तीतोस 1 - ॱलोवा1 को़न्क्षोकगी ॱयोक्पो धाङ येशु मास्यीकागी कुछाप, ङा पाउलु, को़न्क्षोकगी दाम्दाक्याई धेपागी क्षीला धाङ को़न्क्षोकला थुक्ङेउ मीजी पी़येला धेनी लाब धेन्पा ॱहाघोतु च्युक्येला, ङाला को़वालाक। 2 होदे लाब धेन्पागो, को़न्क्षोकगी एम्माने जेजा धाम्चा थामेपे छेसोकगी रेवागो लाक। को़न्क्षोक नामा शोक ॱमीसुङालाक। 3 धेनी धी़चो़ ताक-ताकगोला, खोङबागी का दे तो़न्दा जेजुङ। दी गेनगो ङाला ॱनाजुङ धेनी होरी क्याम्गो़न को़न्क्षोकगी काला तेरी, ङा दे स्येदाहीन। 4 ङीमुला धेपा च्यीक्पा हो़गीन, ङी ॱङोन्नेगी भीजा तीतोसला, दे यीक ढीयाहीन। याप को़न्क्षोक धाङ होराङला थारपा ॱनाङगीन येशु मास्यीकागी, ख्यो़ला थुक्जे धाङ श्यीदे ॱनाङास्योक। केरेटदु तीतोसगी लेगा 5 लेगा लेरी धेतागो डुप्तु च्युक्ये धाङ ग्याजा घीरीदु, ङी ॱनेना च्योक्रे गोठीक्या दाम्येला, ङी ख्यो़ला केरेटदु भोरपे। 6 गोठीगो क्यो़न मेगीन धाङ केमी च्यीक हो़गीन, ख्योवा हुङघो़गीलाक। धेनी खी़ टुवाक्या धेपा झ्यीगीन धाङ च्यो़पा घा धेनी खाला ङेन्गीन हुङघो़गीलाक। 7 क्षो़छोकगी गोठीगो को़न्क्षोकगी श्याप्ची झ्येरी, क्यो़न मेगीन हुङ घोगीलाक। खो दो़पा क्षे धाङ ॱना तुङा धाङ क्षाङदुवा धाङ ठुक्चारा धाङ आलेला, मेढाङा हुङये मेतालाक। 8 हीना खो डो़नला फेप्सु श्यी़येला घागीन धाङ ले शाङपो झ्यीयेला घागीन धाङ राङ छो़ शीम्गीन धाङ ढाङपो धाङ धाम्पा धाङ च्यो़पा ढुङा झ्युङ घो़गीलाक। 9 मी श्येम्माक्याला तावा ॱङोन्नेला ॱलोप्चुङ ग्याप्ये धाङ ग्यापक्येल झ्यीगीनक्याला ॱलापच्या तेरयेला, खोराङला ॱलाप्ला का धेन्पागोला, खो तेन्पो धे घो़गीलाक। 10 मी माङक्षे श्येम्मागी होकला मेधेगीन धाङ दो़न्दाक मेगीन लाब ताङगीन धाङ गो कोरकीन हुङालाक। होदेक्याई खोक्ने माङक्षे, पाउ चेगीन ॱरो झ्यी घो़गीलाक ॱनागीन मीक्या लाक। 11 खुङक्या आलेगी स्याबाला ग्युक्वालाक धेनी ॱलापच्या शोक्पोक्या तेरती, नाङमी घीरीला ठुक्तु च्युक्वालाक। होझ्येरी खेक्या खुङक्याई खा काक घो़गुलाक। 12 खुङक्याई ॱङो़न स्येगीन च्यीक्कीयाः लेमो च्यीक देरे ॱने हो़तालाक, “केरेटगी मीक्या नाम्हीना शोक स्येदालाक। खुङक्या सेम्चेन दुकच्या च्योक्रे धाङ लेमेलाम्गीन फोक्चाङा हुङालाक।” 13 दे पाङपो दे, धेन्पा लाक। होझ्येरी होदेक्याला ॱलापच्या घामोमा तेर धेनी खुङक्याई धेपा तेन्पो झ्युरी, 14 याहुदापाक्याई ॱरुङक्या धाङ लाब धेन्पाला खा लोक्ला मीक्याई शो़सा, ठीमक्याला या झ्यीगीमालाक। 15 सेम चाङमा हो़गीनगी क्षीदु घीरी चाङमा हुङालाक हीना सेम ॱमेचाङा हो़गीन धाङ धेपा मीझ्यीगीनक्याई क्षीदु, घीन्दाङ चाङा मेयोङालाक घीझ्येरी ॱनाना खुङक्याई साम्लो धाङ सेमराङ मेढाङा हुङालाक। 16 मी होदेरेक्या को़न्क्षोकला ङो स्येयेहो़क ॱनालाक हीना खुङक्याई लेगाक्याई, को़न्क्षोकला खे लेन्गीनगो ॱमेतो़न्दालाक। खुङक्या ॱमीच्यीकी आम्लोवा धाङ खाला मेङेन्गीन धाङ लेगा शाङपो घीरीला, फेन ॱमेथोक्कीन हुङालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.