Luka 13 - NTETO ĨMBEGA TA BŨRĨA YANDĨKIRWE NĨ LUKA

Ĩrireni kana bũkue

¹ Kagiitani o kau nĩ kwarĩ antũ bamwe au, na bakĩĩra Jesũ bũrĩa antũ ba Galili baũragirwe nĩ Pilatũ bakĩthĩnja nyamũ jia kũrutĩra Ngai magongwana.

² Jesũ akĩbacokeria akĩbeera, “Bũrĩciria antũ bau baũragirwe nĩũntũ baarĩ eyia nkũrũki ya antũ barĩa bangĩ bonde ba Galili?

³ Arĩ, tĩ bu! Ĩndĩ ka ndĩbwĩreni; bwarega kwĩrira o nabwi bũgakua o ta bo.

⁴ Ĩ nabo antũ barĩa ĩkũmi na banana baakwire rĩrĩa bagwĩrĩrwe nĩ mũnara wa Siloamu; bũrĩciria ũgu nĩ kwonania baarĩ eyia nkũrũki ya antũ bonde barĩa batũũraga Jerusalemu?

⁵ Arĩ, tĩ bu! Ĩndĩ ka ndĩbwĩreni, bwarega kwĩrira o nabwi bwinde bũgakua o ta bo.”

Ngerekano ya mũfigi ũrĩa ũtaarĩ na majiaro

⁶ Jesũ akĩbaa ngerekano ino: “Muntũ ũmwe nĩ aandire mũfigi mũgũndani wae wa mĩfĩgi. Akĩthi gũcũa matunda mũfigini ũu ĩndĩ akĩthĩra ũtĩjiere no mbi.

⁷ Akĩĩra mũrĩmi mũgũnda atĩrĩ, ‘Mbĩjĩte aa mĩaka ĩthatũ rĩu ngĩcũaga matunda mũtĩni ũũ, na gũtĩ mo mbonaga. Ũrenge ũtige kũrĩa mũgũnda burĩ.’

⁸ Mũrĩmi wa mũgũnda akĩmwĩra atĩrĩ, ‘Mwathani wakwa, tigana nau mwaka ũũ o nau; mbambe ndĩũrĩmĩre na ndĩwĩkĩre thumu.

⁹ Ũkeja kũjiara matunda mwaka tũthiĩte rĩ, wĩkare o; ĩndĩ ũkarega kũjiara, ũũrenge.’”

Jesũ kũragithia mũka kionje ntukũ ya Sabatũ

¹⁰ Ntukũ ĩmwe ya Sabatũ Jesũ nĩ arutanaga sinagoguni.

¹¹ Kũu sinagoguni nĩ kwarĩ na muntũ mũka atũũrĩte athĩnĩtue nĩ nkoma ya wonje mĩaka ĩkũmi na ĩnaana. Atũũraga akuamĩrĩtie na atĩnkĩũmba kũrũngama cikĩ.

¹² Na rĩrĩa Jesũ amwonire nĩ amwĩtire akĩmwĩra atĩrĩ, “Mũka, ũkũragithua wonje bwaku.”

¹³ Jesũ akĩmwigĩĩra njara, na o rimwe mũgongo wa muntũ mũka ũu ũkĩrũngara. Nawe agĩkumia Ngai.

¹⁴ Ĩndĩ mũrũngamĩĩri wa sĩnagogu akĩthũũra mũno nĩũntũ bwa Jesũ kũragithania ntukũ ya Sabatũ. Kwogu akĩĩra antũ atĩrĩ, “Kũrĩ na ntukũ ithandatũ irĩa tũbaterie kũruta wĩra; ũkagani bũkaragithua ntukũ iu, ĩndĩ tĩ ntukũ ya Sabatũ.”

¹⁵ Mwathani akĩmũcokeria, “Mpinga ino! Kũrĩ ũmwe wa jienu atĩthaũraga ng'ombe kana ntigiri yae akamiira kũnyua rũjĩ ntukũ ya Sabatũ?

¹⁶ Ĩndĩ mũka ũũ wa rũjiaro rwa Aburahamu athirĩtie mĩaka ĩkũmi na ĩnaana arĩ mwoe na wonje nĩ Nkoma; Anga tĩ wega athaũrĩtwe kuuma kĩrĩ ũkombo ũũ ntukũ ya Sabatũ?”

¹⁷ Rĩrĩa Jesũ augire ũgu anthũ bae bonde bagĩconoka, nabo antũ bonde bagĩkenua nĩ maũntũ ma kũrigaria marĩa Jesũ arũthaga.

Ngerekano ya mpĩndĩ ya Muthandũkũ

¹⁸ Jesũ akiuga, “Ũnene bwa Ngai bũkari atĩa? Nĩmbi ndĩnkĩũmba kũbũringithania nayo?

