Luka 10 - NTETO ĨMBEGA TA BŨRĨA YANDĨKIRWE NĨ LUKA

Jesũ gũtũma antũ mĩrongo mũgwanja.

¹ Kuuma au Mwathani akĩthuura bangĩ mĩrongo mũgwanja. Akĩbatũma baĩrĩ baĩrĩ, bathi be mbere yae ntũũrani jionde na gũntũ kunde kũrĩa aarĩ mũthiĩrĩĩri.

² Akĩbeera atĩrĩ, “Maketha nĩ maingĩ, ĩndĩ akethi nĩ banini. Kwogu, rombani Mwathani mwene maketha nĩkenda atũme akethi mũgũndani wae.

³ Rĩu thiini! Ndabũtũma bũrĩ ta ng'ondu gatagatĩ ka itang'a.

⁴ Bũtĩgakamate kĩbeti kana kiondo, o na kana iratũ. Na bũtĩgakethie muntũ o na ũrĩkũ njĩrani.

⁵ Nyomba ĩrĩa bwathũngĩra ambagani bũkauga, ‘Ũkiri nĩ bũgĩe nyomba ĩno!’

⁶ Na kwethĩrwa kũrĩ na muntũ ku endete ũkiri, ũkiri bũu bũgekaraga nawe, ĩndĩ kwethĩrwa gũtĩ we, ũkiri bũu bũkabũcokera.

⁷ Bwĩkarage mũjiĩ ũu, bũkĩrĩjaga na bũkĩnyunyaga kĩrĩa bakabũnenkagĩra. Nĩũntũ rĩ, mũruti wa wĩra nĩ abatiĩ mũcara wae. Bũtĩgacangacange bũkiumaga mũjiĩ bũkathi ũrĩa ũngĩ.

⁸ Rĩrĩa bwatonya ntũũrani na bwagwatwa ũgeni rĩ, rĩjagani kĩrĩa bũkarũmua;

⁹ na bũragithagie antũ barĩa arũaru ku, na bũkabera, ‘Ũnene bwa Ngai nĩbwĩju akuĩ nabwi.’

¹⁰ Ĩndĩ rĩrĩa rĩonde bũgatonyaga ntũũra bũkarega kũgwatwa ũgeni ku, umagarani nau njĩrani jia ntũũra ĩu, bũkiugaga,

¹¹ ‘O na tĩĩri ya ntũũra yenu ĩrĩa ĩragwete magũrũ metũ tũkũbũringaringĩra yo, nĩkenda ĩtwĩke ũira atĩ bũtatũkenia. Ĩndĩ amwe na bũu, menyani atĩ Ũnene bwa Ngai nĩbũku akuĩ nabwi.’

¹² Ndabwĩra na ma atĩ, Ngai akeguĩra Sodomu kĩao ntukũ ya ĩtwĩro nkũrũki ya bũrĩa akeguĩra ntũũra ĩu.”

Ntũũra irĩa itetĩkirie

¹³ “Ũinanũ kĩrĩ gwe Korazini! Ũinanũ kĩrĩ gwe Bethisaida! Nĩũntũ rĩ, kethĩrwa biama birĩa biringĩtwe ntũũrani jienu nĩ tabio biaringirwe Tiro na Sidoni, antũ ba kũu nĩ bangĩekĩĩre makunia na gwĩaka mũu, kwonania nĩberirĩte meyia mao.

¹⁴ Ĩndĩ Ngai akeguĩra Tire na Sidoni kĩao nkũrũki yenu ntukũ ya ĩtwĩro yakinya.

¹⁵ Gwe nagwe Kaperinaumu rĩ, urĩciria nĩka ũgakumua nkinya ũkinyĩre ĩgũrũ? Ũrĩtindirũkua wĩmanue ndĩ buru nkinya akuĩ kwa barĩa bakuũ.

¹⁶ “Muntũ ũrĩa ũkabũthikĩĩria nĩni aathikĩria, na ũrĩa ũkabũrega nĩni arega. Na ũrĩa ũkandega nĩ ũrĩa wantũmire akũrega.”

Barĩa mĩrongo mũgwanja gũcoka

¹⁷ Barĩa mĩrongo mũgwanja nĩbaacokire barĩ na gĩkeno kĩnene, bakĩĩra Jesũ atĩrĩ, “Mwathani, o na nkinya nkoma nĩigũtwathĩkĩra twajiatha tũgĩtũmagĩra riĩtwa rĩaku!”

¹⁸ Ĩndĩ we akĩbeera, “Ndonire Saitani akĩgwa ta rweni kuuma ĩgũrũ.

¹⁹ Atĩrĩ, nĩndĩbũete inya ya kũmba gũkinyanga njoka na tũng'ariũ na ĩgũrũ rĩa mainya monde ma anthũ, na gũtĩ gĩntũ gĩkabũthũkia.

²⁰ Ĩndĩ rĩ, bũtĩgakene nĩũntũ nkoma nĩ ikũbwathĩkĩra; kenani nĩũntũ mariĩtwa menu nĩmandĩke kũũrĩa ĩgũrũ.”

Jesũ gũcokeria Ngai nkatho

²¹ Kagiita o kau Jesũ nĩ ejũriirue gĩkeno nĩ Roho Mũtheru, na akiuga, “Nĩngũgũkumia gwe Baba, Mwathani wa ĩgũrũ na ndĩ, nĩũntũ nĩ withĩte antũ barĩa aũgĩ na athomu maũntũ mama, na wamaguũrĩria barĩa batĩ athomu; nĩ nkatho Baba, nĩũntũ ũu nĩu ũrarĩ wendi waku.

