Luka 11 - NTETO ĨMBEGA TA BŨRĨA YANDĨKIRWE NĨ LUKA

Jesũ kũrutana arutwa bae kũromba

¹ Ntukũ ĩmwe Jesũ nĩ arombaga arĩ antũ ana. Akũthiria kũromba ũmwe wa arutwa bae akĩmwĩra, “Mwathani, tũrutane kũromba ta bũrĩa Johana arutanire arutwa bae.”

² Nawe Jesũ akĩbeera atĩrĩ, “Rĩrĩa bũkũromba, ugagani ũũ. “Baba, riĩtwa rĩaku rĩtheru rĩrokumwa. Ũnene bwaku bwĩje.

³ Tũejage o ntukũ irio jia gũtwĩgana;

⁴ na ũtũrekagĩre meyia metũ, nĩũntũ o natwi nĩ tũrekagĩra barĩa batwĩtagĩria; ũtĩkareke tũgwa magerioni.”

⁵ Agĩcoka akĩbeera, “Nũũ wa jienu ankĩthi kĩrĩ mũcoore wae ũtukũ gatagatĩ amwĩra, ‘Mũcoore, mpa mĩgate ĩthatũ,

⁶ nĩũntũ kũrĩ mũcoore wararĩĩra gwakwa, arĩ rũgendoni, na ntĩ na gĩntũ ndĩnkĩmũrũmia gĩa kũrĩa.’

⁷ Nawe mũcoore ũu arĩ kũu nyomba ndanĩ amũcokerie, ‘Tiga gũntanga; Nĩmpingire mũrango na niũ na aana bakwa nitũmamire. Ntĩũmba gũũkĩra nkũnenkeria no mbi’.

⁸ Ndĩbwĩra atĩrĩ, o na akarega gũũkĩra amũnenkera kĩrĩa akwenda nĩũntũ bwa ũcoore bwao, agaũkĩra amũnenkere kĩrĩa kĩonde akwenda nĩũntũ bwa bũrĩa nawe agekara akĩmũringaringagĩra.

⁹ Naani ndĩbwĩra atĩrĩ, Rombani na bũkaewa; cũani, na bũkona; ringaringani mũrango, na bũkarugũrĩrwa.

¹⁰ Tontũ muntũ wonde ũrĩa ũrombaga nĩ aejagwa, na ũrĩa ũcũaga nĩ onaga, na ũrĩa ũringaringaga mũrango nĩ arugũragĩrwa.

¹¹ Nĩ mũjiari ũrĩkũ gatagatĩ kenu ũngĩĩtua samaki ya kũrĩa nĩ mwana wae amũnenkera njoka;

¹² kana eetue ĩtumbĩ amũnenkera kang'ariũ?

¹³ Kethĩrwa bwiũ, bũnarĩ athũku ũgu nĩbwijĩ kũa jiana jienu into irĩa mbega rĩ, nĩ bwĩgana Baba wetũ ũrĩa ũrĩ ĩgũrũ akabũa Roho Mũtheru bwamũromba we!”

Jesũ na Beelizebuli

¹⁴ Rĩu Jesũ nĩ engaga nkoma kuuma kĩrĩ muntũ ũtaragia. Nkoma ĩu ĩkuuma muntũ ũu akĩambĩria kwaria, na antũ bakĩrigara mũno.

¹⁵ Ĩndĩ antũ bamwe bakĩambĩria kwaria bakiugaga, “Aetwe inya ya kwĩnga nkoma nĩ mũnene wa nkoma ũrĩa wĩtagwa Beelizebuli.”

¹⁶ Bangĩ bakĩenda kũgeria Jesũ; kwogu bakĩmwĩra aringe kiama gĩa kwonania arĩtũmĩra inya kuuma ĩgũrũ kĩrĩ Ngai.

¹⁷ Ĩndĩ nĩũntũ Jesũ nĩ amenyire bũrĩa beciragia akĩbeera, “Ũnene unde ũragaũkana nĩka ũthiraga, na mũjiĩ ũragaũkana nĩka waraganaga.

¹⁸ Kwogu, kethĩrwa ũnene bwa Saitanĩ bwĩgaanĩtie rĩ, bũkaũmba kwĩrũngamia atĩa? Biũ bũriuga mbĩngaga nkoma ngĩtũmagĩra inya kuuma kĩrĩ Beelizebuli.

¹⁹ Kethĩrwa mbĩngaga nkoma ngĩtũmagĩra inya kuuma kĩrĩ Beelizebuli rĩ, athingati benu nabo bengaga nkoma bagĩtũmagĩra inya kuuma kĩrĩ ũ? Kwogu bau nĩbo bakabũtuĩra.

