Luka 16 - NTETO ĨMBEGA TA BŨRĨA YANDĨKIRWE NĨ LUKA

Mũmenyeeri into ũrĩa warĩ mwara

¹ Jesũ agĩcoka akĩĩra arutwa bae atĩrĩ, “Muntũ ũmwe gĩtonga nĩ andĩkĩte muntũ wa kũmenyeera into jiae. Ntukũ ĩmwe gĩtonga kĩu gĩkĩĩrwa atĩ mũmenyeeri into ũu nĩ akũthũkangia into jiae.

² Gĩgĩĩta mũmenyeeri gĩkĩmũũria, ‘Nĩ nteto irĩkũ ino nkwĩgua ikwĩgiĩ? Ndondekera riboti ya mathabu ma into jiakwa irĩa ũmenyagĩĩra, tontũ ũtĩkũthi mbere kũimenyeera kaĩrĩ.’

³ Muntũ ũu akĩũria na nkoro atĩrĩ, ‘Natĩa nkũrũtha rĩu? Mwathi wakwa nĩka akũmbuta wĩra. Ntĩ na inya ya gũcimba na nkegua ndoni jia kũrombarombaga.

⁴ Nĩnkũmenya bũrĩa nkũrũtha, nĩkenda antũ bakangwataga ũgeni mĩjiĩ kwao rĩrĩa nkabutwa wĩra bwa ũmenyeeri.’

⁵ Akĩambĩĩria gwĩta erandũ ba mwathi wae ũmwe kwa ũmwe. Akĩũria wa mbere atĩrĩ, ‘Ũrĩ na randũ ya mwathi wakwa ĩĩgana?’

⁶ Nawe akĩmũcokeria, ‘Ndĩ na randũ ya mĩtũngi ĩgana ya maguta.’ Mũmenyeeri akĩmwĩra, ‘Ke riciti ya randũ yaku, wĩkare ndĩ mpũĩ wandĩke randũ yaku nĩ mĩtũngi mĩrongo ĩtano.’

⁷ Akĩĩra ũngĩ, ‘Yaku randũ nĩ ĩĩgana?’ Nawe akiuga, ‘Nkunia ĩgana jia ngano.’ Mũmenyeeri akĩmwĩra, ‘Ke riciti ya randũ yaku wandĩke mĩrongo ĩnaana.’

⁸ Na rĩ, mwathi ũu wa mũmenyeeri ũrĩa atarĩ mwĩtĩkĩku nĩ amũkathĩrĩrie nĩũntũ bwa wara bũrĩa atũmĩĩre; nĩũntũ rĩ, antũ ba ndĩ ĩno nĩbaũmbaga gũtũmĩra mawara kũrũtha maũntũ mao nkũrũki ya antũ barĩa barĩ na werũ.

⁹ “Ka ndĩbwĩreni, ĩthondekereni acoore na ũtonga bwa gũkũ ndĩ ũtĩnarĩ mwagĩru, nĩkenda rĩrĩa ũkathira bũkagwatwa ũgeni kũrĩa antũ batũũraga tene na tene.

¹⁰ Muntũ ũrĩa ũmba gwĩtĩkĩka kĩrĩ tũinto tũnini no etĩtĩkĩke kĩrĩ into nyingĩ; ĩndĩ ũrĩa ũtĩũmba gwĩtĩkĩka kĩrĩ tũinto tũnini atĩtĩkĩka o na kĩrĩ irĩa nyingĩ.

¹¹ Kwogu, kethĩrwa bũtĩũmba gwĩtĩkĩka kĩrĩ ũtonga bũrĩa bũrĩ bwa gũkũ ndĩ rĩ, nũũ ũnkĩbwĩtĩkia na ũtonga ũrĩa wa ma?

¹² Na kethĩrwa bũtĩtĩkĩka na into jiene rĩ, nũũ ũkabũnenkera irĩa irĩ jĩenu?

¹³ “Gũtĩ ntungata ĩnkĩũmba gũtũmĩkĩra athani baĩrĩ; nĩũntũ no ĩthũũrire ũmwe na yende ũu ũngĩ, kana ĩtũmĩkĩre ũmwe na ĩmene ũu ũngĩ. Ũtĩũmba gũtungata Ngai na ũtungata ũtonga bwa ndĩ.”

Mĩario ĩngĩ ĩrĩa Jesũ aaririe

¹⁴ Rĩrĩa Afarisai begwire bũu bunde nĩbatembire Jesũ, nĩũntũ nabo baarĩ endu mbeca mũno.

¹⁵ Ĩndĩ Jesũ akĩbeera, “Bwiũ bwĩtujaga agĩru methoni ma antũ ĩndĩ Ngai nĩ aijĩ nkoro jienu. Nĩũntũ rĩ, maũntũ marĩa monekanaga marĩ ma bata methoni ma antũ marĩ magigi methoni ma Ngai.

