Luka 15 - NTETO ĨMBEGA TA BŨRĨA YANDĨKIRWE NĨ LUKA

Ng'ondu ĩrĩa mbũru

¹ Ntukũ ĩmwe arutithia goti na eyia nĩ bathiire akuĩ na Jesũ nĩkenda bamũthĩkĩĩria akĩrutana.

² Afarisai na arutani ba Watho bakĩambĩĩria kũnuguna bakiugaga, “Muntũ ũũ nĩ agwataga eyia ũgeni na akarĩjanĩra nabo.”

³ Na kwogu Jesũ akĩbaa ngerekano ĩno.

⁴ “Muntũ ũmwe wa jienu ankĩthĩrwa arĩ na ng'ondu ĩgana na ĩmwe ya jio ĩũre rĩ, anga tĩka atigaga iu jiĩngĩ mĩrongo kenda na kenda nyakini ikĩrĩa, akathi gũcũa ĩu mbũru, nkinya rĩrĩa akamĩona?

⁵ Na rĩrĩa akamĩona rĩ, amĩĩkĩre ituro amĩĩnũkie akenete mũno.

⁶ Aakinya mũjiĩ ete acoore na atũri bae amwe abere atĩrĩ, ‘Njũni tũkenanĩre, nĩũntũ nkwona ng'ondu yakwa ĩrĩa ĩrarĩ mbũru.’

⁷ Ndĩbwĩra ũgu nĩbu barĩa barĩ kũu ĩgũrũ bakenaga rĩrĩa mwĩyia ũmwe erira, o na nkũrũki ya aagĩru mĩrongo kenda na kenda barĩa batĩkwoneka babatarĩte kwĩrira.

Ngerekano ya ciringi ĩmwe ĩrĩ mbũru

⁸ “Kana rĩ, muntũ mũka arĩ na ciringi ĩkũmi jia betha ĩndĩ ĩmwe ya jio ĩũre rĩ, anga tĩka akagwatia taa na aate nyomba akĩmĩcũaga wega nkinya rĩrĩa akamĩona?

⁹ Na amĩona ageta acoore na antuura bae abere atĩrĩ, ‘Ũkani tũkenanĩre, nĩũntũ nkwona ciringi yakwa ĩrĩa ĩrarĩ mbũru.’

¹⁰ Ndĩbwĩra ũgu nĩbu araika ba Ngai bakenaga rĩrĩa mwĩyia ũmwe erira meyia mae.”

Ngerekano ya mũthaka ũrĩa waũrĩte

¹¹ Jesũ agĩcoka akiuga, “Nĩ kwarĩ na muntũ ũmwe warĩ na ndaka jiĩrĩ.

¹² Mũthaka ũrĩa warĩ mũnini akĩĩra ĩthe atĩrĩ, ‘Baba, nenkera into irĩa irĩ kĩĩgai gĩakwa.’ Ĩthe akĩbagaanĩria into jiae bo baĩrĩ.

¹³ Nyuma ya ntukũ itĩ nyingĩ mũthaka ũu mũnini akĩthĩrania into jiae jionde na akĩthi ndĩ ya kũraja. Arĩ kũu akĩyangia into jiae jionde na mĩtũrĩre ya ũmaramari.

¹⁴ Rĩrĩa aitũmĩĩre jionde jiathira nĩgwacokire gũkĩgĩa na ĩũra rĩnene mũno kũu ndĩ ĩu, na akĩambĩria kũthĩnĩka.

¹⁵ Kwogu nĩ athiire akĩũria wĩra kwa muntũ ũmwe wa kũu, nawe muntũ ũu akĩmũa wĩra mũgũndani kwae, wa kũrĩthia ngũrwe.

¹⁶ Na nĩ eriragĩria kũrĩa makoro marĩa ngũrwe jiarĩjaga, ĩndĩ gũtĩ muntũ wamũrũmagia no mbi.