²⁰ Ĩndĩ kethĩrwa mbĩngaga nkoma ngĩtũmagĩra inya kuuma kĩrĩ Ngai rĩ, Ũnene wa Ngai ũgũkinya kĩrĩ bwi.

²¹ Rĩrĩa muntũ nchamba ekundĩkaga into jia ndũa akarangĩra mũjiĩ wae rĩ, ũtonga bwae bwĩthagĩrwa bũrĩ bũmenyeere.

²² Ĩndĩ muntũ ũngĩ ũrĩ na inya kĩrĩ we akamwithũkĩra na amũkĩrie inya, amũtunyaga into jiae jia ndũa, agataa into jiae na akaigaĩra antũ bae.

²³ Muntũ ũrĩa ũtĩ amwe naani nĩ mũnthũ wakwa, na muntũ ũrĩa utĩngwatagia gũcokanĩĩria ndĩthia nĩka amĩnyagaragia.”

Gũcoka gwa nkoma

²⁴ “Rĩrĩa nkoma yauma kĩrĩ muntũ, ĩgendagĩĩra gũntũ kũrĩa kũmũ, ĩgĩcũa antũ a kũnogoka. Yaga antũ a kũnogoka ĩkeĩra atĩrĩ, ‘Nĩngũcoka nyomba yakwa ĩrĩa ndaumire.’

²⁵ Yacoka ĩkethĩra nyomba ĩatĩtwe na ĩkabangwa wega.

²⁶ Nkoma ĩgacoka ĩkathi ĩgacũa nkoma jiĩngĩ mũgwanja ndũku nkũrũki ya yo, ikeja igatonya ndani ya muntũ ũu igekara ku. Mwĩkarĩre wa muntũ ũu ũkathũka nkũrũki ya mbere.”

Kĩtharimo kĩa ma

²⁷ Jesũ akĩaragia o ũgu muntũ mũka ũmwe arĩ kũu antũũni akiugĩĩria akĩmwĩra, “Kũtharimwa nĩ mũka ũrĩa wakũjiarire na akũrera!”

²⁸ Ĩndĩ Jesũ akĩmũcokeria, “Kũtharimwa nkũrũki nĩ barĩa begujaga kiugo kĩa Ngai nabagakiathĩkĩra.”

Antũ kwĩra Jesũ abaringĩre kĩama

²⁹ Rĩrĩa antũ baingĩ bathiire mbere kwĩthĩrana akuĩ na Jesũ nĩ aberire atĩrĩ, “Rujiaro rũrũ nĩ rũjiaro rwaganu. Rũrĩenda kwonua kĩama, ĩndĩ gũtĩ kĩama bũkona o tiga kĩrĩa Jona onanirie.

³⁰ Nĩũntũ o ta bũrĩa Jona atuĩkire kĩama kĩrĩ antũ ba Nineve, ũgu no bu Mwana wa Muntũ agatuĩka kĩama kĩrĩ antũ ba rũjiaro rũrũ.

³¹ Ntukũ ya ĩtwĩro, mũnene muntũ mũka wa Sheba akarũngama agambithie antũ ba rũjiaro rũrũ; nĩũntũ nĩ aumire kũraja mũno akĩĩja kwĩgua ũrutani wa ũũgĩ wa Solomoni. Atĩrĩ, aa kũrĩ nawe mũnene nkũrũki ya Solomoni.

³² Ntukũ ya ĩtuĩro antũ ba Nineve bakarũngama bagambithie antũ ba rũjiaro rũrũ, nĩũntũ bo nĩberirire rĩrĩa Jona abaunjĩrie. Atĩrĩ, aa kũrĩ nawe mũnene nkũrũki ya Jona.”

Werũ bwa mwĩrĩ

³³ “Gũtĩ muntũ ũgwatagia taa amiga rungu gũntũ kwĩithanĩtie, kana amĩkunĩkĩra na ndoo. Amigaga antũ ĩgũrũ nĩkenda ĩmũrĩkagĩre barĩa bagũtonya nyomba.

³⁴ Metho maku nĩmo taa ya mwĩrĩ waku. Ĩndĩ ĩrĩa metho makwona wega mwĩrĩ waku unde wĩthagĩrwa wĩjũrĩte werũ. Ĩndĩ rĩrĩa matĩkwona wega, mwĩrĩ waku wĩthagĩrwa wĩjũrĩte ntuma.

³⁵ Kwogu menyerani werũ bũrĩa bũrĩ ndani yenu bũtĩgatuĩke ntuma.

