Luka 14 - NTETO ĨMBEGA TA BŨRĨA YANDĨKIRWE NĨ LUKA

Jesũ kũragithia muntũ mũrwaru

¹ Ntukũ ĩmwe ya Sabatũ Jesũ nĩ athiire kũrĩa irio mũjiĩ kwa mũnene ũmwe Mũfarisai, na antũ barĩa baarĩ o nĩbamũtuĩragia mũno nĩkenda bona bũrĩa akarũtha.

² Na rĩ, nĩ kwarĩ na muntũ au mbere yae, warũarĩte mũrimũ wa kwimba njara na magũrũ.

³ Jesũ akĩũria arutani ba Watho na Afarisai atĩrĩ, “Watho nĩ bwĩtĩkĩrĩtie kũragĩthania ntukũ ya Sabatũ, kana bũtĩtĩkĩrĩtie?”

⁴ Ĩndĩ bo bagĩkira ki. Jesũ akĩjũkia muntũ ũu, akĩmũragithia na akĩmwĩtĩkĩria ethiĩre.

⁵ Agĩcoka akĩbaũria atĩrĩ, “Nũũ wa jienu atĩnkĩruta mwana wae kana ng'ombe yae ĩrimani rĩa rũjĩ ĩgwĩte ku ntukũ ya Sabatũ?”

⁶ Nabo bakĩremwa nĩ kũmũcokeria kĩũria kĩu.

Nteto ya kwĩnyiyia na kũgwata antũ ũgeni

⁷ Rĩrĩa Jesũ onire bũrĩa ageni barĩa betĩtwe kĩrugoni bathuuraga gwĩkara arĩa kwarĩ kwa ageni ba gĩtĩo rĩ, nĩ abaere ngerekano ĩno:

⁸ “Rĩrĩa wetwa kĩrugoni kĩa ũiki tiga gwĩkaragĩra itĩ irĩa ageni ba gĩtĩo baigĩrĩtwe, nĩũntũ no kwĩthĩrwa nĩgwĩtĩtwe mũgeni wa gĩtĩo nkũrũki yaku.

⁹ Nawe ũrĩa ũbwĩtĩte bwi baĩrĩ akeja akwĩre atĩrĩ, ‘Nenkera muntũ ũũ kanya ekare ndĩ.’ Rĩu gwe ũgaũkĩĩra ũconokete, ũthi wambĩrie gũcũa gwa gwĩkara nau nyuma buru.

¹⁰ Ĩndĩ rĩrĩa wetwa kĩrugo rĩ, ĩkaragĩra itĩ jia nyuma nĩkenda mwene ũrĩa ũgwĩtĩte akeja akwĩre, ‘Mũcoore wakwa, ũkĩra ũthi arĩa itĩ jia mbere!’ Ũntũ bũu bũgakũretera gĩtĩo methoni ma barĩa bonde bakethĩrwa barĩ kĩrugoni kĩu.

¹¹ Nĩũntũ muntũ wonde wĩneneagia akanyiua, na ũrĩa wĩnyiagia akaneneua.”

¹² Jesũ agĩcoka akĩĩra muntũ ũrĩa wamwĩtĩte kĩrugo, “Watua gwĩta antũ kĩrugo rĩ, tigaga gwĩta acoore baku kana ba mũruanyũkwe kana antũ benu, o na kana antuura barĩa itonga, nĩũntũ o nabo nĩka bagagwĩtĩra kĩrugo kĩao, bakĩrĩyia bũrĩa wabetĩre kĩrugo gĩaku.

¹³ Ĩndĩ rĩrĩa watua gwĩta antũ ĩtaga nkĩa na jionje na ithua, na atumuumu,

¹⁴ na ũkatharimwa, nĩũntũ batĩũmba gũkũrĩa. Gwe ũkarĩwa nĩ Ngai ĩndĩ ya kũriũka kwa barĩa aagĩru.”

Ngerekano ya kĩrugo kĩrĩa kĩnene

¹⁵ Rĩrĩa muntũ ũmwe wa barĩa barĩjanagĩra na Jesũ egwire ũgu akĩĩra Jesũ atĩrĩ, “Gũkena nĩ muntũ ũrĩa ũkarĩa irio Ũneneni bwa Ngai!”

¹⁶ Ĩndĩ Jesũ akĩmwĩra, “Kagiita kamwe kwĩ muntũ wathondekete kĩrugo kĩnene, na agĩĩta antũ baingĩ mũno kĩrugoni kĩu.