¹⁷ Ĩndĩ rĩrĩa mũthaka ũu ericũkirwe, akĩũria atĩrĩ, ‘Nĩ aruti wĩra begana barĩa baba andĩkĩte bakũrĩa irio na bagatigia, ĩndĩ niũ nĩka ngũkuĩra gũkũ nĩ ĩũra!

¹⁸ Nĩngũkĩra ndi kĩrĩ baba ndĩmwĩre atĩrĩ, Baba, nĩ mbĩĩtie kĩrĩ Ngai na kĩrĩ gwe.

¹⁹ Ntĩagĩrĩte gwĩtwa mwana waku kaĩrĩ; ntua ũmwe wa aruti baku ba wĩra.’

²⁰ Kwogu mũthaka ũu nĩ agwatire njĩra agĩcoka kĩrĩ ĩthe. “Na rĩ, arĩ o araja ĩthe akĩmwona ejĩte, akĩĩjũrwa nĩ kĩao nkoro, akĩmũtũngatũnga, akĩmũkumbatĩria na akĩmũmumunya.

²¹ Mũthaka ũu akĩmwĩra atĩrĩ, ‘Baba, nĩ mbĩĩtie kĩrĩ Ngai na kĩrĩ gwe. Ntĩagĩĩrĩte gũcoka gwĩtagwa mwana waku.’

²² Ĩndĩ ĩthe agĩĩta ntungata jiae akĩjiĩra atĩrĩ, ‘Thini na mpũĩ bũrete nguo ĩrĩa mbega mũno bwĩkĩre mwana ũũ wakwa, na bũmwĩkĩre mbete kĩara, na iratũ magũrũ.

²³ Bũcoke bũthĩnje ndegwa ĩrĩa noru buru, tũrĩe na tũkenanĩĩre;

²⁴ nĩũntũ mwana wakwa ararĩ mũkuũ na rĩu nĩ mũriũku; ararĩ mũũru, na rĩu nĩ mwoneku.’ Bakĩambĩria gũkenanĩĩra.

²⁵ “Kagiita kau konde mũthaka wae ũrĩa mũkũrũ aarĩ mũgũndani, akĩrĩma. Na rĩrĩa akuĩrĩrie mũjiĩ enũkĩte akĩgua rwĩmbo na antũ bakiina.

²⁶ Agĩĩta ũmwe wa ntungata akĩmĩũria kĩrĩa gĩekarĩkaga.

²⁷ Ntungata ĩu ĩkĩmũcokeria, ‘Mũruanyũkwe agũcoka, na abagu amũthĩnjĩra ndegwa ĩrĩa noru buru, nĩũntũ mwana wae akũmũcokera arĩ mũgima’

²⁸ Mũthaka ũu mũkũrũ akĩthũũra mũno, na akĩrega gũtonya nyomba. Ĩthe akĩuma akĩmũkaĩra atonye,

²⁹ ĩndĩ we agĩcokeria ĩthe atĩrĩ, ‘Tamaka! Niũ ntwĩre ngũtungataga mĩaka ĩno yonde na ntanarega kũrũtha wendi bwaku; ĩndĩ ũtanampa no kathenge ndĩjanĩra na acoore bakwa na tũkenanĩĩra!

³⁰ Ĩndĩ mwana ũũ waku eangĩtie into jiaku jionde na maraya, na agũcoka mũjiĩ ũmũthĩnjĩĩre ndegwa ĩrĩa noru buru!’

³¹ Ĩthe akĩmwĩra atĩrĩ, ‘Mwana wakwa, wĩthagĩrwa ũrĩ amwe nani ĩgiita rĩonde, na kĩrĩa kĩonde ndĩ nakĩo nĩ gĩaku.

³² Nĩ tũrabatiĩ tũrĩe na tũkenanĩĩre, nĩũntũ mũruanyũkwe ararĩ mũkuũ na rĩu nĩ mũriũku; nĩ araũrĩte ĩndĩ rĩu nĩ mwoneku.’ ”