¹⁹ Ndĩbũringithania na gapĩndĩ ka mũthandũkũ karĩa muntũ ajũkirie agĩkaanda mũgũndani wae; gakĩmera, gagĩkũra gagĩtuĩka mũtĩ, na inyoni igĩaka jiuru mpũani jiau.”

Ngerekano ya ndawa ya kwimbia mĩgate

²⁰ Agĩcoka akiuga o kaĩrĩ, “Nĩmbi ndĩnkĩũmba kũringithania Ũnene bwa Ngai nayo?

²¹ Ũnene bwa Ngai bũkari ta ndawa ya kwimbia mĩgate, ĩrĩa muntũ mũka ajũkiirie akĩmĩkandania na mũtu wa ngano wa kilo ta mĩrongo ĩna, na mũtu unde ũkimba.”

Mwari ũrĩa mũceke

²² Jesũ nĩ athiire mbere na rũgendo erekeere Jerusalemu, agĩkũrũkagĩĩra taũnini na ntũũrani akĩrutanaga antũ kiugo kĩa Ngai.

²³ Muntũ ũmwe nĩ amũririe, “Mwathani, anga no antũ banini bakaonoka?” Nawe Jesũ agĩcokia akĩĩra antũ bonde atĩrĩ,

²⁴ “Ĩrutanĩrieni gũtonya Ũneneni bwa Ngai gũkũrũkĩĩra mwari ũrĩa mũceke; nĩũntũ antũ baingĩ bakageria gũtonya na batĩũmba.

²⁵ Kagiita nĩ gagũkinya mwene nyomba aũkĩre ainge mũrango; nabwi bũrĩ kaja bwambĩĩrie kũringaringa bũkiugaga, ‘Mwathani tũrugũrĩre.’ Nawe akabũcokeria abwĩre, ‘Niũ ntijĩ kũrĩa bumĩte.’

²⁶ Rĩu nabwi bũkambĩĩria kũmwĩra, ‘Anga tũtarĩjanagĩra na tũkanyunyanĩra naagwe; na ũkarutana antũ ntũũrani jietũ?’

²⁷ Ĩndĩ akabwĩra kaĩrĩ, ‘Ndĩbwĩra ntijĩ kũrĩa bumĩte; mpumani aa bwiũ antũ barĩa baganu!’

²⁸ Ĩndĩ ĩu bũkarĩra na bũkabange magego rĩrĩa bũkona Aburahamu na Isaka na Jakubu, na iroria jionde barĩ Ũneneni bwa Ngai, nabwi bũrĩ agere nau nja.

²⁹ Antũ bakeja baumĩte mwena wa ũrio na wa ũmotho, wa rũgũrũ na wa gaĩti, bekare ndĩ barĩe kĩrugo kĩa Ũneneni bwa Ngai.

³⁰ Na atĩrĩ, antũ bamwe barĩa barĩ mũthia bakethĩrwa barĩ mbere, na barĩa barĩ mbere bakethĩrwa barĩ mũthia.”

Bũrĩa Jesũ endete Jerusalemu

³¹ Kagiita o kau Afarisai bamwe nĩbejire bakĩĩra Jesũ, “Uma aa ũthi gũntũ kũngĩ, nĩũntũ Herode nĩ akwenda gũkũũraga.”

³² Jesũ nĩ akĩbacokeria akĩbeera, “Thini bwĩre mbwe ĩu atĩrĩ, ‘ũmundĩ na rũ nkethĩrwa nkĩruta nkoma kuuma kĩrĩ arũaru na nkĩbaragithagia, na ntukũ ya ithatũ ndĩkie wĩra wakwa.’

³³ O na kũnarĩ ũgu, no mwanka ndi mbere na rũgendo rwakwa ũmundĩ na rũ o na ntukũ ĩu ĩrũmĩrĩte, nĩũntũ gũtĩũmbĩka kĩroria kĩũragĩrwa kũngĩ o tiga Jerusalemu.

³⁴ “Jerusalemu, Jerusalemu! Gwe ũragaga iroria na ũkaria na maiga barĩa Ngai agũtũmĩrĩte! Nĩ maita megana ndanenda gũcokanĩĩria antũ baku ta bũrĩa ngũkũ ĩcokanagĩĩria tũcui twayo rungu rwa mathagu mayo, nagwe utĩmbĩtĩkĩĩrie!

³⁵ Atĩrĩ, gĩtũũro gĩaku nĩgĩtiganĩrie. Ndĩkwĩra na ma ũtĩkarombona nkinya rĩrĩa kagiita gagakinya uuge, ‘Kũtharimwa nĩ ũrĩa wĩjĩte na riĩtwa rĩa Mwathani.’ ”