¹⁷ Rĩrĩa thaa jia kũrĩa jiakinyire muntũ ũu nĩ atũmire ntungata yae ĩthi ĩkere barĩa betĩtwe kĩrugoni atĩrĩ, ‘Njũni rĩu, maũntũ monde nĩ mabangĩku!’

¹⁸ Ĩndĩ bonde bakĩambĩria o muntũ kũejana jiĩgwatio jia kũgiria bathi kĩrugoni. Muntũ wa mbere akiuga, ‘Nĩngũrĩte kĩthaka na no nkinya mbambe ndi ngakione. Mwĩre ambĩguĩre.’

¹⁹ Ũngĩ nawe akiuga, ‘Nĩngũrĩte ng'ombe ĩkũmi jia mũraũ, na ndiĩte kwona kana ikaũmba kũruta wĩra wega. Mwĩre ambĩguĩre.’

²⁰ O na ũngĩ akiuga atĩrĩ, ‘No ĩndĩ ndagũranire, kwogu ntĩũmba kwĩja.’

²¹ Ntungata ĩgĩcoka kĩrĩ mwathi wayo ĩkĩmwĩra maũntũ mau monde. Nawe mwathi ũu akwĩgua ũgu akĩthũũra mũno. Akĩĩra ntungata atĩrĩ, ‘Uma na mpũĩ ũthi njĩrani na tũjĩrani twa ntũũra ũrete nkĩa, na jionje, na itumuumu na ithua.’

²² Nyuma ya kagiita kanini ntungata ĩkĩĩra mwathi wayo atĩrĩ, ‘Nkũrũtha bũrĩa ũmbĩrire ndũthe, ĩndĩ kanya no gatigaru ka antũ bangĩ.’

²³ Nawe mwathi wayo akĩmwĩra, ‘Umagara ũthi nau njĩrani irĩa nene na tũcocoroni ũkaĩrĩrie antũ beeje gwakwa, nĩkenda nyomba ĩjũre.’

²⁴ Na ndĩbwĩra na ma gũtĩ o na ũmwe wa barĩa ndaretĩte mbere agacama kĩrugo gĩakwa.”

Ĩrĩi rĩa gũtuĩka mũrutwa wa Jesũ

²⁵ Ĩndĩ ĩmwe antũ baingĩ mũno nĩbagendanĩtie na Jesũ. Nawe akĩgarũka akĩbeera atĩrĩ,

²⁶ “Muntũ ũrĩa ũnkienda kũndingata no mwanka ambende nkũrũki ya bũrĩa endete ĩthe na gina, mũka na jiana, ba mũruagina na ba mwarwagina, o na ningĩ ambende nkũrũki ya bũrĩa eendete we mwene.

²⁷ Muntũ o wonde ũtĩgakamata mũtharaba wae na andingata atĩũmba gũtuĩka mũrutwa wakwa.

²⁸ Nĩ muntũ ũrĩkũ wa jienu rĩrĩa akwenda gwaka mũnara wa nyomba atĩambaga gwĩkara ndĩ atara ĩrĩi rĩayo, oona kana arĩ na mbeca jia kwĩgana kwĩjũria nyomba ĩu?

²⁹ Akarega kũrũtha ũgu, akambĩĩria kũmĩaka, ekĩre mũsingi, ĩndĩ aremwe kũmĩjũria. Antũ bonde barĩa bakamionaga bakamũthekagĩĩra

³⁰ bakiugaga, ‘Muntũ ũũ ambĩrĩrie mwako ĩndĩ akĩremwa kũũrĩkia.’

³¹ Kana nĩ mũnene ũrĩkũ ũthijaga kũrũa mbaara na mũnene ũrĩa ũngĩ atĩambĩte gwĩkara ndĩ eũrie kethĩrwa athigari bae ngiri ĩkũmi bakaũmba gũcinda athigari ngiri mĩrongo ĩĩrĩ ba mũnene ũu athiĩte kũrũa nawe?

³² Akeja kwona atĩũmba gũcinda mũnene ũu ũngĩ atũmanaga kĩrĩ we atanakuĩria akamũũria begujane na ũkiri.

³³ Kwogu, ũmwe wa jienu ũrĩa ũtĩgatiga into jionde irĩa arĩ najio atĩtuĩka mũrutwa wakwa.”

Cumbĩ ĩtĩ na mũcamo

³⁴ “Cumbĩ nĩ mbega, ĩndĩ ĩkeja kũthira mũcamo rĩ, nĩ atĩa ĩnkĩũmba gwĩkĩrwa mũcamo kaĩrĩ?

³⁵ Cumbĩ ĩu ĩtĩ na baita mũthetuni o na kana thumuni. Nĩka ĩtejagwa. Ũrĩa ũrĩ na matũ nĩ egue!”