³⁶ Kethĩrwa mwĩrĩ waku unde nĩwĩjũrĩte werũ, na gũtĩ antũ ũrĩ na ntuma rĩ, ũkethĩrwa ũkĩmũrĩkaga wega ta bũrĩa taa ĩkũmũrĩkĩrĩte.”

Jesũ Kũnegenia Afarisai na Arutani ba Watho

³⁷ Jesũ akũthiria kwaria, Mũfarisai ũmwe nĩ amũririe athi kwae bakarie irio. Jesũ akĩthi, agĩkara ndĩ kũrĩa.

³⁸ Mũfarisai ũu akĩrigara mũno akwona atĩ Jesũ atathambire njara mbere ya kũrĩa irio.

³⁹ Mwathani akĩmwĩra atĩrĩ, “Bwiũ Afarisai bũthambagia ikombe na thani mwena wa nja, ĩndĩ ndani bwĩjũrĩte ũtunyani na waganu.

⁴⁰ Jiaa ino! Anga ũrĩa waũmbire mwena wa nja to we waũmbire wa ndani?

⁴¹ Atĩrĩ, ejagani nkĩa kĩrĩa kĩrĩ thanini na ikombeni jienu, na into jionde igatuĩka irĩa nderu kĩrĩ bwi.

⁴² Ũinanũ kĩrĩ bwi Afarisai. Bũrutagĩra Ngai gĩcuncĩ gĩa ĩkũmi kĩa mbicarĩ, ndania na manyoni ma mĩthemba yonde, ĩndĩ bũkaaga gĩoto na wendo wa Ngai. Nĩ bũbatiĩ kũrũtha maũntũ mama, bũtĩgũtiganĩria mau mangĩ.

⁴³ Ũinanũ bwiũ Afarisai! Bwendete gwĩkarĩra itĩ jia mbere sinagoguni na gũkethagua na gĩtĩo thokoni.

⁴⁴ Ũinanũ bwi! Tontũ bũkari ta mbĩrĩra irĩa itĩ rwano, irĩa antũ bakinyangaga batĩkũmenya.”

⁴⁵ Ũmwe wa arutani ba Watho akĩmwĩra, “Mũrutani, rĩrĩa wauga ũgu nĩka ũgũtũcenga o natwi.”

⁴⁶ Jesũ akĩmũcokeria, “Ũinanũ kĩrĩ o nabwi arutani ba Watho! Nĩ tontũ bũkamatithagia antũ mĩrigo ĩtĩgũkamatĩka na bũtĩtambũrũkia o na kĩara kĩmwe bũbatethia kũmĩkamata.

⁴⁷ Ũinanũ kĩrĩ bwi! Tontũ bũgemagia mbĩrĩra jia iroria, o iroria irĩa bethe benu baũragire.

⁴⁸ Kwogu bũrĩ aira, na nĩbũkũgwata mbaru jiĩko jia bethe benu; nĩũntũ nĩbaũragire iroria, nabwi bũkagemia mbĩrĩra jiao.

⁴⁹ Nĩũntũ nau Ũũgĩ wa Ngai nĩ waugire atĩrĩ, ‘Nkabatũmĩra iroria na atũmwa; bakaũraga bamwe bao na banyarire barĩa bangĩ.’

⁵⁰ Kwogu rũjiaro rũrũ no rũkaerithĩrua iroria irĩa jionde jianaũragwa kuuma ndĩ ĩkũmbwa,

⁵¹ kuuma kũũragwa kwa Abili nkinya kũũragwa kwa Zakaria, ũrĩa waũragĩĩrwe gatagatĩ ka antũ arĩa kĩgongoana kĩrutagĩrwa na antũ arĩa atheru a Ngai. Ndabwĩra na ma rũjiaro rũrũ rũkaerithĩrua maũntũ mau monde.

⁵² Ũinanũ kĩrĩ bwi arutani ba Watho! Nĩ tontũ nĩbwithĩte rũbungũro rwa kũrugũra mũrango wa nyomba ya ũmenyo. Bwiũ bwingwa gũtonya, na nĩbũrigĩrĩtie barĩa bakwenda gũtonya ku.”

⁵³ Na rĩrĩa Jesũ aumĩte antũ au, arutani ba Watho na Afarisai bakĩambĩĩria kũmũthũkĩra mũno, bakĩmũũragia jiũria ĩgũrũ rĩa maũntũ maingĩ mũno.

⁵⁴ Bageragia kũmũtega begua kana no auge na kanyua kae ũntũ bũrĩa bankĩmũthitangĩra.