रोमापा 1 - ॱलोवा1 येशु मास्यीकागी ढेन्योक, ङा पाउलु कुछाप झ्युङयेला भो़पा धाङ को़न्क्षोकगी ताम्शाङ दे स्येयेगी क्षीदु को़वाहीन। 2 ताम्शाङ दे नी, को़न्क्षोकगी एम्माने राङगी ॱङो़नस्येखेनक्याई थोक्ने, धाम्पे सुङराप नाङ धाम्चा जे हो़तालाक। 3 ताम्शाङ दे नी को़न्क्षोकगी सेगी कोरला लाक। खोङ नी, ली़ला ग्यावु दावीदगी दुङग्युने ठुङवालाक। 4 येशु मास्यीका होरी चोवो नी, छीवाने ॱलार सो़न्पो श्याङा जेदी, धाम्पे थुक्ङीगी गोने नी़थुगी नाङ को़न्क्षोकगी से को़वालाक। 5 धेनी खोङगी छेनगी क्षीदु, याहुदापा मेन्गीन घीरीगी धेपा झ्यीये धाङ खोङगी काला ङेन्येगी क्षीला, खोङगी थोक्ने हेक्याला को़न्क्षोकगी थुक्जे धाङ कुछापगी लेगेनगो थोप हो़तालाक। 6 धेनी खुङक्यामुला खेक्याः, येशु मास्यीकागी मी झ्युङयेला भो़पाक्या लाक। 7 खे रोम ढोङखेरदु हो़गीन, को़न्क्षोकगी झाम्पा जेजाक्या धाङ को़न्क्षोकगी मी झ्युङयेला भो़पा घीरीला, होरी याप को़न्क्षोक धाङ चोवो येशु मास्यीकाने, खेक्याला थुक्जे धाङ श्यीदे थोप्पास्योक। रोम ढोङखेरदु डोयेला पाउलुगी दो़पा 8 धाङपोगो येशु मास्यीकागी थोक्ने, ङी को़न्क्षोकला ङा खे घीरीगी क्षीदु काटीन्क्षे श्युवाहीन घीझ्येरी ॱनाना जीक्तेन घीरीदु, खीकी धेपागी कोरला ख्याप्दुक। 9-10 धेनी ङी सेम तीङने, को़न्क्षोकगी सेगी ताम्शाङ सेटाक झ्यीदीहो़क धेनी खोङ को़न्क्षोकराङ, ङी खेक्याई कोरला ॱमेक्षेदा च्योई ॱमो़लाम ग्याप्कीनगी पाङपो लाक। ङी ॱमो़लामला, को़न्क्षोकगी थुकोङ थोक्ने झ्युङ थुक्ये हीन्ना, थामाला ङा खीकीचारु हुङये रास्योक ॱनेरी श्यी़लीहो़क। 11 घीझ्येरी ॱनाना खेक्याला स्युक्क्षेरु ताङयेला, ङा खेक्याला सेम्ङीगी झ्यीलाप रे तेरये रास्योक ॱनेरी, ङा खेक्याला थोङङी दो़दी। 12 दुक झ्येरी खेक्याने ङाला धेनी ङाने खेक्याला राङ-राङगी धेपागी थोक्ने, ॱहाला-छुला सेमस्युक थोप्कीलाक। 13 पी़नक्याओ, ङाला याहुदापा मेन्गीनक्याने ढेबु थोप्कीन च्योक्रे, खेक्यानेयाः थोप्येगी क्षीदु, ङी थेङ माङा खीकीचारु हुङयेला छास्यी शो़वी। हीना धान्दा थुक्पे हुङथुक माशुङ ॱनेरी, खेक्याई स्येगीनगो ङा दो़दीहो़क। 14 गीरीक केक स्येगीन याङना गीरीक केक ॱमेस्येगीन हीन्ना, धेनी खेवा याङना ॱलेन्दा हीन्ना, मी घीरीला ताम्शाङ स्येघोयेगी गेनगो ङी खुरहो़क। 15 होझ्येरी ङा रोमदु हो़गीन, खेक्यालाः ताम्शाङ स्येयेला दो़पा क्षे हो़क। 16 ङा नी ताम्शाङगी क्षीदु ङोजा मीझ्यीहो़क घीझ्येरी ॱनाना ताम्शाङ दे नी, धेपा झ्यीगीन घीरीगी थारपागी क्षीदु को़न्क्षोकगी नी़थु लाक। धाङपो याहुदापा धेनी याहुदापा मेन्गीनक्याई थारपागी क्षीदु लाक। 17 धेनी को़न्क्षोकने झ्युङगीन ढाङतेन नी, ताम्शाङला ॱङो़न्पालाक। दे ढाङतेन नी, धेपागी गोने धेपागी था थुक्पे डुपालाक। दी कोरला सुङरापला देरे ढीक हो़तालाक, “मी ढाङपो नी, धेपागी गोने सो़न्पो ॱनेगीलाक।” धीक्पाक्याई खाला को़न्क्षोकगी थुक्ठो़ 18 घीझ्येरी ॱनाना धेन्पाला राङगी ङेन्पे गोने ॱनेम्गीन, क्षो़ला ॱमीचीगीन मी धाङ मी ङेन्पा घीरीगी खाला, नाम्खे श्यीङखामने को़न्क्षोकगी थुक्ठो़ ॱङो़न जे हो़तालाक। 