Luka 2 - NTETO ĨMBEGA TA BŨRĨA YANDĨKIRWE NĨ LUKA

Kũjiarwa kwa Jesũ

¹ Kagiitani kau mũnene Kaisari Agũstũ nĩ aarutire watho atĩ antũ barĩa batũũrĩte ndĩ yonde ĩrĩa yathagwa nĩ ũnene bwa kĩ Roma batarwe.

² Gũtarana gũkũ nĩ ku kwarĩ kwa mbere kũrũthwa rĩrĩa Kwiriniasi aarĩ gavana wa Sĩria.

³ Antũ bonde bakĩthi kwĩandĩkithia, o muntũ taũni nene ya kwao.

⁴ O nawe Josefu nĩ aumire kũu kwao Galili taũni nene ya Nazarethi akĩthi taũni nene ya Daudi ĩrĩa yetagwa Bethilehemu, kũu Judea. Athiire ku nĩũntũ aarĩ wa rũrĩjo rwa Daudi.

⁵ Akĩthi kwĩandĩkithia arĩ amwe na mũcoore wae Maria, ũrĩa warĩ mũrito.

⁶ Na rĩrĩa baarĩ kũu Maria agĩkinyia ĩndĩ ya kũgĩa mwana.

⁷ Akĩgĩa na kaana, ĩrikithathi rĩa kaĩjĩ; agĩgatunga na cuka. Agĩkamamia rũkongoroni rwa ng'ombe, nĩũntũ gũtarĩ na kanya mũkawani arĩa bangĩkara.

Arĩĩthi kumĩĩrwa nĩ mũraika

⁸ Gũntũ kũu nĩ kwarĩ na arĩthi nyakini bekarĩtie ũrĩthi wao ũtukũ.

⁹ Mũraika wa Mwathani nĩ abaumĩrĩĩre, na ũkengi mũnene wa Mwathani ũkĩbathiũrũkĩria, na bakĩgwatwa nĩ ũkĩri mwingĩ mũno.

¹⁰ Ĩndĩ mũraika akĩbeera, “Tigani gũkĩra! Nĩũntũ rĩ, ndĩbũreterete nteto ĩmbega na ĩrĩa ĩgatũma antũ bonde bagĩe na gĩkeno kinene.

¹¹ Nĩũntũ ũmundĩ, kũu taũni nene ya Daudi nĩ bũjiarĩrĩtwe Mwonokia, na nĩwe Kristũ Mwathani.

¹² Na bũkamenya kaana kau atĩrĩ: bũkona kagenke gatungĩtwe na cuka na karĩ kamamie rũkongoroni rwa ng'ombe.”

¹³ Kagiita o kau mũraika ũu akĩthiũrũkĩrua nĩ gĩkundi kĩnene kĩa araika bangĩ, bagĩkumia Ngai bakiugaga,

¹⁴ “Ngai Ũrĩa ũrĩ Ĩgũrũ Mũno arokumua, Naku ndĩ kũgĩe ũkiri gatagatĩni ka antũ barĩa bakenagia nkoro yae.”

¹⁵ Rĩrĩa araika babatigire baitia ĩgũrũ, arĩthi bakĩĩrana; “Tũthini kũu Bethilehemu tũkeonere maũntũ mama Mwathani atũmenyithia.”

¹⁶ Bakĩthi bajiũĩte bakĩthĩra Maria na Josefu, na kagenke kamamĩtue rũkongoroni rwa ng'ombe.

¹⁷ Na rĩrĩa bonire kaana, bakĩĩra ajiari ba ko nteto irĩa baarĩ bakwĩrwa nĩ mũraika jiĩgiĩ kaana kau.

¹⁸ Na antũ bonde barĩa beguire nteto iu jia arĩthi bakĩrĩgara mũno.

¹⁹ Ĩndĩ we Maria akiiga maũntũ mama monde nkoroni yae, akameciragia kaingĩ.

²⁰ Arĩthi bagĩcoka kĩrĩ ũrĩthi bwao, bagĩkumagia na gũkaatha Ngai nĩ marĩa monde beguĩte na bakĩona, o ta bũrĩa berĩtwe ni mũraika.

Jesũ gũtuĩrwa riĩtwa

²¹ Ntukũ inyanya ikũthira na kaana gagũtanwa, nĩgetirwe Jesũ, riĩtwa rĩrĩa mũraika augĩte getwe mbere ya gina agĩa nda.

Jesũ kwirwa Hekarũni

²² Nĩ gwakinyire kagiita ka Maria na Josefu kũrũtha mambura ma kwĩtheria, ta bũrĩa Watho bwa Musa bwathanĩte. Kwogũ bakiira Jesũ Jerusalemu, kũmũnenkanĩra kĩrĩ Mwathani,

²³ (ta bũrĩa kwandĩkĩtwe Wathoni bwa Mwathani atĩ, “No nkinya ĩrikithathi rĩonde rĩa kaĩjĩ rĩamũrĩrwe Mwathani”)

²⁴ na rĩrutĩrwe kĩgongoana kĩa “tũjĩa twĩrĩ kana tũnyoni twĩrĩ twa mũthemba wa tũjia” kũringana na Watho bwa Mwathani.

²⁵ Kagiitani o kau nĩ kwarĩ na muntũ watwĩre kũu Jerusalemu wetagwa Simioni. Nĩ arĩ muntũ mwagĩru na nĩ akĩrĩte Ngai. Simioni aatwĩre eterete kwona kwonokua kwa antũ ba Isiraeli, na Roho Mũtheru nĩ arĩ amwe nawe.

²⁶ Roho Mũtheru nĩ amũguũrĩrĩtie atĩ atĩkua atĩonete Kristũ ũrĩa weranĩrĩtwe nĩ Mwathani.

