ॱङो़न्पा 9 - ॱलोवा1 धेनी नाम्खे भाङछेन ॱङावागी़, राङगी दुङक्षेनगो भी़वालाक धेनी ङी नाम्खाने साला ल्हीम्ला, कारमा च्यीक थोजुङ। होदेला थी मेगीन, दोङ-दोङगी धीमीकगो ॱनावालाक। 2 धेनी होदे कारमागी़ होदे थी मेगीन दोङ-दोङगो खा पेली घाङला, होदेने थाप क्षेने थो़न्गीन धीबा च्योक्रे थो़न्बालाक। धेनी होदेने थो़न्दा, धीबागी ङीमा धाङ ॱनाम ॱङीगाराला मी़नाक्पा शो़वालाक। 3 धेनी होदे धीबाने जीक्तेनदु बु ईली च्याक-च्याक थो़न्दी होवालाक धेनी होदेक्याला साश्यीगी धीक्पा राचाकगी च्योक्रे, नी़थु तेरपालाक। 4 होदेक्याला साश्यीला हो़गीन, चा धाङ चीस्यीङ ॱनाछोक धाङ स्यीङदोङ घीला ॱनो़ ॱमाक्या हीना टाल्लेला को़न्क्षोकगी थेचे मेगीन मीक्याला च्यीगा, ॱनो़ क्यो़ सुरी सुवालाक। 5 धेनी होदे मीक्याला सेयेगो मेछोक्वालाक हीना दावा ॱङा थुक्पे, दुक्पु च्यीका ताङदु च्युक्पालाक। खुङक्याला राक्रा दुक्पुगो धीक्पा राचाकगी ॱमुक्वाराङ झ्युङगीन दुक्पु च्योक्रे हो़तालाक। 6 होदे ङीमाक्याला मीक्याई छीवा चागीलाक हीना ॱमेथोप्कीलाक। खुङक्या स्यीङी दो़गीलाक हीना छीवा खुङक्याने डो़री डुगीलाक। 7 धा होदे ईली च्याक-च्याकक्या ॱमाकगी क्षीदु डाढीक झ्येजा च्योक्रे, ताक्या च्योक्रे दुक। होदेक्याई गोला सेरगी चो़पेन च्योक्रे च्यीक घो़न्दुक धेनी होदेक्याई ङोरोङगो, मीगी ङोरोङ च्योक्रे दुक। 8 होदेक्याई ॱरागो भोमाक्याई ॱरा च्योक्रे दुक धेनी सोगो सीङगेगी सो च्योक्रे दुक। 9 होदेक्याई च्याकगी ढाङठाप च्योक्रे घो़न्दुक धेनी होदेक्याई स्योक्पागी हुरडा नी, ॱमाकला ग्युक्कीन स्यीङता खोरलोक्या धाङ ता माङाक्याई, हुरडा च्योक्रे दुक। 10 होदेक्याई ॱङामा धाङ दुङगो धीक्पा राचाक च्योक्रे दुक धेनी होदेक्याई ॱङामाला मीक्याला दावा ॱङा थुक्पे, दुक्पु ताङ थुक्येगी नी़थु हो़तालाक। 11 धेनी होदेक्याई ग्यावुगो, थी मेगीन दोङ-दोङगी भाङछेन दुक। ईब्रीपा केकला होदे भाङछेनगी मीङ आबेदो़न धेनी गीरीक केकला आपो़ल्यो़न लाक। होदे ॱनाना तोरस्यीक ताङगीन लाक। 12 दुक्पु धाङपोगो जोक्जुङ। धा धोराङा दुक्पु श्येम्मा ॱङी हुङये ल्हाक हो़तालाक। 13 धेनी नाम्खे भाङछेन ढुक्पागी़ राङगी, दुङक्षेनगो भी़वालाक धेनी ङी को़न्क्षोकगी दोङदु हो़गीन, सेरगी क्षो़ठीगी राक्योक श्यीने, केक च्यीक थो़न्गीन घोरजुङ। 14 धेनी दुङक्षेन हो़गीन नाम्खे भाङछेन ढुक्पागोला दे केकगी देरे सुजुङ, “चाङबो क्षे युफारेट डामदु, धाम्दी श्याकश्या नाम्खे भाङछेन श्यीला टो।” 15 धा मीरीकगी दुबु सुमने दुबु च्यीकला सेयेला, होदे धी़चो़ धाङ होदे ङीमा धाङ होदे दावा धाङ होदे लोगी क्षीदु, डाढीक झ्येजा होदे नाम्खे भाङछेन श्यीला टोवालाक। 16 होदे ताला श्यो़नश्या ॱमाक्पुङगी ढाङगागो, ङी कारोड ङीस्यु घोरजुङ। 17 ङी थोङनाङला थोथा ताक्या धाङ तावाक्या देरे दुक; खुङक्याई ढाङठापगो मे च्योक्रे ॱमाउ धाङ ठाधो च्योक्रे ॱङोम्पो धाङ मुशे च्योक्रे सेउ दुक। होदे ताक्याई गोगो, सीङगेगी गो च्योक्रे दुक। धेनी होदे ताक्याई खाने मे धाङ धीबा धाङ मुशे थो़न्दी हो़तालाक। 18 धेनी खुङक्याई खाने थो़न्दा, मे धाङ धीबा धाङ मुशेगी नेक्यो़न सुमगी थोक्ने, मीरीकगी दुबु सुमने च्यीकला सेपालाक। 19 होदे ताक्याई नी़थुगो, खुङक्याई खा धाङ ॱङामाला हो़तालाक घीझ्येरी ॱनाना होदेक्याई ॱङामागो गोवा हो़गीन, डु च्योक्रे हो़तालाक। धेनी होदेगी मीक्याला ॱनो़ क्यालालाक। 20 दे दुक्पुगी थोक्ने ॱमास्यीस्या मी ल्हाक्माक्याई, धोराङा राङगी लाक्पी लेगाक्याला पारी सेम माग्युरपालाक। धेनी खुङक्याई डेक्या धाङ थोङ ॱमीथुक्कीन याङना घोर ॱमीथुक्कीन याङना ग्युक ॱमीथुक्कीन सेर धाङ ॱङु धाङ लीदीङ धाङ धोगोङ धाङ स्यीङगी शो़सा, कुन्डाक्याला क्षाक्क्षो़पा पुयेला छाम माश्याक्पालाक। 21 धेनी श्येम्मागी ॱरोक चेचा धाङ ॱङाक ग्यापक्या धाङ लोक्येम धाङ कुमा कुका लेगाक्याला, खुङक्याई पारी सेम ग्युरवा ॱमातावालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.