19 को़न्क्षोकगी कोरला घी ॱहाघो थुप्कीनगो, खुङक्याला सावो हो़तालाक घीझ्येरी ॱनाना को़न्क्षोक राङगी खुङक्याला सावो तो़न जे हो़तालाक। 20 धेनी जाम्बुलीङ दे को़ने ॱहाला, को़न्क्षोकगी थोङये मेगीन थामेपे नी़थु धाङ खोङ को़न्क्षोक हीन्गीन राङश्यी नी, खोङगी को़ जेजा दो़न घीरीला सावो थोङालाक। होझ्येरी होदे मीक्याई को़न्क्षोक ङो ॱमेस्येहो़क ॱनेरी, ॱनायेगी ग्युम्जे घीया मेतालाक। 21 घीझ्येरी ॱनाना मी देक्याई को़न्क्षोकला ङोस्येरीयाः, खोङला पु घो़गीन कुरतीगो ॱमापुवालाक धेनी काटीन्क्षे गोवाः माश्यी़वालाक। हीना खुङक्याई साम्लो ताङदाङगो, क्षोमेगीन धाङ खुङक्याई ॱलेन्दा सेमगो मी़नाकगी खावालाक। 22 धेनी खुङक्या राङला खेवा हीन ॱनालाक हीना ॱयोल्ले ॱलेन्दा झ्युवालाक। 23 धेनी छीवा मेगीन, को़न्क्षोकगी शीजेगो छीवा हो़गीन, मी धाङ झ्या धाङ धी़डो धाङ तोडोक्या च्योक्रे थोङगीन, कुन्डाक्यामुला खुङक्याई ज्येलालाक। 24 होझ्येरी को़न्क्षोकगी खुङक्याला, खोरी सेमगी दो़क्षाकक्याई ॱमेचाङाला भोरती श्या जेपालाक। धेनी खुङक्याई च्यीकगी श्येम्मामुला, ङोछागीन लेगाक्या झ्येवालाक। 25 घीझ्येरी ॱनाना खुङक्याई को़न्क्षोकगी धेन्पागो शोकमुला ज्येवालाक। धेनी को़पापोगी छापला को़कागोला क्षाक्क्षो़पा पुये धाङ श्याप्ची श्युये झ्यीदालाक। खोङ को़पापो नी, धी़ तेन्दु झ्यीलाप्चेन लाक। आमेन। 26 होझ्येरी को़न्क्षोकगी खुङक्याला ङोछागीन दो़छाकगी नाङला भोरती श्या जेपालाक। धेनी खुङक्याई केवे भोमोक्यागीयाः राङश्यीगी चो़पा पारी, भोमोक्यामुलाराङ लोक्येम झ्येवालाक। 27 देरेराङ झ्येरी केवे-फोक्यागीयाः केवे भोमोक्यामुला राङश्यीगी चो़पा पारी, दो़छाकगी मे भारती च्यीकगी च्यीकमुला लोक्येम झ्येवालाक। केवे-फो च्यीकगी केवे-फो श्येम्मामुला ङोछागी लेगा झ्येवालाक धेनी खोराङक्याला ज्योर घो़गीन, खोराङक्याई चो़ङेनगी छेपागो ङ्याङालाक। 28 धा खुङक्याई को़न्क्षोकला ची घोगीनगो क्षा माश्याक्पा, को़न्क्षोकगी खुङक्याला खोरी साम्लो ॱलेन्दा नाङला, झ्यी ॱमेछोक्कीन लेगाक्या झ्यीदु च्युक जेपालाक। 29 खुङक्या नी, चो़पा दुकच्या धाङ ङेन्पा धाङ सो़न्ना धाङ ङेन्सेम ॱनाछोकगी खाङ हो़तालाक। धेनी खुङक्या ठादोक धाङ मी सोक चेये धाङ ठुक्पा ग्याप्ये धाङ गो कोरये धाङ दाङसेमगी खाङ हो़तालाक। धेनी खुङक्या ठामा ग्याप्ये 30 धाङ ॱमेटा पाप्कीन धाङ को़न्क्षोकला दाङा झ्यीगीन धाङ मीला ॱङ्याप्चो़ स्येगीन धाङ ङागेल्चेन धाङ राङतो़ झ्यीगीन हो़तालाक। खुङक्या ङेन्पा झ्यीयेगी थापस्यी चागीन धाङ राङगी फामाला ॱमीचीगीन 31 धेनी ॱलेन्दा धाङ खाछेम ॱमीरुङगीन धाङ चेवागी सेम मेगीन धाङ ॱङीङजे मेगीन हुङालाक। 32 देरे लेगा झ्यीगीनक्याला, को़न्क्षोकगी ढाङतेनगी ठीमला छीवे ङेपा फोक्कीलाक ॱनागीन, लाब दे खुङक्याई स्येरीयाः, खुङक्याई दे लेगाक्या झ्यीये च्यीगा मेन्दा हीना देरे लेगा झ्यीगीन मी श्येम्माक्यालाः सेमस्युक पारालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.