ya kũmĩĩria maũntũ mama monde magekarĩka, na abũe inya ya kũmba kũrũngama mbere ya Mwana wa Muntũ.”

³⁷ Ntukũ o ntukũ Jesũ nĩarutanaga Hekarũni, na gwatuka akathi kũmama kĩrĩmani kĩrĩa gĩĩtagwa kĩa Mĩolĩbu.

³⁸ Na rũkĩĩrĩ mũno antũ bonde nĩbejaga kĩrĩ we Hekarũni kũmũthĩkĩĩria.