²² “Ndĩmũnenkere into jionde nĩ Baba. Gũtĩ we wijĩ Mwana nũũ o tiga Ĩthe, na gũtĩ we wijĩ Ĩthe o tiga Mwana na antũ barĩa Mwana ankĩenda bamũmenya.”

²³ Jesũ nĩ agarũkĩĩre arutwa bae barĩ bonka, akĩbeera, “Gũkena nĩ muntũ ũrĩa ũkwona maũntũ mama bwiũ bũkũona!

²⁴ Ndĩbwĩra atĩrĩ, iroria na anene baingĩ nĩberiragĩria kwona maũntũ mama bũkwona, na batamona, na nĩberiragĩria kwĩgua maũntũ marĩa bũkwĩgua na batamegua.”

Ngerekano ya Mũsamaria ũrĩa Mwega.

²⁵ Mũrutani ũmwe wa Watho nĩ aarũngamire akĩenda kũgeria Jesũ, akĩmũria, “Mũrutani, mbatiĩ kũrũtha atĩa nĩkenda nkona mwoyo wa tene na tene?”

²⁶ Jesũ akĩmũcokeria, “Watho bugite atĩa? Gwe ũtaũkagirwa atĩa nibu?”

²⁷ Nawe agĩcokia, “Enda Mwathani Ngai waku na nkoro yaku yonde, na mwoyo waku unde, na inya yaku yonde, na meciria maku monde; na wende mũtũũri waku ta bũrĩa wĩendete gwe mwene.”

²⁸ Jesũ akĩmwĩra atĩrĩ, “Ũgũcokia wega. Rũthaga ũgu na ũgatũũra.”

²⁹ Ĩndĩ nĩũntũ muntũ ũu nĩ endaga gwĩtua mwega, akĩũria Jesũ, “Mũtũũri wakwa nĩ ũrĩkũ?”

³⁰ Jesũ akĩmũcokeria akĩmwĩra, “Muntũ ũmwe nĩemanĩte Jeriko, aumĩte Jerusalemu. Agĩtirimana na aamba. Aamba bau bakĩmũtunya gĩntũ kionde kĩrĩa aarĩ nakĩo, bakĩmũrumia, bakĩmũtiga arĩ akuĩ gũkua.

³¹ Kagiita o kau mũthĩnjĩri Ngai nĩemanĩte na njĩra ĩu. Rĩrĩa onire muntũ ũu amamĩte au, agĩkũrũkĩĩra reteere rũu rũngĩ rwa njĩra.

³² Mũlawi nawe agĩkũrũkĩĩra au muntũ ũu aamamĩte, na akũmwona, agĩkũrũkĩĩra rũteere rũu rũngĩ.

³³ Ĩndĩ Mũsamaria ũmwe nĩ aarĩ rũgendoni. Agĩkũrũkĩĩra au muntũ ũu aarĩ, na rĩrĩa amwonire, akĩmwĩguĩra kĩao.

³⁴ Akĩthi kĩrĩ we akĩmũthambia ironda na ndibei, akĩjiĩtũrĩra maguta na akĩjioa. Agĩcoka akĩmũtũithia ĩgũrũ rĩa ntigiri yae akĩthi nawe, bakĩrara mũkawani akĩmũmenyagĩĩra.

³⁵ Gwakĩa rũkĩrĩ Mũsamaria ũu akĩnenkera mwene mũkawa dinari jiĩrĩ akĩmwĩra, ‘Menyagĩĩra muntũ ũũ, na akeja gũtũmĩra mbeca nyingĩ kĩrĩ ino ngakũrĩa ngĩcoka.’”

³⁶ Jesũ akũrĩkia kwaria akĩũria mũrutani ũu wa Watho atĩrĩ, “Gweũ ũnkiuga nĩ ũrĩkũ gatagatĩ ka antũ baba bathatũ onanirie aarĩ mũtũũri wa muntũ ũu warĩ mũrie nĩ aamba?”

³⁷ Nawe akĩmũcokeria, “Nĩ ũrĩa amwĩguĩrĩre kĩao.” Jesũ akĩmwĩra, “Nagwe ndi ũrũthage ta ũgu.”

Jesũ kũriũngira Maritha na Maria

³⁸ Rĩrĩa Jesũ na arutwa bae bathiĩte mbere na rũgendo, Jesũ nĩ atonyire ntũũrani ĩmwe, na mũka wetagwa Maritha akĩmũgwata ũgeni mũjiĩ kwae.

³⁹ Maritha nĩ arĩ na mwarwagina wetagwa Maria. Rĩu Maria agĩkara ndĩ magũrũni ma Mwathani athikĩrĩtie ũrutani bwae.

⁴⁰ Ĩndĩ Maritha nĩ atangĩkĩte mũno nĩ wĩra mwingĩ wa kũmandĩra ageni. Agĩkuĩrĩria Jesũ akĩmwĩra, “Mwathani, nĩka ũkũona kũrĩ wega mwarwaiya antiganĩrĩtie na wĩra unde wa kũmandĩra ageni ndĩ ninka? Mwĩre angwatie.”

⁴¹ Ĩndĩ Mwathani akĩmũcokerie akĩmwĩra, “Maritha, Maritha! Ũrĩtangĩka na ũkathĩnĩka nĩ maũntũ maingĩ;

⁴² ĩndĩ nĩ ũntũ bũmwe tu bũrĩ na bata. Maria nĩ athuurĩte ũntũ bũrĩa bwega, na gũtĩ we ũnkĩũmba kũmũtunya bu.”