²⁷ Simioni nĩ atongorirue nĩ Roho Mũtheru, akĩthi Hekarũni. Na rĩrĩa Jesũ aretirwe Hekarũni nĩ ajiari bae nĩkenda baingia bũrĩa Watho bwaugĩte,

²⁸ Simioni nĩ amũjũkirie njarani jiae na agĩcokeria Ngai nkatho akiuga,

²⁹ “Rĩu Mwathani ĩtĩkĩĩria ntungata yaku ĩthi ĩrĩ na ũkiri, Kũringana na uuge bwaku;

³⁰ Nĩũntũ metho makwa nĩmeonerete wonokania bwaku

³¹ Bũrĩa gwe ũthondekete mbere ya antũ bonde

³² Bũrĩ werũ bwa kũguũrĩria antũ batĩ Ayahudi, na ũkumio kĩrĩ antũ baku ba Isiraeli.”

³³ Ajiari ba Jesũ nĩbarigarirue mũno nĩ maũntũ marĩa Simioni aaririe megiĩ kaana kau.

³⁴ Simioni akĩbatharima, agĩcoka akĩĩra Maria, gina wa Jesũ, “Atĩrĩ, kaana gaka nĩ kathurĩtwe nĩ Ngai nĩkenda gatũme antũ baingĩ ba Isiraeli bathire na bangĩ baingĩ bonoke. Gakethĩrwa karĩ kĩonania kuuma kĩrĩ Ngai kĩrĩa antũ baingĩ bakaregana nakĩo,

³⁵ nabu bũrĩa antũ beciragia nkoroni jiao bumbũke; Naagwe ũgacinwa nĩ ũrũrũ ta bwa rũyiũ rũkũmuntĩte nkoro.”

³⁶ Na o kũu nĩ kwarĩ mũgekũrũ kĩroria, waarĩ mũkũrũ mũno wetagwa Anna. Anna aarĩ mwarĩ wa Fanueli, wa kuuma mbarĩ ya Asheri. Akũgũrwa, nĩ atũũrire na mũrũme mĩaka mũgwanja,

³⁷ mũrũme agĩcoka agĩkua. Anna agĩtũũra arĩ ntigwa, agĩkinyia mĩaka mĩrongo ĩnaana na ĩna. Aatũraga Hekarũni akĩthathaagia Ngai, eimĩte irio na akĩrombaga Ngai ũtukũ na mũthenya.

³⁸ Ĩthaani o rĩu Jesũ anenkanagĩrwa Hekarũni Anna nĩ akinyire na agĩcokeria Ngai nkatho nĩũntũ bwa kaana kau Jesũ. Akĩaria nteto jiĩgiĩ kaana kau kĩrĩ antũ barĩa bonde batwĩre beterete gũkũrũa kwa Jerusalemu.

Gũcoka Nazarethi

³⁹ Rĩrĩa Maria na Josefu barĩkirie kũingia maũntũ marĩa monde mabatiĩ kũingua kĩrĩ Watho bwa Mwathani, nĩbacokire kwao mũjiĩ Nazarethi, kũu Galili.

⁴⁰ Nako kaana nĩ gakũrire, na gakĩgĩa inya na ũũgĩ mwingĩ, na wega wa Ngai waarĩ amwe nako.

Jesũ Hekarũni

⁴¹ O mwaka, ajiari ba Jesũ nĩbathijaga Jerusalemu gũkeneera mambura ma Pasaka.

⁴² Na ta bũrĩa kwarĩ wĩthĩre, Jesũ agũkinyia mĩaka ĩkũmi na ĩĩrĩ nĩ athijanirie na ajiari bae Jerusalemu, mamburani mau.

⁴³ Mambura makũthira, ajiari ba Jesũ nĩbagwatire njĩra bakĩambĩria gũcoka kwao, ĩndĩ Jesũ agĩtigwa Jerusalemu, na ajiari bae batĩnamenye.

⁴⁴ Nĩ bathiire rũgendo rwa ntukũ ngima, o bakĩmũcũaga kũu gatagatĩni ka acoore na antũ bao, nĩũntũ beciragia aarĩ o kũu gĩkundini kĩa barĩa benũkanĩtie nabo.

⁴⁵ Bakũmwaga, bagĩcoka Jerusalemu o bakĩmũcũaga.

⁴⁶ Nyuma ya ntukũ ithatũ bakĩmwĩthĩra Hekarũni, ekaranĩtie na arutani abathikĩrĩtie na akĩbaũragia jiũria.

⁴⁷ Antũ bonde barĩa bamũthikĩrĩtie nĩbarigarire nĩ bũrĩa agĩcokia jiũria na ũũgĩ mwingĩ.

⁴⁸ Ajiari bae bakũmwona nĩbarigarire mũno. Gina akĩmũũria, “Mwana wakwa, nĩmbi ĩtũmĩte ũtũrutithia wĩra bũkari ũũ? Niũ na abagu tũtangĩkĩte mũno tũgĩgũcũa.”

⁴⁹ Jesũ akĩbaũria, “Nĩmbi ĩgũtũmaga bũncũa? Nĩka bũtaijĩ no mwanka nkethĩrwa ndĩ nyombani ya Baba?”

⁵⁰ Ĩndĩ ajiari batataũkĩrwa nĩ bũrĩa aberire.

⁵¹ Agĩcoka akĩbathingata, bakĩĩnũka kwao Nazarethi, kũrĩa ekarire akĩbaathĩkagĩra. Nawe gina nĩ aigaga maũntũ mama monde nkoroni, akameciragia kaingĩ.

⁵² Nawe Jesũ agĩkũra akĩneneaga mwĩrĩ, akĩũgĩaga, na akĩendagwa nĩ Ngai o na nĩ antũ.