Luka 17 - NTETO ĨMBEGA TA BŨRĨA YANDĨKIRWE NĨ LUKA

Wĩyia

¹ Jesũ nĩ erire arutwa bae atĩrĩ, “No nkinya maũntũ ma gũtũma muntũ eyie moneke; ĩndĩ ũinanũ kĩrĩ ũrĩa ũtũmaga moneka!

² O na kaaba muntũ ta ũu oeretwe ĩiga rĩa kĩthĩi nkingo na akagerwa ĩriani nkũrũki ya gũtũma kamwe ga twana tũtũ twĩyie.

³ Menyagĩĩrani jiĩko jienu. “Mũruanyũkwe angĩgwĩtĩria mũkanie, na ankĩĩrira mũrekere.

⁴ Akeja gũgwĩtĩria maita mũgwanja ntukũ o ĩrĩa ĩmwe, ĩndĩ o aagwĩtĩria akeja agakwĩra, ‘Ndekera,’ no nkinya ũmũrekere.”

Wĩtĩkio

⁵ Nabo atũmwa bakĩĩra Mwathani, “Twongere wĩtĩkio bwetũ.”

⁶ Nawe Mwathani akĩbacokeria akĩbeera atĩrĩ, “Kethĩrwa no bũgĩe wĩtĩkio bwĩgana ta gapĩndĩ ka mũthandũkũ, bũnkĩĩra mũtĩ ũũ wa mũfigi, ‘Gũka ũthĩ wĩande ĩrĩani,’ na ũkabwathĩkĩra.”

Wĩra bwa ntungata

⁷ “Ũmwe wa jienu ankĩthĩrwa arĩ na ntungata ya kũrĩma kana ya kũrĩthia ng'ondu, anga rĩrĩa yakinya yumĩte wĩrani no amĩĩre ‘Njũ na mpũĩ wĩkare ndĩ ũrĩe irio?’

⁸ Anga tĩka akamĩĩra, ‘Ĩbange ũndugĩre irio, ũndetere ndĩe na nyue, ndarĩkia nagwe ũcoke ũrĩe na ũnyue?’

⁹ Anga no acokerie ntungata ĩu nkatho nĩũntũ ĩkũrũtha bũrĩa amĩathĩte ĩrũthe?

¹⁰ Kwogu o nabwi rĩrĩa bwarũtha bũrĩa bunde bwathĩrĩtwe ugagani atĩrĩ, ‘Twi tũrĩ o ntungata; twarũtha o bũrĩa tũbatiĩ kũrũtha.’ ”

Jesũ kũragithia antũ ĩkũmi

¹¹ Na rĩ, Jesũ arĩ rũgendoni athiĩte Jerusalemu nĩ akũrũkanĩrĩrie mĩakani ya Samaria na Galili.

¹² Na rĩrĩa atonyaga ntũũrani ĩmwe agĩtũngana na antũ ĩkũmi barwarĩte mũrimũ wa mũtigiri. Antũ bau bakĩrũngama gataaria,

¹³ bakiugĩrĩria bakiugaga, “Jesũ, Mwathani, twĩguĩre kĩao!”

¹⁴ Rĩrĩa Jesũ abonire akĩbeera, “Thini bũkeonanie kĩrĩ athĩnjĩri Ngai.” Na rĩrĩa baarĩ njĩrani bathiĩte bakĩtherua.

¹⁵ Rĩrĩa ũmwe wao onire akũragĩthua nĩ agarũkire agĩcoka, agĩkumagia Ngai na mũgambo mũnene.

¹⁶ Akĩĩgwĩthia magũrũni ma Jesũ na akĩmũcokeria nkatho. Muntũ ũu aarĩ Mũsamaria.

¹⁷ Jesũ akĩmũũria, “Anga ntĩtheririe antũ ĩkũmi? Bau bangĩ kenda barĩ kũ?

¹⁸ Gũtĩ ũngĩ ũracoka gũcokeria Ngai nkatho o tiga mũgeni ũũ?”