¹⁶ “Watho bwa Musa na ũrutani kuuma mandĩkoni ma iroria bwatwĩre bũrũmagĩĩrwa nkinya rĩrĩa Johana ejire. Kuuma au gũkĩambĩĩria kũunjua nteto Ĩmbega ya Ũnene bwa Ngai, na nĩka muntũ o wonde arũagĩra gũtonya Ũneneni bũu.

¹⁷ Ĩndĩ nĩ ũũthũ ĩgũrũ na ndĩ kũthĩra nkũrũki ya gatanta o na kamwe ka Watho kũbutwa.

¹⁸ “Muntũ ũrĩa wĩngaga mũka akagũra ũngĩ nĩka akũthũngĩĩra; na ũrĩa ũgũraga muntũ mũka ũrĩa wĩngĩtwe nĩ mũrũme wae nĩka akũthũngĩĩra.

Gĩtonga na Lazaro

¹⁹ “Ĩndĩ ĩmwe nĩ kwarĩ na muntũ ũmwe gĩtonga. Gitonga kĩu gĩekagĩra nguo jia goro mũno na gĩatũũraga mũtũrĩre wa goro na ikeno ntuku jionde.

²⁰ Muntũ ũngĩ nawe wetagwa Lazaro nĩ ethagĩrwa akĩmama au mpingĩroni ya gitonga kĩu. Lazaro aarĩ nkĩa na mwĩrĩ wae wejũri ironda.

²¹ Kurũ nĩ jiejaga igacũna ironda iu jia Lazaro; na nĩ eriragĩria kũrĩa irio irĩa jiatejagwa jiagwa kuuma methani ya gĩtonga kĩu gĩkĩrĩa.

²² Na rĩ, kagiita nĩgakinyire nkĩa ĩu ĩgĩkua, ĩgĩkamatwa nĩ araika ĩkiirwa akuĩ na Aburahamu kũu ĩgũrũ. Gĩtonga o nakĩo nĩ gĩakuire gĩkĩthikwa.

²³ Na rĩrĩa gĩtonga kĩu kĩarĩ kwa antũ barĩa akuũ gĩkĩthĩnĩkaga mũno nĩkĩaraithire bwa ĩgũrũ gĩkĩona Aburahamu arĩ araja, na Lazaro ekarĩte akuĩ nawe.

²⁴ Gĩgĩĩta Aburahamu gĩkĩmwĩra atĩrĩ, ‘Mbĩguĩra kĩao; tũma Lazaro atombeke kaara kae rũjĩni eeje ambĩtũũrĩre rũrĩme, no rũgĩe mpĩo, nĩũntũ nĩndĩnĩkire mũno mwankini ũũ!’

²⁵ Ĩndĩ Aburahamu agĩcokeria gĩtonga agĩkĩĩra atĩrĩ, ‘Mwana wakwa, ta ririkana rĩrĩa warĩ mwoyo bũrĩa wagwatire kĩenyũ gĩaku kĩa into jionde irĩa mbega, na Lazaro we onaga maũntũ o marĩa mathũku. Ĩndĩ rĩu arĩ gĩkenoni, nagwe kĩnyamaarani.

²⁶ Amwe na bũu bunde rĩ, aa gatagatĩ getũ nagwe kũrĩ na mũtaro mũnene ũũ atĩ barĩa bankĩenda kuuma gũkũ beja kũu kĩrĩ gwe batĩũmba, o na gũtĩ we ũnkĩũmba gũkĩranĩria auma kũu eeja kĩrĩ twi.’

²⁷ Gĩtonga gĩkĩĩra Aburahamu atĩrĩ, ‘Ndagũkaĩra baaba, tũma Lazaro athi gwetũ mũjiĩ,

²⁸ kĩrĩ ba mũruaiya batano, abere bemenyeere batĩkeje kĩnyamaarani gĩkĩ.’

²⁹ Aburahamu agĩkĩĩra, ‘Ba mũruanyũkwe barĩ na Watho bwa Musa na ũrutani bwa iroria; Nĩbathĩkĩre mataaro mao.’

³⁰ Nakĩo gĩtonga gĩgĩcokia atĩrĩ, ‘Arĩ, baba Aburahamu. Ĩndĩ bakeja kwĩrwa nĩ muntũ ariũkĩte akauma kĩrĩ akuũ bakerira.’

³¹ Nawe Aburahamu akĩmwĩra, ‘Kũngĩtuĩka batĩthikĩria Musa na iroria rĩ, o na gũkeeja muntũ aumĩte kĩrĩ barĩa akuũ atĩbegwithia betĩkĩra kwĩrira.’”