¹⁹ Jesũ agĩcoka akĩĩra muntũ ũu atĩrĩ, “Ũkĩra wĩthiĩre; wĩtĩkio bwaku nĩbu bwakũragithia.”

Kwĩja kwa Ũnene bwa Ngai

²⁰ Na rĩ, Afarisai bamwe nĩbaũririe Jesũ rĩrĩa Ũnene bwa Ngai bũkeja, nawe akĩbacokeria akĩbeera, “Ũnene bwa Ngai bũtĩkeja na imenyithia ikwoneka.

²¹ Na bũtĩũka bũrĩa muntũ ankĩũmba kuga, ‘Eneni, nĩu ũũ!’ kana ‘Nĩu ũrĩa!’ Nĩ tontũ rĩ, Ũnene bwa Ngai bũrĩ gatagatĩni kenu.”

²² Agĩcoka akĩĩra arutwa bae atĩrĩ, “Kũrĩ kagiita gagakinya bwĩrirĩrie kwona ĩmwe ya ntukũ jia Mwana wa Muntũ, ĩndĩ bũtĩkamĩona.

²³ Antũ bakabwĩraga, ‘Eneni, arĩ aarĩa!’ kana ‘Eneni arĩ aa!’ Menyani bũthi kĩrĩ bo, na bũtĩkabathingate.

²⁴ Nĩũntũ rĩ, o ta bũrĩa rweni rwenagia rũkamũrĩka matũni kuuma mwena ũmwe nkinya ũrĩa ũngĩ, no ta bu Mwana wa Muntũ akethĩrwa akari ntukũ ĩu yae yakinya.

²⁵ Ĩndĩ no mwanka ambe athĩnĩke mũno na aregwe nĩ rũjiaro rũrũ.

²⁶ O ta bũrĩa gwakari kagiitani ka Noa no bu gũkethĩrwa gũkari ntukũni jia Mwana wa Muntũ.

²⁷ Kagiita kau antũ nĩbarĩjaga na bakanyua, bakagũrana na bakagũrũa, nkinya ntukũ ĩrĩa Noa atonyire thabinani, mbura ĩkiura gũkĩgĩa kĩguũ, gĩkĩbathiria bonde.

²⁸ O na ĩgiita rĩa Loti nobu gwakari; antũ nĩbaarĩjaga, bakanyua, bakagũra, bakendia, bakaanda na bagaaka nyomba.

²⁹ Ĩndĩ ntukũ ĩrĩa Loti aumire Sodomu, Ngai aurithirie mbura ya mwanki na ũbiriti kuuma ĩgũrũ ĩkĩbathiria bonde.

³⁰ Ũgu nĩbu gũgekara ntukũ ĩrĩa Mwana wa Muntũ akonanua.

³¹ “Ntukũ ĩu muntũ ũrĩa ũkethĩrwa arĩ ĩgũrũgũrũ rĩa nyomba atĩgakinye ndĩ athi kũjũkia into jiae irĩa irĩ nyomba ndani. Na ũrĩa ũkethĩrwa arĩ mũgũndani atĩgacoke mũjiĩ.

³² Ta ririkanani mũka wa Loti!

³³ Muntũ ũrĩa ũgeragia kwonokia mwoyo wae akaũrwa nĩu, na ũrĩa ũtejaga mwoyo wae akawonokia.

³⁴ Ndabwĩra atĩrĩ, ũtukũ bũu antũ baĩrĩ bakethĩrwa bamami gĩtandani kĩmwe; ũmwe akajũkua, ũu ũngĩ atigwe.

³⁵ Aka baĩrĩ bakethĩrwa bagĩkiĩra amwe; ũmwe ajũkue, ũu ũngĩ atigwe.

³⁶ [Antũ baĩrĩ bakethĩrwa barĩ amwe mũgũndani; ũmwe ajũkue, ũu ũngĩ atigwe.”]

³⁷ Arutwa bae bakĩmũũria atĩrĩ, “Mwathani, nĩ kũ maũntũ mama magekarĩkĩra?” Nawe akĩbacokeria akĩbeera atĩrĩ, “Arĩa kimba kĩrĩ rĩ, nĩ o nderi jiĩthĩranaga.”